ملک اچ وٹس ایپ چلدا پئے اتے کوئی وی پی این بلاک کائنی، وزیرمملکت شزافاطمہ خواجہ

اسلام آباد۔17جنوری (اے پی پی) قومی اسمبلی کوں ݙسیا ڳئیا جو ملک اچ وٹس ایپ چلدا پئے اتے کوئی وی پی این بلاک کائنی، سب میرین کیبل اچ ودھارے نال ملک اچ لائیوانٹرنیٹ بہتر تھیسی۔ پچھلےترائے مہینے اچ 31 ہزار توں ودھ آئی پیز رجسٹرڈ تھی ڳئن۔ جمعے کوں قومی اسمبلی اچ سوالاں دے وقفے اچ شازیہ مری دے سوال تے وزیرمملکت آئی ٹی شزافاطمہ خواجہ ایوان کوں ݙسیا جو اے حقیقت اے جو انٹرنیٹ دے استعمال بارے صارفین دے تجربے اچ چیلنجز امدے پئن پر ایں ویلھے وٹس ایپ پورا چلدا پئے۔ کوئی وی پی این بلاک کائنی۔ انفارمیشن ٹیکنالوجی دی برآمدات 28 فیصد ودھ ڳئن۔ اے ودھارا انٹرنیٹ دی بہتر سپیڈ کوں نشابر کریندے۔ انہاں آکھیا جو پی ٹی اے، ایس آئی ایف سی داپاشا اتےصنعت نال رابطے اچ ہن ۔ انڈسٹری کوں تحفظ ݙٰیوݨ اساݙی ذمہ واری اے۔ وزیرمملکت آکھیا جو پاکستان اچ موبائل سپیکٹرم دامسئلہ موجود اے۔ ایں ویلھے 274میگاہرٹز دا سپیکٹرم اے، گزریل اٹھ مہینے اچ قانونی چارہ جوئی نال 562 میگاہرٹز کوں کݙھیا ڳئے۔ انشاء اللہ ایں سال دے ادھ تئیں 562میگاہرٹرسپیکٹرم دی نیلامی کریسوں۔ انہاں آکھیا جو ایں ویلھے صرف ست سب میرین کیبلز پاکستان امدی پئن، انہاں اچوں ہک دی مد پوری تھی ڳئی اے، میٹا دی ݙو وݙی سب میرین کیبلز پاکستان آڳئن، انہاں کوں شروع کرݨ اچ کڄھ مہینے لڳسن