پی ٹی آئی بیک ڈور تے فرنٹ ڈور اچ کہیں ھک کوں چُݨے ، ݙو ݙو ترائے ترائے سطح تے متوازی مذاکرات نی تھی سڳدے ، حکومتی مذاکراتی کمیٹی دے ترجمان سینیٹرعرفان صدیقی دا نجی ٹی وی کوں انٹرویو

اسلام آباد۔18جنوری(اے پی پی) سینیٹ اچ پاکستان مسلم لیگ (ن) دے پارلیمانی پارٹی لیڈرتے پی ٹی آئی نال مذاکرات کرݨ آلی حکومتی کمیٹی دے ترجمان، سینیٹر عرفان صدیقی آکھیے ݙو ݙو ترائے ترائے متوازی سطح تے مذاکرات نی تھیندے ۔ پی ٹی آئی بیک ڈور تے فرنٹ ڈور اچوں کہیں ھک کوں چُݨے ۔ جے او اسٹیبلشمنٹ نال ملاقات اتے مبینہ مذاکرات توں مطمئن اے تاں اپݨی کمیٹی کوں ݙسا ݙیوے جو ہݨ حکومتی کمیٹی نال مذاکرات دی لوڑھ کائنی رہی۔ ھک نجی ٹیلی ویژن چینل (ڈان) دے ٹاک شو اچ میزبان دے سوالاں دا جواب ݙیندے سینیٹر  عرفان صدیقی آکھیے میکوں علی گوہر دی آرمی چیف نال مبینہ ملاقات دی ساری تفصیلات دا علم اے۔ خیبرپختون خوا دی سکیورٹی صورت حال تے سݙی ڳئی کانفرنس اچ ساریاں سیاسی جماعتاں دی قیادت شرکت کیتی جیں کوں پی ٹی آئی دے قائم مقام چئیرمین خصوصی ملاقات اتے مذاکرات دا ناں ݙے ݙتے اتے جیں کوں عمران خان وی خوش آئند قرارݙتے ۔ ایں سوال دے جواب اچ عمران خان اپݨے ٹویٹ اچ حکومت کوں بددیانت قرارݙیندے مذاکراتی ٹیم بارے آکھیے بددیانت لوک تے چیٹرز کݙاہیں نیوٹرل ایمپائر نہ آوݨ ݙیسن ، سینیٹر عرفان صدیقی آکھیے عمران خان اِنہاں بددیانت لوکاں نال مذاکرات سانڳے کمیٹی قائم کیتی جیں ول ول سپیکر کنے ونڄ تے آکھیے وزیراعظم نال کمیٹی بݨاوݨ دا آکھو ۔ جے اساں بددیانت لوک ہیسے تاں اساں نال مذاکرات دا رستہ کیوں چݨیا؟ ھک ٻئے سوال دے جواب اچ عرفان صدیقی آکھیے وزیرقانون اعظم نذیر تارڑ اوھا ڳالھ آکھی اے جیڑھے عمران خان ہر روز آکھدے ہن جو امیر تے غریب سانڳے ھکو قانون ہووݨا چاہیدے ۔ او ریاست مدینہ دا وی وݙے ماݨ نال ناں گھندے ہن ۔ ایں اصول دے تحت انھاں دی اپیل اپݨی واری تے لڳݨی چاہیدی اے انہاں آکھیے کمیٹی اجلاس دے اندر وی ساݙی طرفوں پی ٹی آئی دی تحریر کوں حکومت تے چارج شیٹ قرارݙتا ڳیا ہئی ۔ سینیٹر عرفان صدیقی آکھیے ݙوہیں کمیٹیاں پہلے ہی طے کرچکن جو کہیں عدالتی فیصلے دا مذاکراتی عمل تے کوئی منفی اثر نہ پوسی ، انہاں آکھیے حکومتی کمیٹی ست ورکنگ ݙینھاں دے اندر اندر، 28 جنوری تئیں آپݨا تحریری موقف پیش کرݙیسی