پاکستان غزہ دی  تعمیر نو دے مرحلے اچ آپݨا ہرممکن کردار نبھیسی ،گوادر ملکی ترقی سانڳے سنگ میل دی حیثیت رکھیندے ،وزیراعظم  شہباز شریف

اسلام آباد۔21جنوری(اے پی پی) وزیراعظم محمد شہباز شریف غزہ  اچ جنگ بندی  دا خیرمقدم کریندے آکھیے پاکستان غزہ دی  تعمیر نو دے مرحلے اچ آپݨا ہرممکن کردار نبھیسی ،گوادر پاکستان دی ترقی سانڳے سنگ میل دی حیثیت رکھیندے ،پاکستان دے ساریں توں وݙے ایئرپور ٹ دا افتتاح ٻہوں چنڳی ڳالھ اے ،اخلاص،محنت اتے ٹیم ورک نال پاکستان دی معیشت مستحکم بݨیسوں۔ وفاقی کابینہ دے اجلاس توں خطاب کریندے وزیراعظم آکھیے غزہ اچ وݙی خونریزی اتے تباہی دے بعد 42 ݙینھاں سانڳے جنگ بندی تھئی اے ، دعا اے جو اے جنگ بندی مستقل ہووے ،50ہزار توں ودھ  فلسطینی  ماواں، بھیݨاں ، بزرگ ، ٻال ، نینگر ، انجینئرز تے ڈاکٹرز ایں وچ شہید تھئن تےشہراں دے شہر تباہ تھئن ،پاکستان اپݨِے فلسطینی بھراویں دی آزادی اتےغزہ اچ جنگ بندی سانڳے چنڳی آواز چاتی ، اساں فلسطینیاں دی امداد اتے ریلیف اچ آپݨا حصہ پاتا ، نویں سروں تعمیردا مرحلہ شروع تھیوݨ تے آپݨا ہر ممکن کردار نبھیسوں ، اے ساݙا فرض اے جیں کوں اللہ دی رضا سانڳے پورا کریسوں ۔ وزیراعظم گوادر ایئرپورٹ دے باضابطہ آپریشنل  تھیوݨ توں چنڳاں قرار ݙیندے آکھیے اے منصوبہ چین دی 230ملین ڈالر دی لاڳت نال مکمل تھئے ، گوادر ایئرپورٹ پاکستان دا ساریں توں وݙا ایئر پورٹ شمار تھیندے جے اے کمرشل بنیاداں تے آپریٹ تھیندے تاں بلوچستان تے پاکستان دی معیشت سانڳے ٻہوں اہم ہوسی ۔ وزیراعظم آکھیے جیڑھے لوک پاکستان دشمنی تے لتھن تے قتل و غارت دا بازار گرم کیتا اے انہاں کوں اے ڳالھ ڄاݨ گھنݨی چاہیدی اے جو ایں قتل وغارت توں  نہ صرف بلوچستان دے عوام دا ضیان تھیندا پئے بلکہ اے پاکستان دے عوام نال وی ً دشمنی اے، چین جیھا دوست جیں آپݨے وسائل توں پاکستان کوں اے تحفہ ݙتے دی قدر کرݨی چاہیدی اے ، کراچی دی بندرگاہ پہلے ہی  ٻہوں مصروف اے اتے اتھاں آمدورفت دا ٻہوں ٻوجھ اے ۔ وزیراعظم آکھیے گوادر پاکستان دی ترقی اچ سنگ میل دی حیثیت رکھیندے ایں دے خلاف محاذ آرائی پاکستان دشمنی اے۔ وزیراعظم عالمی بنک دے لمبی مدت شراکت داری فریم ورک کوں چنڳاں قرار ݙتے جیں دے تحت آندے ݙاہ سالاں اچ 20 ارب ڈالر دی سرمایہ کاری تھیسی وزیراعظم آکھیے موسمیاتی تبدیلی اتے سماجی شعبے سانڳے ایں قرضے توں ساݙی سماجی شعبے دی معیشت کوں طاقت ملسی اساکوں ایندا خیرمقدم کرݨا چاہیدے تے ایں رستے اچ آندیاں رکاوٹاں  کوں ہٹاوݨاں چاہیدے انہاں آکھیے آئی ٹی دیاں برآمدات ودھدیاں پئن ، دسمبر2024  اچ برآمدات  ساریں توں ودھ (348 ملین ڈالر) رہین جیڑھا جو چنڳی ڳالھ اے ۔ وزیراعظم آئی ٹی دی وزارت اتےمتعلقہ حکام کوں شاباش ݙیندے آکھیےاساکوں آئی ٹی دے شعبے اچ مزید اڳوں ودھݨا اے ۔ وزیراعظم آکھیے معاشی اشاریے چنڳے تے ایں ڳالھ دی علامت ہن جو اساں محنت ، اخلاص اتے ٹیم ورک توں پاکستان دی معیشت کوں مستحکم بݨیسوں ۔ انہاں توانائی دی وزارت کوں الیکٹرانک گاݙیاں دے حوالے نال جامع پروگرام تے شاباش ݙتی۔ وزیراعظم آکھیے اڄوکے سال حاجیاں کوں زیادہ سہولتاں ݙتیاں ویسن تے انہاں دا بہترین طریقے نال خیال رکھیا ویسی تے رہنمائی کیتی ویسی ۔ وزیراعظم فتنہ الخوارج مکاوݨ سانڳے قربانیاں کوں خراج  عقیدت پیش کریندے آکھیے انہاں قربانیاں دی جتنی وی تعظیم کیتی ونڄے گھٹ اے ، قوم انھاں قربانیاں دا قرض نی چکا سڳدی۔