نائب وزیراعظم تے وزیرِ خارجہ اسحاق ڈار تے بحرین دے وزیرِ خارجہ دی ملاقات، ݙوپاسہ تعاون کوں ٻیا وسعت ݙیوݨ دے طریقیاں تے ڳالھ مہاڑ

اسلام آباد۔8 اکتوبر (اے پی پی) نائب وزیراعظم تے وزیرِ خارجہ سینیٹر محمد اسحاق ڈار تے بحرین دے وزیرِ خارجہ ڈاکٹر عبداللطیف بن راشد الزیانی اپسی دلچسپی دے مختلف شعبیاں بالخصوص تجارت، اقتصادی و سرمایہ کاری تعلقات تے کثیر الجہتی فورماں تے رابطیاں دے ذریعے ݙوپاسہ تعاون کوں ٻیا وسعت ݙیوݨ دے طریقیاں تے ڳالھ مہاڑ کیتی۔ وزارتِ خارجہ اچ تھیوݨ آلی ملاقات دے دوران ݙوہائیں وزرائے خارجہ پاکستان بحرین تعلقات دا جائزہ گھدا تے ݙوہائیں ملکاں وچال اعلیٰ سطحی رابطیاں اچ مثبت پیشرفت تے اطمینان دا اظہار کیتا۔ ݙوہائیں پاسوں آپسی دلچسپی دے علاقائی تے عالمی امور تے وی تبادلۂ خیال کیتا ڳیا اتے ایں ڳالھ تے زور ݙتا ڳیا جو چیلنجاں نال نبڑݨ تے تنازعات دے حل کیتے مذاکرات تے سفارت کاری سب توں قابلِ عمل ذرائع ہن۔ ایں توں پہلے پاکستان بحرین مشترکہ وزارتی کمیشن دے تیجھے اجلاس دے افتتاحی کلمات اچ نائب وزیراعظم و وزیرِ خارجہ سینیٹر محمد اسحاق ڈار آکھیا جو مشترکہ وزارتی کمیشن دے تحت تمام ݙوپاسہ مشترکہ ورکنگ گروپس دے اجلاس منعقد تھئے اتے انہاں اچ نتیجہ خیز ڳالھ مہاڑ تھئی۔ انہاں قیادت ولوں ترائے سالاں دے اندر ݙوطرفہ تجارت ہک ارب ڈالر تئیں ݙوڳݨی کرݨ دے ہدف دا حوالہ ݙیندے ہوئیں آکھیا جو ہک سال گزر ڳئے، ایں کیتے باقی مدت اچ ایہ ہدف حاصل کرݨ کیتے کوشساں تیز کرݨ دی ضرورت اے۔ اسحاق ڈار خلیج تعاون کونسل-پاکستان آزاد تجارتی معاہدے (GCCFTA) دی جانب پیشرفت دا خیرمقدم کریندیں ہوئیں آکھیا جو ایں معاہدے دی تکمیل نال ݙوہائیں فریقاں کوں تجارت وسعت ݙیوݨ تے آپݨے اقتصادی اہداف حاصل کرݨ اچ مدد ملسی۔ انہاں درآمدات، برآمدات تے سرمایہ کاری دے فروغ کیتے حکومت توں حکومت دیاں کوشساں دے نال کاروباری سطح تے رابطے ودھاوݨ دی ضرورت تے زور ݙتا۔ نائب وزیراعظم تے وزیرِ خارجہ بحرین نیشنل گارڈ کیتے 1800 پاکستانی اہلکاراں، جنہاں اچ 30 ریٹائرڈ فوجی افسران وی شامل ہن، دی بھرتی کوں وی سراہیا۔ انہاں جون 2026ء اچ پاکستان کوسٹ گارڈز تے بحرین دی وزارتِ داخلہ وچال طے تھیوݨ آلی مفاہمتی یادداشت دا وی خیرمقدم کیتا جیندے تحت 13 پاکستانی افسراں تے 37 اہلکار بحرینی کوسٹ گارڈ اچ شامل تھئے۔ انہاں تقریباً ہک لکھ 34 ہزار پاکستانیاں دی میزبانی تے بحرین دا شکریہ ادا کریندے ہوئیں آکھیا جو انہاں اچ وݙی تعداد ہنرمند پیشہ ور افراد دی اے۔ انہاں جون 2026ء اچ سزا یافتہ قیدیاں دی منتقلی دے معاہدے دی توثیق دا وی خیرمقدم کیتا تے پاکستانی شہریاں کیتے بحرین دی مسلسل حمایت تے شکریہ ادا کیتا۔ بحرین دے وزیرِ خارجہ ڈاکٹر عبداللطیف بن راشد الزیانی آکھیا جو اجلاس ایجھے ویلھے اچ تھیندا پئے جݙاں خطے دا بحران بدستور حل طلب اے تے آبنائے ہرمز دے ذریعے جہاز رانی کوں خطرات لاحق ہن۔ انہاں سعودی عرب دے ابہا انٹرنیشنل ایئرپورٹ تے کنگ خالد انٹرنیشنل ایئرپورٹ تے 6 تے 7 اکتوبر کوں تھیوݨ آلے دہشت گرد حملیاں دے نال نال حوثی ملیشیا ولوں شہریاں تے شہری تنصیبات تے حملاں تے مکہ مکرمہ تے مدینہ منورہ کوں نشانہ بݨاوݨ دی کارروائیاں دی شدید مذمت کیتی۔ انہاں آکھیا جو ہوائی اݙیاں تے شہری بنیادی ڈھانچے تے حملے بین الاقوامی قانون تے بین الاقوامی انسانی قانون دی خلاف ورزی ہن۔ ڈاکٹر الزیانی آکھیا جو بحرین سعودی عرب دی سلامتی کوں آپݨی تے خلیج تعاون کونسل دی سلامتی دا لازمی حصہ سمجھدے اتے ریاض دے نال مکمل یکجہتی دا اظہار کریندے۔ انہاں وزیراعظم محمد شہباز شریف دی قیادت اچ اسلام آباد اچ مذاکرات دی میزبانی تے مکالمے تے کشیدگی اچ ڳھٹکیہ دے فروغ کیتے پاکستان دے تعمیری کردار کوں سراہیا۔ انہاں اقوامِ متحدہ دی سلامتی کونسل اچ پاکستان تے بحرین وچال قریبی تعاون بالخصوص بین الاقوامی قانون، امن تے سلامتی، بحری سلامتی تے جہاز رانی دی آزادی دے امور تے ݙوہائیں ملکاں وچال تعاون کوں وی اجاگر کیتا۔ انہاں آکھیا جو مشترکہ وزارتی کمیشن دا اجلاس پیشرفت دا جائزہ گھنݨ، اعلیٰ سطحی دوریاں دے بعد پیشرفت کوں اگوں ودھاوݨ تے ݙوپاسہ تعلقات اچ پیدا تھیوݨ آلی مثبت رفتار کوں عملی تعاون اچ تبدیل کرݨ دا موقع فراہم کریندے۔