وزیر تجارت جام کمال خان دی کمبوڈین وزیراعظم سمڈیچ ہن مانیٹ نال ملاقات

اسلام آباد۔21جنوری(اے پی پی) وفاقی وزیر تجارت جام کمال خان کمبوڈین وزیراعظم سمڈیچ ہن مانیٹ نال آپݨے تاریخی دورہ کمبوڈیا تے پاکستانی وفد دی گرم جوشی نال میزبانی کرݨ تے اظہار تشکر کیتے۔ جاری اعلامیہ موجب اے دورہ ݙوپاسے تعلقات اچ ھک اہم سنگ میل ثابت تھئے جیں اچ تجارت، سرمایہ کاری اتے سفارتی تعاون کوں تکڑا بݨاوݨ تے توجہ ݙتی ڳئی ۔جام کمال خان پاکستان اتے کمبوڈیا وچال تجارت اتے سرمایہ کاری دے شعبیں اچ تعاون دے بے پناہ امکانات کوں اجاگر کیتے ۔ انہاں کاروباری تعلقات (بزنس ٹو بزنس) کوں تکڑا کرݨ دی لوڑھ تے زور ݙتے جیڑھے جو مستحکم اقتصادی رابطے دی بنیاد بݨ سڳدن ۔ وزیراعظم سمڈیچ ہن مانیٹ وزیر تجارت دے دورے دا خیرمقدم کیتا اتے پاکستان اتے کمبوڈیا وچال پہلے مشترکہ تجارتی کمیٹی اجلاس دے کامیاب اختتام تے اطمینان دا اظہار کیتا۔ انہاں ٹیکسٹائل اتے صحت دے شعبیں اچ تعاون دے موقع کوں نشابر کیتا تے تجویز ݙتی جو انہاں شعبیں کوں ابتدائی مرحلے اچ ترجیح ݙتی ونڄے ۔وزیراعظم عالمی سطح تے تجارت اتے سرمایہ کاری دے رجحانات اچ تھیوݨ آلیاں تبدیلیاں کوں منیندے ہوئیں انہاں موقع کوں بروئے کار گھن آوݨ دی لوڑھ تے زور ݙتا جیڑھا جو کمپنیاں نویں علاقیں اچ منتقل تھیوݨ دے دوران پیدا کریندن ۔ انہاں پاکستان نال دفاعی تعاون کوں مزید ودھارا ݙیوݨ اچ کمبوڈیا دی دلچسپی کوں وی نشابر کیتے ۔ انہاں ایں ڳالھ دا یقین ݙیوائے جو اسلام آباد اچ کمبوڈین رہائشی مشن دے قیام دا عمل جاری اے جیڑھا ݙو پاسے تعلقات تکڑے کرݨ تے عوامی سطح تے رابطے ودھاوݨ اچ مددگار ہوسی۔ اے تاریخی ملاقات پاکستان اتے کمبوڈیا دی طرفوں سانجھے مفادات اڳوں ودھاݨ تے تعاون دے نویں رستے ڳولݨ دے عزم کوں ظاہر کریندی اے ۔ ݙوہیں رہنماواں تجارت، سرمایہ کاری تے ٻئے اہم شعبیں اچ شراکت کوں گھاٹا کرݨ تے انہاں کوں ݙیکھݨ دے موقع کوں بروئے کار گھن آوݨ دا عزم کیتے۔