حکومت فیصلہ کن معاشی اصلاحات نافذ کرتے پائیدار تے شمولیتی ترقی دی تکڑی بنیاد رکھ ݙتی اے ، وفاقی وزیر خزانہ سینیٹر محمد اورنگزیب

اسلام آباد۔21جنوری(اے پی پی) وفاقی وزیر خزانہ سینیٹر محمد اورنگزیب عالمی شراکت کاراں کوں پاکستان دے ترجیحی معاشی شعبیں اچ سرمایہ کاری دی دعوت ݙیندے آکھیے حکومت گھمبیر معاشی مشکلات دے تناظراچ فیصلہ کن معاشی اصلاحات نافذ کرتے پائیدار تے شمولیتی ترقی دی تکڑی بنیاد رکھ ݙتی اے ، حکومت دے معاشی کوششاں دے مثبت اثرات نظر آوݨ شروع تھی ڳئن، اڑان پاکستان پروگرام دے ذریعے پبلک پرائیویٹ پارٹنرشپ، بہتر برآمدی مسابقت اتے بہتر مالیات دے ذریعے 2028 تئیں پائیدار تے برآمدات تے مبنی 6 فیصد شرح نمو حاصل کیتی ویسی ، قابل ذکر افرادی قوت، وافر قدرتی وسائل اتے بے پناہ پیداواری صلاحیت نال، پاکستان نویاں بلندیاں تے پڄݨ سانڳے تیار اے ۔ اے ڳالھ انہاں عالمی اقتصادی فورم دے سالانہ اجلاس دی مناسبت نال فورم دی ویب سائٹ تے چھپݨ آلے مضمون اچ آکھی جیں اچ انہاں پاکستان دی معاشی اصلاحات، معیشت دی بحالی اتے مستقبل دے چیلنج دا تفصیلی احاطہ کیتے۔ وزیر خزانہ”پاکستان دی معاشی بحالی: پائیدار اتے جامع ترقی دے پاسے قدم ” دے عنوان توں مضمون اچ پاکستان دی معاشی اصلاحات اتے پالیسیاں کوں اجاگر کیتے۔وزیر خزانہ عالمی سرمایہ کاراں کوں پاکستان دے زراعت، انفارمیشن ٹیکنالوجی، قابل تجدید توانائی اتے فارما جیھے ترجیحی صنعتی شعبیں اچ سرمایہ کاری دی دعوت ݙیندے آکھیے اساں اوکھے معاشی مشکلات دے جلو اچ فیصلہ کن معاشی اصلاحات نافذ کرتے پائیدار اتے شمولیتی ترقی دی تکڑی بنیاد رکھی اے ساݙی کوششاں دے مثبت اثرات نظر آوݨ شروع تھی ڳئن ، ملکی معیشت اچ لچک، استقلال اتے نویں سرے توں نمو اتے اڳوں ودھݨ دی صلاحیت نمایاں اے ۔ وزیر خزانہ اپݨے مضمون اچ آکھیے حکومت کوں ابتدا اچ مالیاتی اتے زری دٻاؤ دا سامݨا ہئی ، پاکستان کوں افراط زر، زرمبادلہ دے گھٹ ذخیرے ، معاشی و صنعتی ترقی دی رفتار گھٹ پووݨ تے قدرتی آفتاں جیھے مسئلے ہن ، حکومت انہاں مشکلات تے قابو پاوݨ وی ضروری اصلاحات کیتن،مستحکم کرنسی، مضبوط مالیاتی پالیسیاں اتے اہداف تے مبنی مالی اقدامات دے ذریعے افراط زر تے قابو پاتا ڳئے،پاکستان آئی ایم ایف دی مدد نال توانائی تے محصولات دے ڈھانچے اچ جامع اصلاحات شروع کیتن ۔ وزیر خزانہ آکھیے اڑان پاکستان پروگرام دے ذریعے پبلک پرائیویٹ پارٹنرشپ، بہتر برآمدی مسابقت اتے بہتر مالیات دے ذریعے 2028 تئیں پائیدار اتے برآمدات تے مبنی 6 فیصد شرح نمو حاصل کیتی ویسی ،معیشت دے ترجیحی شعبیں اچ زراعت، توانائی، ٹیکسٹائل، فارماسیوٹیکل اتے آئی ٹی شامل ہن ،اڑان پاکستان دے ذریعے صحت، تعلیم، غربت مکاوݨ ، سرمایہ کاری اتے موسمیاتی استقلال گھنݨ سانڳے عالمی بنک توں 20 ارب ڈالر امداد ملسی ۔ انہاں آکھیے عالمی بنک دی شراکت توں ٻالاں اچ غذائیت دی کمی، تعلیمی نتیجے تے صاف توانائی اپناوݨ جیھے اہم چیلنجاں نال نبڑیا ویسی ،پاکستان موجودہ مالی سال اچ 13 ٹریلین روپے محصولات جمع کریسی جیڑھا جو پچھلے سال توں 40 فیصد زیادہ اے،ٹیکس اصلاحات دے ذریعے محصولات دا دائرہ زراعت، رئیل اسٹیٹ اتے تجارت جیھے شعبیں تئیں ودھایا ویندا پئے جیڑھا جو پچھلے سال توں 40 فیصد زیادہ اے۔وزیرخزانہ محمد اورنگزیب آکھیے پاکستان دی معیشت بحالی دے رستے تے ٹردا پئے ، افراط زر 4.1 فیصد تئیں ڈھہہ ڳئے ،زرمبادلہ دے ذخیرے ݙو مہینے توں ودھ دی درآمدات سانڳے کافی ہن ،ملکی برآمدات اچ 7.1 فیصد ودھارا تھئے تے آئی ٹی سیکٹر مصنوعات دی درآمدات اچ سالانہ بنیاداں تے 28 فیصد دا متاثر کن ودھارا تھئے ، پاکستان دے عالمی ڈیفالٹ دے خطرے اچ 93 فیصد کمی آئی اے، جیڑھا جو ملک دے مالیاتی استحکام تے تجدید اعتماد اے،مقامی اتے غیر ملکی سرمایہ کار بشمول آرامکو، بی وائی ڈی اتے سام سنگ جیھی عالمی کمپنیاں معاشی بحالی اچ حصہ پیندیاں پئن ، پاکستان منافع بخش سرمایہ کاری دے مرکز دے طور تے عالمی سطح تے توجہ گھندا پئے ،کرنٹ اکائونٹ مسلسل ترائے مہینے توں سرپلس وچ اے ، سرمایہ کاراں دا اعتماد ݙو سال دی اُتلی سطح تے ہے ، مالی سال 2025 دی پہلی ششماہی اچ براہ راست غیر ملکی سرمایہ کاری اچ 20 فیصد ودھارا ٹھئے ، روشن ڈیجیٹل اکائونٹ جیھے اقدامات توں 9 ارب ڈالر توں ودھ دی رقم ملی اے ،امسال ترسیلات زر 35 ارب ڈالر تئیں پڄ ویسن ،پاکستان دی ایکویٹی مارکیٹ ڈالر دے لحاظ نال 87 فیصد منافع ݙتے ۔ وزیرخزانہ اپݨے مضمون اچ لکھیے جو بین الاقوامی سطح تے پاکستان دی ترقی کوں منیا ڳئے ترائے عالمی کریڈٹ ریٹنگ ایجنسیاں ملک دی خودمختار درجہ بندی کوں اپ گریڈ کیتے،موڈیز ساݙے پالیسی اقدام دے اثرات کوں منیندے ہوئیں ستمبر 2024 اچ پاکستان دے معاشی نقطہ نظر کوں ‘مثبت’ تے نظرثانی کیتی،اہم کامیابیاں دے باوجود چیلنجز بدستور موجود ہن، ٻاہرلی امداد تے انحصار گھٹ کرݨ سانڳے پاکستان محصولات دی وصولی، توانائی، سرکاری اداریں تے نجکاری اچ ساختی رکاوٹاں کوں ہٹاوݨا پوسی ۔ انہاں آکھیے پاکستان علاقائی استحکام اتےعالمی اقتصادی ترقی اچ آپݨا کردار نبھیندا رہسی