سپریم کورٹ اچ بنچزدے اختیارات بارےکیس اچ توہین عدالت دے معاملے دی سماعت

اسلام آباد۔21جنوری(اے پی پی) سپریم کورٹ اچ بنچزدے اختیارات بارے کیس اچ توہین عدالت دے معاملے دی سماعت جسٹس منصور علی شاہ دی سربراہی اچ 2رکنی بنچ کیتی ۔ سماعت اچ ایڈیشنل رجسٹرار عدالت کوں ݙسائے پروسیجر کمیٹی کیس آئینی بنچ کوں بھجوا ݙتے ۔ 21 ویں ترمیم دے بعد کمیٹی فیصلہ کریندی اے جو کیڑھا کیس آئینی بینچ دے سامݨے طے کیتا ویسی تے کیڑھا ریگولر بنچ دے سامݨے؟جسٹس منصور علی شاہ آکھیے جݙاں کوئی کیس بنچ دے سامݨے آندے ، غلطی نال وی ، تاں باقی معاملہ بنچ کنے ہوندے تے انتظامی کمیٹی ایں کوں واپس نی گھن سڳدی۔ایڈیشنل رجسٹرار عدالت دے سامݨے دلائل ݙیندے آکھیے کمیٹی بنچاں دے سامݨے مقدمے طے کریندی اے تے انہاں کوں واپس وی گھن سڳدی اے ۔ جسٹس منصورعلی ریمارکس ݙتے جو اے فیصلہ عدالت کریسی جو کمیٹی کیس واپس گھن سڳدی اے یا کائناں ؟ اساں رجسٹرار جوڈیشل توں سݨݨ چاہندے ہاسے تے تساں انتظامی او ۔بیرسٹر صلاح الدین آکھیے کمیٹی یا سپریم کورٹ دا ریسرچ سیل کہیں خاص بنچ دے سامݨے کیس طے کرݨ سانڳے صرف نوٹ لکھ سڳدے لیکن حتمی فیصلہ عدالت کریندی اے ۔ سندھ ہائی کورٹ اچ اے ھک معمول دا معاملہ اے جتھاں باقاعدہ اتے آئینی بنچ تقریباً روزانہ دی بنیاد تے ھک ݙوجھے کوں کیس بھڄیندن ۔عدالت سماعت ٻدھ تئیں ملتوی کریندے سینئر ایڈووکیٹ سپریم کورٹ حامد خان اتے منیر اے ملک کوں باقاعدہ بنچاں دے دائرہ اختیار متعلق سوالاں تے عدالت دی معاونت سانڳے مقرر کرݙتے جݙاں جو عدالت اٹارنی جنرل پاکستان کوں وی عدالت اچ پیش تھیوݨ دی ہدایت کیتی۔