چین پاکستان اقتصادی راہداری دے ݙوجھے مرحلے اچ بزنس ٹوبزنس تے توجہ رہسی ، وزیرخزانہ

اسلام آباد۔22جنوری(اے پی پی) وفاقی وزیرخزانہ و محصولات سینیٹر محمد اورنگزیب آکھیے چین پاکستان اقتصادی راہداری دے ݙوجھے مرحلے اچ حکومتی سطح دی بجائےبزنس ٹوبزنس تے توجہ رہسی ، سی پیک فیزٹو اچ چینی کمپنیاں کوں پیداواری یونٹس پاکستان منتقل کرݨ تے قائل کیتا ویسی اے ڳالھ انہاں ڈیووس اچ  ورلڈ اکنامک فورم تے ترقی پذیر معیشتاں تے عالمی قرضے دے ودھدے ٻوجھ دے موضوع تے اعلیٰ سطحی مذاکرے توں بطور پینلسٹ خطاب کریندے آکھی ۔ وزیر خزانہ مالیاتی پالیسیاں اچ تبدیلی اتے قرضے اچ پائیداری دے ذریعے تکڑے تے لچکدار معیشتاں دے قیام تے نقطہ نظر بیان کیتا۔ انہاں آکھیے پاکستان دا ساریں توں وݙا مسئلہ کرنٹ اکاؤنٹ اتے فسیکل اکاؤنٹ دا جڑواں گھاٹا رہیے ۔ فسکل گھاٹے دی ساریں توں وݙی وجہ 9 توں 10 فیصد غیر پائیدار ٹیکس ٹو جی ڈی پی شرح اے۔ ڈھانچہ جاتی اصلاحات پاروں ٹیکس ٹو جی ڈی پی شرح کوں 13 فیصد تئیں گھن ونجݨ دی کوشش جاری اے ۔  وزیر خزانہ اورنگزیب آکھیے ٹیکس ٹو جی ڈی پی شرح ودھائے بنا قوماں تے برادری اچ باعزت مقام گھنݨ نا ممکن اے۔ حکومت اپݨے خرچے گھٹاوݨ تے قرضے دی ادائیگی دا حجم گھٹ کرݨ سانڳے کوششاں کریندی پئی اے ۔ آپݨا گھر ٹیک کیتے بغیر قرضے دے ٻوجھ توں جند چھڑاوݨ اوکھی اے ۔ انہاں آکھیے پاکستان اچ قرض ٹو جی ڈی پی شرح 78 فیصد توں گھٹ تے 67 فیصد تے آڳئی اے ۔ قرض گھنݨ خراب کائنی قرض دا صحیح استعمال ضروری اے۔ قرضیں توں خرچے چلاوݨ یا سبسڈیز ݙیوݨ دی بجائے پیداواری صلاحیت ودھا تے برآمدات ودھاوݨی چاہیدی اے ۔ پاکستان دی معاشی ترقی لہہ چڑھ دا شکار رہی اے۔  وزیر خزانہ آکھیے جی ڈی پی دی شرح نمو 4 فیصد تھیندے ہی معیشت دے درآمدات تے انحصار پاروں ادائیگیاں دا توازن وڳڑ ویندے ۔ چینی کمپنیاں پاکستان کوں آپݨی برآمدات دا مرکز بݨا سڳدن ۔ پاکستان پانڈا بانڈ دے ذریعے دنیا دی ساریں توں وݙی تے چینی کیپیٹل مارکیٹ تئیں رسائی چاہندے ۔ پاکستان مصر دے تجربے توں سکھ تے کیپٹل مارکیٹ دی رسائی اچ تنوع اتے کریڈٹ ریٹنگ اچ چنڳائی چاہندے ۔ پاکستان دے آئی ٹی شعبہ اچ نینگراں سانڳے ٻہوں موقع موجود ہن ۔ پاکستانی نینگراں کوں دنیا اچ چنڳیاں ملازمتاں ملݨ چنڳی ڳالھ اے نینگراں سانڳے ملک اچ ملازمتاں دے چنڳے موقع بماوݨ دی سعی جاری اے۔ پائیدار پالیسی فریم ورک اتے پالیسی تسلسل دے ذریعے نجی شعبے اچ ملازمتاں دے مواقع بݨسن۔