وزیرِ اعظم دی صدارت اچ اجلاس، جدید  زرعی تربیت دی خاطر چین  بھیڄݨ سانڳے طالبیں دے انتخاب اچ میرٹ کوں اولین ترجیح ݙیوݨ دی ہدایت

اسلام آباد۔22جنوری(اے پی پی) وزیراعظم محمد شہباز شریف چین اچ زرعی شعبے دی تربیت سانڳے بھیجے ونڄݨ آلے طالبیں دے انتخاب اچ شفافیت اتے میرٹ کوں اولین ترجیح ݙیوݨ دی ہدایت کریند آکھیے پاکستانی طلبا تے طالبات دی چین اچ جدید زرعی تربیت دا پورا خرچ حکومت پاکستان چیسی ۔وزیراعظم دفتر میڈیا ونگ موجب وزیرِاعظم محمد شہباز شریف دی صدارت اچ چین اچ جدید زراعت دی تربیت گھنݨ سانڳے ونجݨ آلے پاکستانی طلبا و طالبات دے حوالے نال جائزہ اجلاس تھیا ۔اجلاس اچ وفاقی وزرا  احسن اقبال، رانا تنویر حسین، احد خان چیمہ، چیئرمین ہائر ایجوکیشن کمیشن اتے متعلقہ اعلیٰ حکام شرکت کیتی۔ وزیرِ اعظم پورٹل دے ذریعے درخواستاں دی سکروٹنی دے دوران سلیکشن دے معیار تے پورا نہ لہݨ آلے طالبیں دی شکایت دے ازالے سانڳے کمیٹی بݨاوݨ دی ہدایت کیتی تے آکھیے جو چین پاکستان دا پراݨا دوست اے جیں دی زرعی شعبے اچ ترقی بے مثال اے ۔ آپݨے دورہ چین دے دوران چینی قیادت نال زرعی شعبے اچ پاکستانی طلبا دی جدید تربیت دی درخواست کیتی ہئی ۔ اللہ دے فضل و کرم نال ٻہوں وختی طلبا تے طالبات دا پہلا بیچ زراعت دے شعبے اچ جدید تربیت سانڳے چین روانہ تھیسی ۔ وزیر اعظم آکھیے زرعی شعبے دی جدید تربیت سانڳے چین ونڄݨ آلے طالبیں اچ 10 فیصد خصوصی کوٹہ بلوچستان دے طلبا سانڳے رکھیا ڳئے۔  چینی قیادت اتے چینی یونیورسٹیاں دے شکر گزار ہیسے انہاں پاکستانی طالبیں کوں چین اچ زراعت دی جدید تربیت دا موقع ݙتا۔  اجلاس اچ وزیرِ اعظم کوں ݙسایا ڳئے جو زرعی شعبے توں تعلق رکھݨ آلے طالبیں تے طالبات شفاف طریقے نال پورٹل تے درخواستاں جمع کرائن ۔  1287 درخواستاں اچوں 711 طلبا و طالبات تربیت دے طے کیتے ڳئے معیار تے پورے لتھن ۔ انہاں طلبا تے طالبات اچ بلوچستان اتے گلگت بلتستان دے امیدوار وی شامل ہن۔ اجلاس کوں مزید ݙسایا ڳئے جو انہاں طالبیں کوں ݙو بیچز اچ چین بھیڄا ویسی ۔ پہلی کھیپ اچ 300 طلبا تے طالبات آبپاشی اچ بہتری، مال ڈھور اچ بیماریاں دی تشخیص و نگرانی، مال ڈھور دی افزائش نسل و جدید جینیات اتے جدید بج دی تیاری تے انہاں دی پراسیسنگ دے شعبیں اچ تربیت سانڳے بھیڄا ویسی ۔ طلبا تے طالبات دی پہلی کھیپ مارچ 2025 اچ چین روانہ تھیسی ۔اجلاس کوں مزید ݙسایا ڳئے جو 400 طالبیں دی ݙوجھی کھیپ کھیپ اڄوکے سال دے ادھ اچ چین بھیڄی ویسی جیڑھی جو زراعت اچ جدید مشینری دے استعمال، فصلاں دی تکھے افزائش، زراعت اچ جدید ٹیکنالوجی بشمول مصنوعی ذہانت دا استعمال اتے پھل تے سبزیاں دی پراسیسنگ دے شعبیں اچ تربیت ݙتی ویسی۔