پاک بحریہ 32ویں نیشنل شوٹنگ چیمپیئن شپ 2025 دا ٹائٹل اپݨے ناں کرڳھدا

کراچی۔ 22 جنوری(اے پی پی) پاک بحریہ 32ویں نیشنل شوٹنگ چیمپیئن شپ 2025 دا ٹائٹل اپݨے ناں کرڳھدا۔ جاری اعلامیہ موجب 32ویں نیشنل شوٹنگ چیمپئن شپ دی اختتامی تقریب پاکستان نیوی شوٹنگ رینج کراچی اچ تھئی ۔ پاک بحریہ دے سربراہ ایڈمرل نوید اشرف تقریب اچ بطور مہمان خصوصی شرکت کیتی۔ پاک بحریہ دی ٹیم 32ویں نیشنل شوٹنگ چیمپیئن شپ 2025 دا ٹائٹل 20 طلائی، 17 چاندی اتے 5 کانسی دے تمغیں نال آپݨے ناں کر ڳھدا جݙاں جو پاکستان آرمی دی ٹیم ݙوجھی پوزیشن ڳھدی ۔ پاک بحریہ دے مقبول حسین اتے رسم گل بالترتیب مَرداں اتے تریمتاں دی کیٹیگریز اچ مجموعی طور تے بہترین شوٹردا اعزاز ڳھدے ۔ ایں توں انڄ ، چیمپئن شپ دے دوران پسٹل، رائفل اتے شاٹ گن کیٹیگریزاچ 7 نویں قومی ریکارڈ وی بݨائے ڳئن ۔چیف آف دی نیول اسٹاف چیمپئن شپ اچ حصہ گھنݨ آلے کھلاڑیاں دی تعریف کیتی تے بہترین کاکردگی ڈکھالݨ آلیں کوں میڈلز اتے ٹرافیاں ݙتن ۔انہاں منتظمین اتے سپانسرز دیاں کوششاں تے پاکستان توں آئے شوٹرز دی شرکت دی وی تعریف کیتی مہمان خصوصی ایں ڳالھ تے روشنی پاتی جو پاکستان نیوی شوٹنگ رینج اچ جدید ترین سہولتاں شوٹنگ شائقین سانڳے ہمیشہ دستیاب ہن تے امید ظاہر کیتی جو وختی ایہو کھلاڑی بین الاقوامی سطح تے پاکستان دا ناں اُچا کریسن ۔ ھک ہفتہ جاری رہݨ آلی چیمپئن شپ اچ نیشنل رائفل ایسوسی ایشن آف پاکستان دے اہتمام نال  انٹرنیشنل شوٹنگ اسپورٹس فیڈریشن دے قوانین موجب پسٹل، رائفل اتے شاٹ گن کیٹیگریزاچ کل 16 ایونٹس دا مقابلہ تھئے۔ چیمپئن شپ اچ پاکستان آرمی، پاکستان نیوی، پاکستان ایئرفورس، پاکستان پولیس، واپڈا، سندھ، پنجاب، بلوچستان، خیبرپختونخوا دی صوبائی ٹیماں، ہائر ایجوکیشن کمیشن، فیڈرل رائفل ایسوسی ایشن آف پاکستان اتے پاکستان دے مختلف شوٹنگ کلبز دے تقریباً 350 شوٹرز حصہ ڳھدا۔تقریب اچ سول اتے ملٹری حکام، شوٹنگ دے شائقین تے میڈیا چینلز وݙی تعداد اچ شرکت کیتی۔