حکومت میڈیا دی تعمیری تنقید داخیرمقدم کریندی اے ، وزیراعظم شہباز شریف 

اسلام آباد۔23جنوری(اے پی پی) وزیراعظم محمد شہباز شریف آکھیے حکومت میڈیا دی تعمیری تنقید داخیرمقدم کریندی اے ، حکومتی پالیسیاں تے تعمیری تنقید گورننس دی بہتری سانڳے ٻہوں ضروری اے ۔ اے ڳالھ انہاں پاکستان براڈکاسٹرز ایسوسی ایشن دے وفد کوں ڳالھ مہاڑ کریندے آکھی جنھاں اتھاں وزیراعظم نال ملاقت کیتی۔  وزیراعظم دفتر میڈیا ونگ موجب وزیراعظم وفد  کوں ڳالھ کریندے آکھیے حکومت اتے میڈیا دا سانجھے اعتماد دا رشتہ اے،حکومتی پالیسیاں تے میڈیا دی تعمیری تنقید گورننس دی بہتری سانڳے ٻہوں ضروری اے ، حکومت میڈیا دی تعمیری تنقید دا خیر مقدم کریندی اے ، ملک اچ  اظہارِ رائے دی مکمل آزادی اے اتے حکومت میڈیا دے ریاست دا چوتھا ستون ہووݨ تے یقین رکھیندی اے ۔ وزیراعظم آکھیے اڑان پاکستان مقامی طور تے تیارکیتا ڳیا ملکی ترقی دا منصوبہ اے جیں کوں میڈیا اتے سارے اسٹیک ہولڈرز دے تعاون نال کامیاب بݨٰسوں اللہ دے فضل و کرم نال ملکی استحکام دے بعد پاکستان دی ترقی دی رفتار 2018 تے جتھاں روکی ڳئی اتھوں ول شروع تھی چکی اے ۔ پاکستان میاں محمد نواز شریف دی قیادت اچ ترقی دا سنہری دور ݙٹھے تے اڄ وی انہاں دی قیادت اچ معاشی استحکام دے بعد ترقی دا سفر زور و شور نال جاری اے ۔  وزیرِاعظم آکھیے دوست اتے بھرا ملکاں دے ٻہوں شکرگزار ہیسے انہاں دے تعاون نال پاکستان ڈیفالٹ تھیوݨ دے دہانے توں واپس آتے معاشی ترقی دے پاسے ٹریا ، ملک اچ مہانگ دی شرح تے شرح سود اچ کمی دا سہرا معاشی ٹیم دی محنت کوں ویندے ، برآمدات اچ ودھارا ، صنعتی و زرعی شعبے دی ترقی حکومت دی کاروبار دوست پالیسیاں پاروں ملدی پئی اے تے ایف بی آر اچ اصلاحات دا نفاذ  اتے مکمل ڈیجیٹائیزیشن تے کم تکھے جاری اے ۔ کسٹمز دے نظام دی بہتری سانڳے فیس لیس اسیسمنٹ دا نظام شروع کیتا ڳئے، ایں ںظام توں محصولات اچ ودھارے دے نال نال شفافیت اچ ودھارا تے کرپشن مکاوݨ اچ معاونت ملسی ۔  وزیرِاعظم آکھیے پٹرولیم مصنوعات، کھنڈ ، کھاد اتے اٹے دی سمگلنگ روکݨ توں قومی خزانے کوں فیدہ تھئے ۔ ترسیلاتِ زر اچ ودھارا ٻاہرلے ملک رہݨ آلے پاکستانیاں دے حکومتی پالیساں تے اعتماد اچ ودھارے کوں ظاہر کریندے ۔ وزیرِاعظم آکھیے دوست ملکاں نال تعلقات اچ ودھارا تے سفارتی محاذ تے کامیابیاں دا سلسلہ جاری اے ،اللہ دے فضل و کرم نال پاکستان دا عالمی منظر نامے تے تشخص بحال کیتے۔  وزیرِاعظم آکھیے دہشتگردی دے خلاف  جنگ اچ پوری قوم قربانی ݙتی ،افواج پاکستان سودھے پوری قوم ایں ناسور دے ملک توں منڈھوں خاتمے تئیں ایں دے خلاف جنگ جاری رکھیسی۔  وزیرِاعظم آکھیے چین پاکستان اقتصادی راہداری دے ثمرات ملݨ شروع تھی ڳئن ، میاں محمد نواز شریف اتے چینی صدر شی جن پنگ دا پاکستان تے خطے دی ترقی دا خواب تعبیر دے بالکل نیڑے ہے ، پاکستان دے ڈیفالٹ دے خواب ݙیکھݨ آلا ملک دشمن مخصوص ٹولہ ول ول اسلام آباد تے چڑھائی دی کوشش کریندے ، ایجھے عناصر کوں پاکستان دا معاشی استحکام اتے ترقی ہضم کرݨ اوکھا تھیندا پئے ، اساں پاکستان دی معاشی سلامتی سانڳے اپݨی سیاست دی قربانی ݙتی ،  ملک دی ترقی سانڳے ݙینھ رات مصروف رہسوں ، انہاں باصلاحیت نینگراں تے افرادی قوت کوں پاکستان دا ساریں توں وݙا اثاثہ قرار ݙیندے آکھیے نینگراں کوں بین الاقوامی معیار دی تعلیم و تربیت دیاں سہولتاں تے ھکو سویں ترقی دے موقع ݙیوݨ ساݙی اولین ترجیح اے ۔ وفد دے شرکا معاشی اشاریے بہترتھیوݨ کوں چنڳاں قرار ݙیندے آکھیے میڈیا ملکی ترقی اتے گورننس دی بہتری اچ آپݨا مثبت کردار نبھیندا رہسی ۔ وفد بجلی دیاں قیمتاں گھٹ کرݨ تے بجلی دے شعبے اچ اصلاحات سانڳے آئی پی پیز نال حکومتی معاملات کوں چنڳے طریقے نال طے کرݨ تے وزیرِاعظم دیاں کوششاں دی تعریف کیتی۔ وفد دے ارکان آکھیے ملک کوں سیاسی استحکام دی لوڑھ اے، حکومت ایں ضمن اچ آپݨا مثبت کردار نبھاوے۔ ایں موقع تے وفاقی وزیرِ اطلاعات و نشریات عطاء اللہ تارڑ، وزارتِ اطلاعات دے اعلیٰ افسران، چیئرمین پاکستان براڈ کاسٹرز ایسوسی ایشن میاں عامر محمود، میر ابراہیم، ناز آفرین سہگل، سلطان لاکھانی، سلمان اقبال، شکیل مسعود، ندیم ملک اتے کاظم خان  موجود ہن