بانی چیئرمین پی ٹی آئی کوں جیل اچ او ساریاں سہولتاں ملدیاں پئن جیڑھیاں کہیں عام قیدی کوں نی ملدیاں ، وفاقی وزیر اطلاعات عطاء اللہ تارڑ

اسلام آباد۔23جنوری(اے پی پی) وفاقی وزیر اطلاعات، نشریات، قومی ورثہ و ثقافت عطاء اللہ تارڑ آکھیے بانی چیئرمین پی ٹی آئی کوں جیل اچ او ساریاں سہولتاں ملدیاں پئن جیڑھیاں کہیں عام قیدی کوں نی ملدیاں ، پی ٹی آئی دور اچ مسلم لیگ (ن) دی قیادت کوں سیاسی انتقام دا نشانہ بݨایا ڳیا، اوں ویلھے دے اپوزیشن لیڈر کوں جیل اچ پکھا تے ہیٹر تئیں چلاوݨ نہ ݙتا ویندا ہئی ، بانی چیئرمین کوں ایکسرسائز سانڳے سائیکل، کچن اتے واکنگ گیلری دی سہولت ݙتی ڳئی اے ، جیڑھے کݙاہیں آکھدے ہن جو این آر او نہ منڳسوں ، سختی کٹیسوں ، انہاں عدالتاں کوں ول ول درخواستاں کرتے سہولتاں ڳھدن ۔ قومی اسمبلی اجلاس اچ سوالاں دے وقفے اچ رکن قومی اسمبلی آغا رفیع اللہ دے سوال دے جواب اچ وفاقی وزیر اطلاعات آکھیے پی ٹی آئی دور اچ مسلم لیگ (ن) دی قیادت کوں سیاسی انتقام دا نشانہ بݨایا ڳیا، مسلم لیگ (ن) دے رہنماواں بہادری نال ظلم برداشت کیتا ، انہاں آکھیے خواجہ آصف کوں دسمبر دی سردی اچ کوٹ لکھپت جیل اچ منتقل کیتا ڳیا تے اوں ویلھے وزیراعظم آفس اچ بݨیے سیل توں حکم ݙتا ویندا جو انہاں کوں فرش تے سمایا ونڄے ، انہاں کوں کمبل تئیں نہ ݙتا ویندا ہئی ۔ اوں ویلھے دے اپوزیشن لیڈر جیڑھے ترائے واری پنجاب دے وزیراعلیٰ رہیے، سانڳے حکم آندا جو انہاں کوں جیل اچ پکھا نہ چلاوݨ ݙتا ونڄے، پالے اچ ہیٹر نہ ݙتا ونڄے جݙاں جو بانی چیئرمین پی ٹی آئی کوں ہݨ ایکسرسائز کیتے سائیکل ݙتی ڳعی اے ، کچن دی سہولت اتے رہائش سانڳے کمرہ ݙتا ڳعے، واکنگ گیلری اتے ایکسرسائز روم دی سہولت ݙتی ڳئی اے ۔ ا ساریاں سہولتاں کہیں عام قیدی کوں نی ملدیاں لیکن بانی چیئرمین پی ٹی آئی عدالتاں کوں ول ول درخواستاں کرتے اے سہولتاں گھن ڳھدن ۔ اے کݙاہیں آکھدے ہن جو این آر او نہ منڳسوں سختی کٹیسوں تے اڄ انہاں سہولتاں توں فیدہ چیندے پئن ۔ او کݙاہیں مریم نواز دا سیل ݙیکھ گھندے جنہاں کو 6×10 سائز دے سیل اچ رکھیا ڳیا ہئی ، انہاں آکھیے بانی چیئرمین پی ٹی آئی کوں جیل اچ بہترین شیف ݙتا ڳئن ، کہیں ݙوجھے قیدی کوں اے سہولت کائنی ملی جیڑھی بانی چیئرمین پی ٹی آئی کوں ملدی پئی اے