چیف جسٹس آف پاکستان تقرریاں اچ شفافیت تے میرٹ برقرار رکھݨ سانڳے سینئر ججاں تے اٹارنی جنرل فار پاکستان تے مشتمل کمیٹیاں بݨاݙتن

اسلام آباد۔23جنوری(اے پی پی) چیف جسٹس آف پاکستان جسٹس یحییٰ آفریدی تقرریاں اچ شفافیت اتے میرٹ کوں برقرار رکھݨِ سانڳے اہم تقرریاں دی چوݨ دی نگرانی سانڳے سینئر ججاں تے اٹارنی جنرل فار پاکستان تے مشتمل کمیٹیاں بݨاݙتن ۔ جنھاں اچ لاءاینڈ جسٹس کمیشن آف پاکستان، جوڈیشل کمیشن دے سیکریٹریز شامل ہن ۔ لا اینڈ جسٹس کمیشن آف پاکستان دے سیکرٹری دی چوݨ سانڳے بݨائی ڳئی کمیٹی چیف جسٹس یحییٰ آفریدی دی سربراہی اچ بݨائی ڳئی اے تے ایں وچ جسٹس عائشہ ملک اتے جسٹس شاہد وحید شامل ہن جیڑھے جو صوبیں دے چیف سیکرٹریز دے نامزد کیتے ڳئے امیدواراں دے انٹرویوز کریسن۔ سپریم کورٹ آف پاکستان دے شعبہ تعلقات عامہ دے جاری اعلامیہ اچ آکھیا ڳئے جو آپݨی عدالتی اصلاحات دے ھک حصے دے طور تے چیف جسٹس یحییٰ آفریدی عدلیہ کوں جدید بݨاوݨ تے ایں کوں ھک ماڈل ادارے دے طور تے بݨاوݨ سانڳے عدلیہ دے معیارات تے پورا لہݨ سانڳے انصاف، شفافیت اتے رسائی برقرار رکھیندے اصلاحات کیتن ۔ انھاں دا مقصد ایں ڳالھ کوں یقینی بݨاوݨ اے جو نظام انصاف شہریاں تے مرکوز اتے مدعی دی لوڑھ سانڳے جوابدہ رہسی۔ایں سلسلے اچ عدالتی کارکردگی ودھاوݨ سانڳے جدید انفارمیشن ٹیکنالوجی دے نظام کوں جوڑیا ڳئےجیں اچ ای-حلف نامہ سسٹم شامل اے، جیڑھا فائلنگ دے عمل کوں ہموار کریندے، دیر کوں گھٹ کریندے تے شفافیت یقینی بݨیندے ۔ کیس مینجمنٹ سسٹم جیڑھے جو مدعی اتے وکلاء کوں وختی تصدیق شدہ کیس دی کاپیاں تئیں رسائی گھنݨ دے قابل بݨیندے ۔ ضلعی عدلیہ دے اہم کردار کوں منیندے چیف جسٹس تلویں سطح تے درپیش چیلنجز دا جائزہ گھنݨ ، ادارہ جاتی صلاحیت کوں ودھاوݨ وسائل دی کمی دور کرݨ ، انصاف تئیں مساوی رسائی یقینی بݨاوݨ تے عدالتی نظام تے عوام دے اعتماد کوں تکڑا کرݨ سانڳے ذاتی طور تے پرے تے پسماندہ ضلعیں دا دورہ کیتے ایویں جوڈیشل کمیشن آف پاکستان دے سیکرٹری دی چوݨ سانڳے کمیٹی جسٹس سید منصور علی شاہ، جسٹس منیب اختر، جسٹس امین الدین خان اتے جسٹس جمال خان مندوخیل تے مشتمل اے۔ سپریم جوڈیشل کونسل دے سیکرٹری سانڳے کمیٹی اچ جسٹس سید منصور علی شاہ، جسٹس منیب اختر اتے اٹارنی جنرل پاکستان شامل ہن ۔ اے کمیٹیاں پنج ہائی کورٹس دے چیف جسٹسز تے صوبیں دے چیف سیکرٹریز دے نامزد کیتے ڳئے حاضر سروس اتے ریٹائرڈ ڈسٹرکٹ اینڈ سیشن ججاں سودھے امیدواراں دا انٹرویو کریسن