پیکا ایکٹ ترمیمی ٻل دا دائرہ کار ڈیجیٹل میڈیا تئیں محدود اے، ایں توں ورکنگ جرنلسٹس متاثر نہ تھیسن ، وفاقی وزیر اطلاعات عطاءاللہ تارڑ

اسلام آباد۔23جنوری(اے پی پی) وفاقی وزیر اطلاعات، نشریات، قومی ورثہ و ثقافت عطاءاللہ تارڑ پیکا ترمیمی ایکٹ کوں صحافیاں دے تحفظ دے پاسے اہم قدم قرار ݙیندے آکھیے پیکا ایکٹ ترمیمی ٻل دا دائرہ کار ڈیجیٹل میڈیا تئیں محدود اے ایں توں ورکنگ جرنلسٹس متاثر نہ تھیسن ، الیکٹرانک اتے پرنٹ میڈیا متعلق قواعد پہلے توں موجود ہن ، ڈیجیٹل میڈیا دے قواعد ویلھے دی لوڑھ ہن ، ڈیجیٹل میڈیا تے صحافت دے ناں تے الزام تراشی اتے کوڑ کھنڈایا ویندا پئے ۔ پارلیمنٹ ہائوس دی پریس گیلری اچ میڈیا نال ڳالھ مہاڑ کریندے وفاقی وزیر اطلاعات و نشریات آکھیے الیکٹرانک اتے پرنٹ میڈیا متعلق قواعد و ضوابط پہلے توں موجود ہن ، کونسل آف کمپلینٹس موجود اے، الیکٹرانک میڈیا پیمرا دے زمرے اچ آندے لیکن ڈیجیٹل میڈیا تے کہیں قسم دا کوئی قانون لاگو کائناں ہئی ایں سانڳے ڈیجیٹل میڈیا بارے قواعد ویلھے دی لوڑھ ہن ، ڈیجیٹل میڈیا تے صحافت دے ناں تے الزام تراشی کیتی ویندی اے تے کوڑ کھنڈایا ویندے ، کوئی بندہ کہیں کوں واجب القتل قرار ݙیوے یا جو مرضی کرے، ایں تے کہیں قسم دا کوئی قانون لاگو نہ تھیندا ہئی ۔ انہاں آکھیے پیکا ایکٹ ترمیمی ٻل اچ سوشل میڈیا دی تعریف وضع کیتی ڳئی اے ، پیکا ایکٹ ترمیمی ٻل دا دائرہ کار ڈیجیٹل میڈیا تئیں محدود اے، ایں اچ کتھاں لکھیے جو اے ٻل ورکنگ جرنلسٹس دے خلاف بݨیے یا الیکٹرانک میڈیا اتے پرنٹ میڈیا تے سختی ہوسی؟ انہاں آکھیے پریس کلب یا کہیں صحافتی تنظیم دی رکنیت دے بغیر صحافت دے ناں تے ڈیجیٹل میڈیا تے کجھ لوک کیمرہ کڈھ تے آپݨے ویوز ریکارڈ کرگھندن انہاں سانڳے کوئی تاں پلیٹ فارم ہوسی جیں کوں او جوابدہ ہوسن ۔ جے کہیں اخبار دے صحافی دے بقایا جات دی ادائیگی اچ دیر تھیندی تاں ایں دی شکایت آئی ٹی این ای سݨدے لیکن ڈیجیٹل میڈیا تے کوئی کہیں کوں واجب القتل قرار ݙے ݙیوے یا کہیں تے توہین مذہب دا الزام لاوے تاں کوئی اتھارٹی ایں دا نوٹس نی گھن سڳدی ، پہلی واری سوشل میڈیا دی تعریف بیان کیتی ڳئی اے ، ہر آن لائن پلیٹ فارم یا ویب ایپلی کیشن جیں دے ذریعے کوئی وی معلومات کھنڈائی ویندی اے یں کوں سوشل میڈیا دے طور تے ڈیفائن کیتا ڳئے ۔ وفاقی وزیر آکھیےالیکٹرانک اتے پرنٹ میڈیا سانڳے ھک نظام موجود اے ، پیمرا دی شکایات کونسل موجود اے، پرنٹ میڈیا دے اپݨے فورمز موجود ہن لیکن اے ٻل ڈیجیٹل میڈیا سانقے ہے، ایں توں الیکٹرانک اتے پرنٹ میڈیا دی اسپیس ودھسی ۔ صحافت دے پیشہ توں منسلک کوئی وی بندہ ایں ٻل توں متاثر نہ تھیسی ، سوشل میڈیا تے تھیوݨ آلے جرائم روکݨ ایف آئی اے دا کم کائنی، ایں سانڳے نیشنل سائبر کرائم ایجنسی گھن آئی ویندی پئی اے جیں اچ حالی وقت لڳسی ایندے رولز ساریں دی مشاورت نال بݨائے ویسں ۔ ڈیجیٹل پروٹیکشن اتھارٹی اچ ھک رکن پریس کلب یا کہیں میڈیا ادارے توں ہوسی ، ایں اتھارٹی اچ ورکنگ جرنلسٹس کوں تحفظ ضرور ملسی لیکن کہیں ورکنگ جرنلسٹس کوں ٹارگٹ کرݨ دے حوالے نال کوئی شق موجود کائنی ۔ وفاقی وزیرآکھیے اے کتھاں دا انصاف اے جو الیکٹرانک میڈیا سانڳے ریگولیٹری اتھارٹی موجود ہووے تے ایں دی اسپیس سکڑ ونڄے تے او تنخواہیں اتے مراعات ادا نہ کرسڳن ، چینلز بند تھیوݨ دے نیڑے آوںجن ، اخباراں دی سرکولیشن گھٹ تھیندے تھیندے او غیر فعال تھی ونڄن لیکن ڄیں کنے ھک کیمرہ ہووے او سوشل میڈیا تے لکھاں روپے کماوے تے ٹیکس وی نہ ݙیوے ۔ وفاقی وزیر اطلاعات آکھیے سوشل میڈیا تے ھک بندے قاضی فائز عیسیٰ دے سر دی قیمت مقرر کرݙتی کیا ایں کوں سزا ملی ؟ کیا ایف آئی اے اتے پولیس دی اتنی کپیسٹی ہئی جو او ایندے خلاف کاروائی کریندے ؟ انہاں آکھیے جیڑھا مواد کتھائیں نی چلدا او ڈیجیٹل میڈیا تے چلا ݙتا ویندے ۔ وفاقی وزیر آکھیے ایں توں پہلے سوشل میڈیا دی تعریف کتھائیں کائناں ہئی ، پہلی واری ویب ایپلی کیشن، موبائل ایپلی کیشن، آن لائن پلیٹ فارم دی تعریف بیان کیتی ڳئی اے ، اتھارٹی دے قیام دے بعد انوسٹی گیشن ایجنسی بݨسی ، ایں دے رولز بݨݨ نال سسٹم اچ مزید بہتری آسی ۔ پیکا ایکٹ ترمیمی ٻل پر مشاورتی عمل کوں اڳوں گھن ونڄݨا ہوسی ، پی آر اے، جوائنٹ ایکشن کمیٹی، پی بی اے، اے پی این ایس، سی پی این ای، این پی سی ساریں کوں دعوت ݙینداں جو آون ایں تے ٻہہ تے ڳالھ کروں ایں ٻل کوں پڑھن اے ٻل ہے کیا کیا اے ٻل صحافیاں دے تحفظ سانڳے ہے یا انہاں کوں ٹارگٹ کرݨ سانڳے ۔ اے ٻل صرف ڈیجیٹل میڈیا سانڳے ہے جیڑھا بغیر کہیں رولز دے چلدے پئن ٻل تے مشاورت سانڳے ہر ویلھے تیار ہیسے ، رولز اچ گنجائش موجود اے۔ عطاءاللہ تارڑ آکھیے ایف آئی اے وائٹ کالر کرائم کوں ڈیل کریندی اے ڈیجیٹل کرائم کوں ݙیکھݨ ایف آئی اے دی کپیسٹی کائنی ، ایں سانڳے انڄ توں خاص نظام گھن آوݨ دی لوڑھ اے ، ڈیجیٹل میڈیا تے کجھ لوک خود کوں صحافی ظاہر کتے نفرت کھنڈیندے پئن ایں ٻل توں ایں طرح دیاں کارروائیاں روکݨ اچ مدد ملسی ۔ وفاقی وزیر آکھیے ٹی وی چینلز تے اخبارات دے ڈیجیٹل پلیٹ فارمز پہلے ہی ادارے دی پالیسی تے عمل کریندن ۔ پیکا ایکٹ ترمیمی ٻل نفرت انگیز تقریراں، تشدد یا کوڑ تے مبنی معلومات روکݨ سانڳے ہے ۔