صدر مملکت آصف علی زرداری اتے آذربائیجان دے وزیرِ دفاعی صنعت، ووگار مصطفیٰ یوف دی ملاقات

اسلام آباد۔23جنوری(اے پی پی) پاکستان تے آذربائیجان تجارت، توانائی، فضائی رابطے اتے عوامی سطح تے تعلقات تکڑے کرݨ دا عزم کیتے ۔ اے ڳالھ ایوانِ صدر اچ صدر مملکت آصف علی زرداری اتے آذربائیجان دے وزیرِ دفاعی صنعت، ووگار مصطفیٰ یوف، وچال ملاقات اچ آکھی ڳئی ، جنہاں آپݨے وفد دے رلے صدر نال ملاقات کیتی۔ایوان صدر دے پریس ونگ موجب صدر مملکت آذربائیجان دے وزیر دا خیرمقدم کریندے پاکستان اتے آذربائیجان دے تاریخی تے گھاٹے تعلقات کوں اجاگر کیتے، انہاں عوامی سطح تے رابطے ، سیاحت دے تعلقات تے تجارتی و کاروباری رابطے ودھاوݨ دی لوڑھ تے زور ݙتا تاں جو علاقائی اقتصادی تعاون کوں ودھایا ونڄ سڳے ۔صدر مملکت ثقافتی رابطے تکڑے کرݨ تے عوامی سطح تے تبادلیں کوں مزید ودھاوݨ سانڳے نویں رستے ڳولݨ دی اہمیت تے زور ݙتا۔ انہاں پاکستان اتے آذربائیجان وچال براہِ راست پروازاں دے آغاز دا خیرمقدم کیتا تے امید ظاہر کیتی ایں توں عوامی تعلقات مزید تکڑے تھیسن ۔ 2024 اچ کاروبار تے سیاحت دی غرض نال 72,000 توں ودھ پاکستانیاں آذربائیجان دا دورہ کیتے ، جیڑھے پچھلے سال دے 55,000 مسافراں دے مقابلے اچ 25 فیصد ودھارا ظاہر کریندے ۔آذربائیجان دے وزیر ݙوہیں ملکاں دے گھاٹے تعلقات تے روشنی پیندے آکھیے آذربائیجان توانائی، کاروبار تے ثقافت دے شعبیں اچ پاکستان نال ݙوپاسے تعاون کوں مزید ودھاوݨ چاہندے ، ݙوہیں ملکاں اوکھے حالات اچ ھک ݙوجھے دی حمایت کیتی تے آذربائیجان دے عوام ہمیشہ پاکستان دی سیاسی حمایت کوں یاد رکھیسن ۔آذربائیجان دے وزیرِ دفاعی صنعت صدرِ پاکستان دی طرفوں پرتپاک استقبال کرݨ تے شکریہ ادا کیتا اتے آذربائیجان دے صدر، الہام علیوف، دی طرفوں صدرِ پاکستان دی صحت، کامیابی، امن تے پاکستان دی خوشحالی سانڳے نیک خواہشات دا سنھیا پڄائے۔