وزیراعظم شہباز شریف انسانی سمگلنگ اچ ملوث گروپاں دے سدباب سانڳے خصوصی ٹاسک فورس بݨاݙتی

اسلام آباد۔24جنوری(اے پی پی) وزیراعظم محمد شہباز شریف پاکستان اچ انسانی سمگلنگ اچ ملوث گروپاں دے سدباب سانڳے خصوصی ٹاسک فورس بݨاوݨ دا اعلان کیتے جو حکومت انسانیت دے قاتلاں کوں توڑ پڄیسی ۔ وزیراعظم دفتر میڈیا ونگ موجب وزیراعظم محمد شہباز شریف دی صدارت اچ غیر قانونی تارکین وطن دی ٻیڑی اچ پاکستانیاں دی اموات دے واقعہ تے ہفتہ وار اجلاس تھئے ۔ وزیراعظم محمد شہباز شریف پاکستان اچ انسانی سمگلنگ اچ ملوث گروپاں دے سدباب کیتے خصوصی ٹاسک فورس بݨاݙتی ، ٹاسک فورس دی سربراہی وزیراعظم خود کریسن ۔ وزیراعظم  اے عزم کیتے جو انسانی سمگلنگ اچ ملوث انسانیت دے قاتلاں کوں توڑ پڄیسی ۔ انہاں ہدایت کیتی جو انسانی سمگلنگ اچ ملوث گروپاں دی گرفتاریاں اچ تیزی گھن آئی ونڄے ، سارے ادارے بشمول وزارت خارجہ انسانی سمگلراں دی نشاندہی اچ آپݨا بھرپور کردار نبھاون۔ وزیراعظم آکھیے غیر قانونی تارکین وطن دی ٻیڑی اچ پاکستانیاں دی اموات دے ݙراکلے واقعہ تے میں سودھے پوری قوم ݙکھی اے ۔ وزیراعظم کوں اجلاس اچ غیر قانونی تارکین وطن دی ٻیڑی اچ پاکستانیاں دی اموات اچ ملوث گروپاں، پاکستان اچ مختلف اداریں دی طرفوں گرفتاریاں، ایف آئی آرز اتے آندے لائحہ عمل تے تفصیلی بریفنگ ݙتی ڳئی ۔ وزیراعظم کوں ݙسیا ڳئے جو ہݨ تئیں6 منظم انسانی سمگلنگ دے گروپاں دی نشاندہی، 12 ایف آئی آرز، 25 ملوث لوکاں دی نشاندہی، 3 اہم لوکاں دی گرفتاری، 16 لوکاں دے ناں پاسپورٹ کنٹرول لسٹ اچ پاتے ڳئن ۔ اجلاس کوں گاݙیاں، بینک اکاؤنٹس اتے اثاثہ جات ضبط کرݨ دی تفصیل دا وی ݙسایا ڳئے ۔ اجلاس کوں ایف آئی اے دے مشتبہ اہلکاراں تے افسراں دی گرفتاریاں تے کارروائی دا وی ݙسایا ڳئے ۔ اجلاس کوں ایں حوالے نال ٻاہرلے ملک ونڄݨ آلی تحقیقاتی کمیٹی دی رپورٹ دا وی ݙسیا ڳئے ۔ وزیراعظم انسانی سمگلنگ دے گروپا ں دی نشاندہی کرتے انہاں کوں عبرتناک سزا ݙیواوݨ دی ہدایت کیتی ۔ اجلاس اچ وفاقی وزرا خواجہ محمد آصف، اعظم نذیر تارڑ، احد خان چیمہ، عطاء اللہ تارڑ، معاون خصوصی طارق فاطمی اتے متعلقہ اعلیٰ حکام شرکت کیتی۔