بجلی دیاں قیمتاں گھٹ تھیوݨ پاروں عوام کوں ملݨ آلا ریلیف فساد پارٹی کوں چنڳاں نی لڳیا ،کے پی حکومت صوبے اچ کرپشن دے ریکارڈ بھن ݙتن،    عظمی بخاری

لاہور۔5اپریل(اے پی پی) صوبائی وزیراطلاعات پنجاب عظمی بخاری آکھیے بجلی دیاں قیمتاں گھٹ تھیوݨ پاروں عوام کوں ملݨ آلا ریلیف فساد پارٹی کوں چنڳاں نی لڳدا، ملک اچ خوشخبریاں دا موسم شروع تھی چکیے ،رمضان سہولت بازار اچ ھک ارب توں ودھ دیاں چیزاں تے عوام کوں بچت تھئی ، کے پی حکومت ملازمین دا پنشن فنڈ ہڑپ کر ڳئی اے ، جنگلات تے قومی خزانے کوں کروڑاں روپے دا ضیان پُجائے ،کݨک مل گھنݨ تے ارباں روپے دی کرپشن کیتی۔اے ڳالھ انہاں ڈی جی پی آر اچ ھک پریس کانفرنس کریندے آکھی، انہاں آکھیے عید الفطر دے بعد وزیراعظم محمد شہبازشریف بجلی دیاں قیمتاں گھٹاوݨ دا اعلان کیتے پنجاب حکومت انھاں دا شکریہ ادا کریندی تے بجلی دیاں قیمتاں اچ اے ریلیف بالکل صحیح ویلھے ݙتا ڳئے جئیں دا گرمی دے موسم اچ عوام کوں فیدہ تھیسی ۔ ایں سلسلے اچ وزیراعظم محمدشہبازشریف اتے انہاں دی باصلاحیت ٹیم بجلی دی قیمتاں اچ ریلیف ݙیوݨ سانڳے آئی ایم ایف کوں منائے جیڑھا جو سوکھا کم کائناں ہئی ، انہاں آکھیے ملک اچ ہݨ خوشخبریاں دا موسم شروع تھی چکیے ، عوام کوں ھک ٻئی خوشخبری وختی ملݨ آلی اے جئیں دا باقاعدہ اعلان وزیراعظم خودکریسن تاں جو یوٹیوبر اتے فساد پارٹی کوں پاکستانی عوام کوں ملݨ آلا ریلیف چنڳاں نی لڳدا کیوں جو انہاں دا آپݨا بجلی کمپنیاں تے آئی پی پیز نال تعلق ہئی او صرف ڳالھیں کریندے ہن ، تکلیف تاں انہاں کوں ہے جیڑھے آئی ایم ایف کوں خط لکھدے رہین۔عظمی بخاری آکھیے فساد پارٹی دا پاکستان نال آئی ایم ایف دا پروگرام ختم کرݨ تے ملک کوں سری لنکا بݨاوݨ دا منصوبہ وزیراعظم محمد شہبازشریف ناکام بݨا ݙتے ، بجلی دے ٻلاں اچ جیڑھا تکھے ودھارا تھیندا پیا ہئی وفاقی حکومت اپݨی مثبت پالیسیاں پاروں ایں کوں گھٹ کیتے ۔ انہاں آکھیے ملکی معیشت بہترتھیندی پئی اے ،بجلی دیاں قیمتاں گھٹ تھیوݨ پاروں ترقی دے نویں رستے کھلسن ، عوام کوں روزگار دے موقع ملسن ، ملکی برآمدات ودھسن ، پیداواری لاڳت گھٹ تھیسی تے مہانگ دا گراف مزید تلے آسی ۔وزیر اطلاعات آکھیے وزیراعظم محمد شہباز شریف اتے وزیراعلی مریم نواز ݙینھ رات عوام دی خدمت اچ مصروف عمل ہن ، مسلم لیگ( ن) دی حکومت جݙاں وی اقتدار اچ آئی ملک کوں بحراناں توں کڈھیے ، عید دے ݙینھاں اچ  پنجاب حکومت صوبے دے عوام کوں کھاوݨ پیوݨ دیاں چیزاں دیاں قیمتاں اچ ریلیف ݙتا،رمضان سہولت بازاراں اچ عوام کوں ھک ارب 11کروڑ روپے دی  بچت تھئی جݙاں جو 3ارب 57کروڑ روپے دی رمضان بازاراں اچ خریداری تھئی تے 28 ہزار لوکاں فری ہوم ڈیلیوری دے ذریعے رمضان بازار توں سامان منگوائے۔ 13 نویں سہولت بازار اگست تئیں بݨیسوں جݙاں جو 69کروڑ روپے نال سہولت بازار سولر انرجی تے منتقل تھیندے پئن چوݙاں چہیں تے پائلٹ سہولت” آن دی گو ”پروگرام شروع کریسوں۔انہاں آکھیے وزیراعلی مریم نواز ہر او منصوبہ شروع کریسن جنہاں متعلق انھاں کوں لڳی جو ایں توں عوام دا فیدہ تھیسی ۔ ھک سوال تے انہاں آکھیے عید دے ݙینھاں اچ پنجاب اچ مسافراں توں اوورچارجنگ کرݨ تے ٹرانسپورٹرز کوں 22 لکھ روپے جرمانہ کیتا ڳئے جنہاں توں 11 لکھ روپے مسافراں کوں واپس ݙیوائے ڳئن۔