اسلام آباد۔6 اکتوبر(اے پی پی)وزیراعظم محمد شہباز شریف گیس دی لوڈ مینجمنٹ بارے جامع لائحہ عمل ٻݨاوݨ اتے پیشگی اقدامات دی ہدایت کریندے آکھیے جو گیس لوڈ مینجمنٹ دی حکمتِ عملی تے عملدرآمد کیتے بھرپور عوامی آگہی مہم چلائی ونڄے، موجودہ علاقائی صورتحال پاروں گیس دی بلا تعطل درآمد بارے سارے ضروری اقدامات کیتے ونڃن۔ وزیراعظم محمد شہباز شریف دی اڳواݨی اچ موسمِ سرما اچ گیس لوڈ مینجمنٹ بارے اجلاس …
وزیراعظم دی گیس لوڈ مینجمنٹ بارے جامع لائحہ عمل ٻݨاوݨ اتے پیشگی اقدامات دی ہدایت
اسلام آباد۔6 اکتوبر(اے پی پی)وزیراعظم محمد شہباز شریف گیس دی لوڈ مینجمنٹ بارے جامع لائحہ عمل ٻݨاوݨ اتے پیشگی اقدامات دی ہدایت کریندے آکھیے جو گیس لوڈ مینجمنٹ دی حکمتِ عملی تے عملدرآمد کیتے بھرپور عوامی آگہی مہم چلائی ونڄے، موجودہ علاقائی صورتحال پاروں گیس دی بلا تعطل درآمد بارے سارے ضروری اقدامات کیتے ونڃن۔ وزیراعظم محمد شہباز شریف دی اڳواݨی اچ موسمِ سرما اچ گیس لوڈ مینجمنٹ بارے اجلاس تھیا۔ اجلاس کوں گیس لوڈ مینجمنٹ بارے پیشگی اقدامات تے بریفنگ ݙتی ڳئی جو مقامی گیس دی فراہمی کیتے گھریلو صارفین ترجیح ہوسن، بجلی دی پیداوار اتے صنعتاں کیتے آر ایل این جی ترجیح ہوسی، گھریلو سطح تے مقامی گیس دی ڄاہ تے متبادل ذرائع توانائی کوں فروغ ݙیوݨ سانڳے عوامی آگہی مہم شروع کیتی ویسی۔ بریفنگ اچ ݙسایا ڳیا جو ملک دے شمالی علاقیاں اچ موجود گیس دے ذخائر توں بلا تعطل ترسیل کرݨ دے وی اقدامات کیتے ویندے پئن۔ واٹر اتے سپیس ہیٹنگ کیتے بجلی تے چلݨ والے آلات دے حوالے نال بینک فنانسنگ دی سہولت متعارف کرواوݨ دی تجویز وی زیرِ غور اے۔ اجلاس اچ وفاقی وزیرِ قومی غذائی تحفظ رانا تنویر حسین، وفاقی وزیرِ اقتصادی امور احد خان چیمہ، وفاقی وزیرِ خزانہ و محصولات محمد اورنگزیب، وفاقی وزیرِ پٹرولیم و قدرتی وسائل علی پرویز ملک، وزیراعظم دے مشیر برائے صنعت ہارون اختر، وزیرِ مملکت برائے خزانہ و ریلوے بلال اظہر کیانی اتے متعلقہ اعلیٰ سرکاری افسران شرکت کیتی۔
