دھرنیاں اتے احتجاج دی سیاست نال معیشت اتے پاکستان دی عالمی ساکھ کوں نقصان پچاوݨ ملک دشمنی اے، پی ٹی آئی لانگ مارچ ختم کرے، وزیراعظم شہباز شریف

اسلام آباد۔6 اکتوبر(اے پی پی)وزیراعظم محمد شہباز شریف دھرنیاں اتے احتجاج دی سیاست کوں قومی معیشت اتے پاکستان دی عالمی ساکھ کیتے ݙاݙھا نقصان دہ قرار ݙیندے آکھیے جو دھرنیاں دی سیاست نال معیشت کوں نقصان پچاوݨ ملک دشمنی اے، پی ٹی آئی احتجاجی سیاست اتے اپݨا لانگ مارچ ختم کرے، حکومت عوام دے جان و مال دے تحفظ کیتے ہر ممکن اقدامات کریسی۔ انہاں اے ڳالھ اسلام آباد اچ کشمیر چوک انڈر پاس دا منݙھ ٻدھݨ دی تقریب نال خطاب اچ آکھی۔ تقریب اچ وفاقی وزیرِ داخلہ محسن نقوی، وفاقی وزیرِ اطلاعات و نشریات عطاء اللہ تارڑ، وفاقی وزیرِ پارلیمانی امور ڈاکٹر طارق فضل چوہدری، وزیرِ مملکت طلال چوہدری وی وزیراعظم دے نال ہن۔ وزیراعظم آکھیا جو حکومت ملک دی ترقی اتے معاشی استحکام کیتے ݙینھ رات لڳی ہؤعی اے، اساں ݙھائی سال دی محنت نال ملکی معیشت کوں اپݨے پیراں تے کھڑا کیتے، ملکی پیداوار ودھی اے، ہک پاسو ترقیاتی کماں دا سلسلہ جاری اے اتے ٻئے پاسو بدقسمتی نال ہک واری ول لانگ مارچ، دھرنے اتے احتجاج دی سیاست اٹھدی پئی اے۔ وزیراعظم آکھیا جو اساں باہمی مشاورت نال طے کیتا جو پی ٹی آئی دی قیادت نال با معنی، با مقصد اتے پرخلوص ڳالھ مہار کروں تاں جو لانگ مارچ، دھرنے اتے احتجاج دی سیاست دا خاتمہ کروں اتے مل ٻہہ تے مسائل دا حل ڳولوں، حکومت تے پیپلز پارٹی دی مشترکہ کمیٹی ݙو ݙینھ تئیں سپیکر چیمبر اچ انہاں نال ڳالھ مہاڑ کیتی، امید ہئی جو مذاکرات دے مثبت نتائج نکلسن اتے دھرنیاں دی سیاست مکسی، ݙوہائیں جماعتاں سنجیدگی نال پی ٹی آئی نال الائے ٻھل ݙوجھے پاسو طے شدہ مسودے کوں ول ول وٹایا ڳئے ڄیندے نال انہاں دا مقصد واضح ہئی جو ڳالھ مہاڑ کوں کامیاب نہ تھیوݨ ݙتا ونڄے۔ وزیراعظم واضح کیتے جو دھرنے تے احتجاج دی سیاست نال ملکی معیشت نشانہ بݨسی، برآمدات اتے صنعتی پیداوار متاثر تھیسی جیڑھی ملک و قوم دا نقصان اے، کیا ترقی دے پہیے کوں ولا جام کرݨ ملک دشمنی نئیں؟ کیا ایںدے نال پاکستان دی عالمی ساکھ کوں نقصان پچاوݨ چنڳاں اے؟ انہاں آکھیا جو ستمبر اچ پچھلے سال ستمبر اتے پورے سال دے مقابلے اچ برآمدات ودھین، آئی ٹی برآمدات، ترسیلاتِ زر سودھا ملکی پیداوار وی ودھی اے اتے ایکوں احتجاج اتے دھرنیاں نال نقصان پچاوݨ ملک دشمنی اے۔ عوام دی جان و مال دی حفاظت حکومت دی ذمہ داری اے اتے ایکوں نقصان پچاوݨ والیاں دے خلاف قانون اپݨا راستہ کݙھیسی، اساݙی معیشت اچ بہتری کوں غیر وی منیندن۔ انہاں آکھیا جو پی ٹی آئی ہوش دے ناخن گھنے، احتجاج اتے لانگ مارچ دے اثرات تے غور کرے جو ایںدے نال قوم کوں فیدہ تھیسی یا نقصان پڄسی۔ انہاں پی ٹی آئی کوں آکھیا جو او احتجاج اتے دھرنے نال ملک کوں پڄݨ والے نقصان کوں ݙیہدے ہوئے لانگ مارچ ختم کرے۔ حکومت ڳالھ مہاڑ نال ہی مسائل دا حل کڈھسی۔ انہاں آکھیا جو ہر پاکستانی ایہو چاہندے جو امانت اتے دیانت نال ملک ترقی دی راہ تے ٹرے۔وزیراعظم محمد شہباز شریف منصوبے بارے آکھیا جو وزیرداخلہ کشمیر چوک انڈر پاس منصوبے دی تکمیل ہک مہینے اچ کرݨ دا یقین ݙیوائے، اے شاہراہ ہک ݙینھ سری نگر تئیں پڄسی، کشمیریاں کوں آزادی اتے بنیادی حقوق ملسن۔ انہاں آکھیا جو اینجھے ترقیاتی منصوبیاں دا مقصد عوام کوں سفری سہولتاں ݙیوݨ اے، کھلیاں سڑکاں اتے بلا رکاوٹ سفری سہولیات نال ویلھے دی بچت اتے منزل تے ویلھے تے پڄݨ اچ معاونت تھیندی اے، ایںدے نال ملک دی سماجی اتے معاشی ترقی دا سفر تیز تھیندے۔ تقریب نال وفاقی وزیرِ داخلہ سینیٹر محسن نقوی وی خطاب کیتے۔ ایں توں پہلے وزیراعظم محمد شہباز شریف کشمیر چوک انڈر پاس منصوبے دا سنگِ بنیاد رکھیا، اے منصوبہ 1 ارب 45 کروڑ روپے دی لاگت نال ہک مہینے اچ مکمل تھیسی۔ ایں موقع تے وزیراعظم کوں کشمیر چوک انڈر پاس منصوبے تے بریفنگ ݙتی ڳئی۔