امریکی سرمایہ کاراں کوں پاکستان اچ معدنیات دے شعبے اچ سرمایہ کاری دے مو قع توں فیدہ چاوݨا چاہیدے، وزیرِ اعظم  شہباز شریف

اسلام آباد۔9اپریل(اے پی پی) وزیرِاعظم محمد شہباز شریف منرلزانویسٹمنٹ فورم اچ شرکت سانڳے آوݨ آلے وفد دا خیر مقدم کریندے آکھیے امریکی سرمایہ کاراں کوں پاکستان اچ معدنیات دے شعبے اچ سرمایہ کاری دے مو قع توں فیدہ چاوݨا چاہیدے ۔وزیراعظم دفتر دے میڈیاونگ توں جاری بیان موجب وزیراعظم محمد شہبازشریف نال یو ایس ڈیپارٹمنٹ آف سٹیٹ دے بیورو آف سائوتھ اینڈ سنٹرل ایشین افیئرز دےسینئر بیورو آفیشل اتے قائم مقام اسسٹنٹ سیکرٹری ایرک میئردی قیادت اچ امریکی وفد ملاقات کیتی۔ وفد پاکستان منرلز انوسٹمنٹ فورم اچ شرکت سانڳے پاکستان دے دورے تے ہے ۔ وزیراعظم فورم اچ امریکی شرکت دا خیرمقدم کریندے زور ݙتے جو پاکستان دے معدنیات دے شعبے اچ وسیع استعداد موجود اے اتے امریکی کمپنیاں کوں ایں ترجیحی شعبے اچ سرمایہ کاری دے موقع توں فیدہ چاوݨا چاہیدے ۔ ݙو پاسے تناظر اتے علاقائی امن و سلامتی دے حوالے نال پاکستان اتے امریکا دے تعلقات دی اہمیت کوں اجاگر کریندے وزیراعظم دے امریکا نال ݙو پاسے تعلقات کوں تکڑا بݨاوݨ سانڳے صدر  ڈونلڈ ٹرمپ اتے انہاں دے انتظامیہ نال رل تے کم کرݨ دی پاکستان دی خواہش دا اظہار کیتے۔  وزیراعظم تجارت اتے سرمایہ کاری دے نال انسداد دہشت گردی سودھے سانجھی  دلچسپی دے شعبیں اچ تعاون ودھاوݨ دی اہمیت تے زور ݙتے ۔ قائم مقام اسسٹنٹ سیکرٹری ایرک میئر پاکستان منرل انویسٹمنٹ فورم دے کامیاب انعقاد تے وزیراعظم کوں مبارخ ݙتی ۔ انہاں پاکستان دے معدنیات دے شعبے دی وسیع استعداد دا اعتراف کریندے ہوئیں امریکی کمپنیاں دی طرفوں ایں شعبے اچ سرمایہ کاری اچ دلچسپی دا ݙسائے۔ انہاں مشترکہ دلچسپی دے امور تے پاکستان نال کم کرݨ دی امریکی خواہش دا وی اظہار کیتے۔  انہاں آکھیے امریکا پاکستان نال ݙو پاسے تعلقات کوں مزید ودھارا ݙیوݨ چاہندے ۔ایں موقع تے نائب وزیراعظم / وزیر خارجہ محمد اسحاق ڈار، وفاقی وزیر اقتصادی اموراحد خان چیمہ، وزیرپٹرولیم علی پرویز ملک، معاون خصوصی طارق فاطمی اتے ٻئے اعلیٰ  سرکاری حکام وی موجود ہن۔