اسلام آباد۔ 15 مئی(اے پی پی)پاکستان اپݨے جوہری ہتھیاراں بارے بھارتی وزیر دفاع دے بھارت دے غیر قانونی طور تے زیر تسلط جموں و کشمیر اچ ݙتے ڳئے ریمارکس دی شدید مذمت کیتی اے۔ دفتر خارجہ دے ترجمان آکھیے جو اے غیر ذمہ دارانہ ریمارکس روایتی طریقیاں نال بھارتی جارحیت دے خلاف پاکستان دے موثر دفاع اتے ڈیٹرنس دے حوالے نال انہاں دی ݙاݙھے عدم تحفظ اتے مایوسی کوں ظاہر کریندن۔ ترجمان آکھیا جو خود ساختہ ‘ایٹمی بلیک میل’ دے بغیر جیندا نئی دہلی کوں سامݨا اے، پاکستان دی روایتی صلاحیتاں بھارت کوں روکݨ کیتے کافی ہین۔ بیان اچ آکھیا ڳئے جو بھارتی وزیر دفاع دے تبصرے وی “آئی اے ای اے” جھیں اقوام متحدہ دی خصوصی ایجنسی دے مینڈیٹ اتے ذمہ داریاں توں انہاں دی سراسر لاعلمی کوں ظاہر کریندن۔ انہاں آکھیا جو “آئی اے ای اے” اتے بین الاقوامی برادری کوں بھارت اچ جوہری اتے تابکار مواد دی ول ول چوری اتے غیر قانونی سمگلنگ دے واقعات بارے فکر مند ہووݨا چاہیدے۔ ترجمان اپݨے بیان اچ آکھیے جو پچھلے سال بھارت دے دہرادون اچ بھابھا اٹامک ریسرچ سنٹر توں مبینہ طور تے چوری تھیوݨ آلے تابکار ڈیوائس نال پنج لوک ملیے ہن جݙاں جو ایندے بعد ہک گروہ جیندے کولو ہک انتہائی تابکار اتے زہریلا مادہ کیلیفورنیا جیںدی مالیت 100 ملین امریکی ڈالر ہئی، دا وی پتہ لڳ ڳیا ہئی۔ 2021 اچ کیلیفورنیا دی چوری دے ترے واقعات وی رپورٹ تھئے، اے ول ول تھیوݨ آلے واقعات نئی دہلی ولوں جوہری اتے ٻئے تابکار مواد دی حفاظت کیتے چاتے ڳئے اقدامات تے سوالیہ نشان لیندن۔ انہاں آکھیا جو اے واقعات بھارت اچ حساس، ݙوہڑے استعمال دے مواد دی بلیک مارکیٹ دے وجود دی وی نشاندہی کریندن۔ بیان دے مطابق پاکستان انہاں واقعات دی مکمل تحقیقات تے زور ݙیندے اتے بھارت توں مطالبہ کریندے جو او اپݨیاں جوہری تنصیبات اتے ہتھیاراں دے تحفظ کوں یقینی بݨاوے۔
