اسلام آباد۔15 مئی(اے پی پی)نائب وزیر اعظم تے وزیر خارجہ سینیٹر محمد اسحاق ڈار آکھیا اے جو پاکستان بھارتی جارحیت دا مؤثر جواب ݙتے، پلوامہ دے کوڑے بیانیے توں گھِن تے حالیہ جارحیت تائیں بھارت دا منہ بے نقاب تھی چکیے، عالمی برادری مؤقف دی بھرپور حمایت کیتی اے۔ ایوان بالا اچ ڳالھ مُہاڑ کریندے انہاں آکھیا جو بھارت دی کابینہ کمیٹی برائے سکیورٹی دے اجلاس اتے اوندے بعد جاری اعلامیہ خطے اچ کشیدگی پیدا کیتی، ایں صورتحال دا فوری نوٹس گھِندے ہوئے پاکستان نیشنل سکیورٹی کمیٹی دا ہنگامی اجلاس سݙیا ڳیا اتے بھارتی جارحیت دے ولدے اچ فوری اتے مؤثر اقدامات کیتے ڳئن۔ پاکستان دی دفاعی کارروائیاں اچ بھارتی مشن دی تعداد گھٹ کیتی ڳئی، مخصوص دفاعی سٹیجز کوں نشانہ بݨایا ڳیا، واہگہ بارڈر کوں عارضی طور تے بند کر ݙتا ڳیا، بھارتی شہریاں دے وزٹ اتے تجارتی ویزے معطل کیتے ڳئے، البتہ مذہبی مقاصد کیتے آوݨ والے سکھ یاتریاں کوں استثنیٰ ݙتا ڳیا۔ انہاں آکھیا جو انڈین ایئرلائنز کیتے پاکستانی فضائی حدود بند کر ݙتیاں ڳئن اتے بین الاقوامی سطح تے پاکستان دے مؤقف کوں بھرپور حمایت ملی، اقوام متحدہ دی سلامتی کونسل دے مستقل اتے غیر مستقل ارکان پاکستان نال براہ راست رابطہ کیتا جݙاں جو پوری دنیا دے 60 توں ودھ وزرائے خارجہ اتے اعلیٰ حکام پاکستان نال رابطہ کر تے تحمل دی تلقین کیتی۔ سینیٹر اسحاق ڈار آکھیا جو پاکستان بھارتی اشتعال انگیزی دا مُنہ توڑ جواب ݙتے ٻھل ودھ کشیدگی توں گریز کیتا، عالمی برادری کوں واضح سنیہا ݙتا ڳیا جو پاکستان جنگ نئیں چاہندا ٻھل اپݨے دفاع دا حق ہر صورت محفوظ رکھدے۔ انہاں آکھیا جو بھارتی میڈیا پلوامہ جھیں واقعات کوں بنیاد بݨا تے لائے ڳئے الزامات بے بنیاد ہن اتے پاکستان ہر عالمی فورم تے اے مؤقف واضح کیتے جو اساں دہشت گردی دے خلاف ہیں اتے خطے اچ امن و استحکام کیتے ہر ممکن اقدام کریندے پئے ہیں۔ انہاں آکھیا جو بھارت 6 اتے 7 مئی دی ادھ رات پاکستان دے مختلف علاقیاں تے حملے کیتے، انہاں حملیاں اچ پنجاب دے چار تے آزاد کشمیر دے ݙو مقامات کوں نشانہ بݨایا ڳیا، مجموعی طور تے بھارت 24 حملے کیتن۔ اسحاق ڈار آکھیا جنہاں مقامات کوں نشانہ بݨایا ڳیا انہاں کوں بھارتی حکومت اے میڈیا دہشت گرداں دے ٹھکاݨے قرار ݙتن ٻھل زمینی حقائق ایں بیانیے دی مکمل تردید کریندن، حملیاں اچ ݙو مسجداں کوں شہید کیتا ڳیا جݙاں جو چار ٻئے شہری تے عبادتی مقامات کوں وی شدید نقصان پُڄایا ڳیا۔ نائب وزیر اعظم عالمی برادری کوں براہ راست دعوت ݙتی جو او پاکستان آ تے خود انہاں مقامات دا معائنہ کرے جنہاں کوں بھارت دہشت گردی نال جوڑیا، اساں پوری دنیا کوں دعوت ݙیندے ہیں جو آ تے اپݨیاں اکھیں نال ݙیکھن جو کیہڑے مقامات دہشت گرداں دے ٹھکاݨے ہن، اصل حقیقت بھارت دا کوڑ اتے ظلم اے۔ انہاں آکھیا جو بھارت دے انہاں اقدامات نال نہ صرف پاکستان دی خودمختاری کوں چیلنج کیتا ڳیا ٻھل عالمی قوانین، انسانی حقوق اتے مذہبی آزادی دی سنگین خلاف ورزی وی کیتی ڳئی، پاکستان انہاں حملیاں دا معاملہ اقوام متحدہ، او آئی سی اتے ٻئے بین الاقوامی اداریاں دے سامݨے چاوݨ دا فیصلہ کیتے۔ سینیٹر اسحاق ڈار آکھیا جو بھارت 2019 اچ پلوامہ حملے دے بعد انٹرنیشنل کمیونٹی کوں گمراہ کرݨ دی کوشش کیتی اتے پاکستان کوں کوڑے الزامات دا نشانہ بݨایا۔ انہاں دا آکھݨ ہئی جو اوں ویلے بھارت دے کوڑے بیانیے کوں عالمی سطح تے تروڑݨ پاکستان کیتے ہک اہم چیلنج ہئی۔ انہاں آکھیا جو وزیراعظم شہباز شریف اپݨے اکیڈمی خطاب اچ بھارت کوں واضح جواب ݙیوݨ دی پالیسی واضح کیتی۔ ایں پالیسی دے تحت پاکستان یو این چارٹر دے آرٹیکل 51 دے تحت اپݨے دفاع دا حق استعمال کیتے، بھارت چار جنگی طیارے پاکستانی حدود اچ ٻھیڄن جیندے تے پاک فضائیہ الرٹ ہئی اتے دشمن کوں پسپائی اختیار کرݨی پئی۔ انہاں آکھیا جو 6 مئی دی رات بھارت 80 جنگی طیارے لانچ کیتے جِنہاں اچ SU-30 تے MIG-29 جھیں طیارے شامل ہن، انہاں حملیاں اچ 24 پے لوڈ پاکستانی حدود اچ سٹے ڳئے ٻھل انہاں دا کوئی ہدف دہشت گردی نال جڑیا نہ ہئی، نشانہ عام شہری علاقے اتے مذہبی مقامات بشمول ݙو مسجداں بݨیاں۔ انہاں آکھیا جو پاکستانی طیاریاں کوں واضح ہدایات ݙتیاں ڳیاں ہن جیکر دشمن فضائی حدود پار کرے تاں فوری کارروائی کیتی ونڄے۔ پاکستان بھارت دے 80 ڈرونز ݙھوائن، 7 مئی کوں بھارت کوں فضائی محاذ تے شرمناک ناکامی دا سامݨا کرݨا پیا۔ انہاں آکھیا جو موجودہ دور حکومت اچ پاکستان وݙیاں سفارتی کامیابیاں حاصل کیتن جیندا دنیا اعتراف کریندی پئی اے، حکومت پاک بھارت جنگ دے شہداء تے زخمیاں کیتے پیکیج دا اعلان کیتے۔
