اسلام آباد۔15 مئی(اے پی پی)ایوان بالا ہک قرارداد متفقہ منظور کیتی اے جیندے اچ پاکستان دے خلاف بھارتی جارحیت دی شدید مذمت کیتی ڳئی جݙاں جو کامیاب آپریشن ”بنیان مرصوص” دے ذریعے مُنہ توڑ جواب ݙیوݨ تے افواج پاکستان دے غیر متزلزل عزم اتے پیشہ وارانہ صلاحیت دی تعریف کیتی ڳئی۔ ایوان بالا دے اجلاس اچ وفاقی وزیر برائے قانون و انصاف سینیٹر اعظم نذیر تارڑ اے قرارداد ایوان اچ پیش کیتی جو بری فوج، پاک فضائیہ اتے پاک بحریہ ہک واری ول کامیاب آپریشن ”بنیان مرصوص” نال غیر متزلزل عزم اتے پیشہ وارانہ صلاحیتاں ݙکھائن، ایں تکڑے آپریشن نال مادر وطن دی قومی سلامتی تے علاقائی خودمختاری کوں یقینی بݨاوݨ اچ مدد ملی اتے پاکستان دے ذمہ دار جوہری ملک دا تشخص اُبھر تے سامݨے آیا۔ قرارداد اچ آکھیا ڳیا اے جو اے ایوان ساݙی قوم کوں طاقت، حوصلہ، اتحاد ݙیوݨ، بھارت دی ننگی جارحیت دے خلاف عزت و وقار دے نال تحفظ اتے فیصلہ کن اخلاقی اتے سٹرٹیجک کامیابی حاصل کرݨ تے اللہ تعالیٰ دا شکر گزار اے، پاکستانی عوام کوں مبارک ہووے، ساریاں سیاسی، مذہبی اتے نظریاتی فرق دے باوجود پوری قوم غیر متزلزل اتحاد ݙکھائے، پوری پاکستانی قوم ہک مقصد تے ہک آواز تھی ڳئی جیہڑا جو ملکی سلامتی، علاقائی خودمختاری تے پاکستان دا وقار ہئی۔ قرارداد اچ آکھیا ڳیا جو مسلح افواج کوں انہاں دی بہادری، ڈسپلن، مثالی مہارتاں تے عظیم کامیابی کوں خراج تحسین پیش کریندے ہیں، انہاں شاندار پیشہ وارانہ حب الوطنی ݙکھائی اتے سکیورٹی چیلنجز دا مضبوط فوجی کارروائی نال جواب ݙتا۔ پاک فضائیہ بھارتی جارحیت دا مُنہ توڑ جواب ݙتا تے دشمن دی فوجی طاقت دے غرور کوں مِٹی اچ ملا ݙتا۔ انہاں سٹرٹیجک توازن اتے ریڈ لائن کوں برقرار رکھیے، پاکستان دی دفاعی صلاحیتاں تے اعتماد دا دنیا اچ اعتراف کیتا ویندا پئے۔ قرارداد اچ بہادر شہداء دی قربانیاں دا اعتراف کیتا ڳئے جِنہاں قومی سلامتی اتے ملکی وقار کیتے اپݨیاں جاناں قربان کیتن، اے بہادر سپوت قوم دے دلاں اچ زندہ راہسن۔ قرارداد اچ آکھیا ڳئے جو ایوان بھارت دی بلااشتعال جارحیت اتے ٻالاں اتے تِریمتیں سودھا معصوم شہریاں دی شہادت تے مسجداں تے حملے دی مذمت کریندے اتے ݙُکھی خانداناں نال ݙُکھ اتے افسوس کریندے، اوکھے ویلے اچ غیر متزلزل تے اصولی حمایت تے دوست مُلکاں دے شکر گزار ہیں، پاکستان دے علاقائی امن و استحکام کیتے عزم دا اعادہ کریندے ہیں، تنازعات دے مخلصانہ، ڈھانچہ جاتی اتے جامع مذاکرات بشمول جموں و کشمیر تے مذاکرات دی حمایت کریندے ہیں تے حکومت تے زور ݙتا ڳیا اے جو او تنازعہ کشمیر دے اقوام متحدہ دی قرارداداں تے کشمیری عوام دی خواہشاں دے مطابق پائیدار تے منصفانہ حل کیتے عالمی برادری نال ڳالھ مُہاڑ کرے۔ قرارداد اچ سندھ طاس معاہدے تے آکھیا ڳئے جو پاکستان دے پاݨی دے اپݨے جائز حق دا تحفظ کیتا ویسی جیہڑا جو قومی سلامتی، عالمی معاہدیاں، معاشی استحکام تے سالمیت دا اہم جزو اے، سندھ طاس معاہدے دی یکطرفہ خلاف ورزیاں بشمول پاکستان دے حصے دے پاݨی کوں گھٹ کرݨ یا رُخ موڑݨ دی کوئی وی کوشش عالمی قوانین دی سنگین خلاف ورزی اے، اے نہ صرف انسانیت دے خلاف جرم اے ٻھل اوندے عالمی اتے علاقائی سطح تے سنگین اثرات ہوسن، پاکستان ایں تناظر اچ بھارت دے کہیں وی اقدام کوں جنگ تصور کریسی، اساں ایں ڳالھ دا اعادہ کریندے ہیں جو اے ایوان اپݨیاں آئینی و قانونی اتے جمہوری ذمہ داریاں پوریاں کریسی، پاکستان دے قومی مفاد، اتحاد تے امن و سلامتی تے پائیدار ترقی کیتے کم کریندا رہسی۔ ایوان قرارداد دی متفقہ طور تے منظوری ݙے ݙتی۔
