سپیکر قومی اسمبلی دی بھارت دے خلاف پاکستان دی تاریخی جت تے قوم کوں مبارخ

اسلام آباد۔ 16 مئی (اے پی پی) سپیکر قومی اسمبلی سردار ایاز صادق بھارت دے خلاف پاکستان دی تاریخی جت تے قوم کوں مبارخ ݙیندیں ہوئیں آکھیا جو اللہ دا جتنا شکر ادا کروں گھٹ اے۔ جمعہ کوں یوم تشکر دے موقع تے آپݨے سنیھے اچ انہاں مادر وطن دے دفاع اچ جان قربان کرݨ آلے شہیداں کوں خراج عقیدت پیش کیتا اتے آکھیا جو اساݙی افواج دشمن دی کھلی جارحیت دا منہ ٻھن جواب ݙتا، بہادر افواج دشمن دے مذموم عزائم ناکام بݨا تے قوم دا سر فخر نال بلند کیتے۔ ١٠ مئی دے بعد آلے پاکستان اچ ہک نویں تازگی اتے مسرت محسوس تھیندی پئی اے، معرکہ حق دے بعد پاکستان کوں پوری دنیا اچ ہک منفرد مقام حاصل تھئے۔ انہاں آکھیا جو پارلیمان اتے عوام سیسہ پلائی دیوار وانڳ مسلح افواج دے نال کھڑے تھی تے دفاع وطن کیتے آپݨی جان قربان کرݨ کیتے تیار اے۔ پاکستانی میڈیا اتے نینگریں معرکہ حق اچ مثالی کردار ادا کیتا، پوری قوم بھارتی جارحیت وچال بردباری اتے نظم و ضبط دا مظاہرہ کیتا، سیاسی تے عسکری قیادت یکجہتی دا عملی ثبوت ݙتے۔ انہاں آکھیا جو پاک فوج بھارتی جارحیت دا مردانہ وار جواب ݙتا، شہیداں دیاں قربانیاں کوں قوم کݙاہیں نہ بھلیسی، ملکی دفاع کیتے پوری قوم یکجہتی دی علامت بݨی رہی۔ انہاں آکھیا جو پاک فوج دے جواناں ثابت کیتا جو حوصلے دشمن کوں شکست ݙے سڳدن، ساری سیاسی جماعتاں اختلافات توں ہٹ تے پاک فوج دے مونڈھے نال مونڈھا رلا تے کھڑن۔ سپیکر قومی اسمبلی مسلح افواج کیتے نیک خواہشات دا اظہار کیتا۔