بھارت ول کوئی ایڈونچر کرݨ دی کوشش کیتی تاں اتھو وی تکڑا ولدا ݙیسوں، خواجہ محمد آصف

اسلام آباد۔16مئی (اے پی پی)وفاقی وزیر دفاع خواجہ محمد  آصف آکھیے جو بھارت ول کوئی ایڈونچر کرݨ دی کوشش کیتی تاں اتھو وی تکڑا ولدا ݙیسوں۔ پارلیمنٹ ہائوس دے باہرو صحافیاں نال الیندے انہاں آکھیا جو بھارت زخم چٹیندا پئے، انہاں دا میڈیا،حکمران اتے بھارتی وزیر اعظم نریندر مودی سودھا سارے اپݨے پھٹ چٹیندے پین، بھارت اچ انہاں لوکاں دا چھل چڑھیا ہویا اے جیڑھے نریندر مودی اتے ایندی ناکامی تے تنقید کریندے پین۔ خواجہ محمد آصف آکھیا جو بھارت اینجھا دشمن اے جیندے تے اعتبار نئیں کیتا ونج سگدا، اساں ہر ویلے تیار ہیں، بھارت ول کوئی ایڈونچر کرݨ دی کوشش کیتی تاں اتھو وی تکڑا ولدا ݙیسوں۔ بانی پی ٹی آئی بارے سوال تے انہاں تبصرہ کرن توں گریز کریندے آکھیا جو کوئی وی آواز جیڑھی پی ٹی آئی وچوں نکلدی اے اندروں ای ایندی تردید وی شروع تھی ویندی اے، ٻھل پی ٹی آئی اچ آپس دی لڑائی شروع تھی ویندی اے،تہوں ایندے تے میڈا کمنٹ کرݨ ویلے دا ضیان اے۔