وفاقی وزیر داخلہ محسن نقوی دا جناح سکوائر مری روڈ انڈر پاس پراجیکٹ دا دورہ، منصوبے تے کم ڈینھ رات جاری رکھݨ دی ہدایت

اسلام آباد۔19 مئی (اے پی پی) وفاقی وزیر داخلہ محسن نقوی وزیر مملکت برائے داخلہ طلال چوہدری دے نال سنوار کوں سویلے جناح سکوائر مری روڈ انڈر پاس پراجیکٹ دا دورہ کیتا جِتھاں اُنھاں تعمیراتی کم تے پیش رفت دا جائزہ گھِدا۔ وزیر داخلہ محسن نقوی تعمیراتی کم مقررہ مد وچ مکمل کرݨ دی ہدایت ݙیندیں ہوئیں آکھیا جو منصوبے دے سارے حصیاں تے ڈینھ رات اَتے ہفتے دے ست ڈینھ کم کیتا ونجے۔ انڈر پاس دی تعمیر نال ائیرپورٹ توں مری اَتے کشمیر تئیں سگنل فری کوریڈور دی سہولت مِلسِی۔ شہریاں دے ویلھے دے نال ٻالݨ دی وی بچت تھیسِی۔ چیئرمین سی ڈی اے محمد علی رندھاوا پراجیکٹ تے تھیوݨ آلی پیش رفت بارے بریفنگ ݙیندیں ہوئیں ݙسایا جو تعمیراتی سرگرمیاں چھیکڑی مرحلے اچ ہن۔  جناح سکوائر مری روڈ انڈر پاس منصوبے دی چھت دا کم مکمل کر ڳھِدّا ڳئے، انڈر پاس تے ہارٹیکلچر سودھے الیکٹریکل ورک وی شروع کر ݙِتّا ڳئے، منصوبے دے ڈرینج سسٹم، روڈ ورک دے نال اسفالٹ دا کم وی زور و شور نال جاری ہِے۔