نائب وزیراعظم اسحاق ڈار چین دے ترائے ڈینہہ دے دورے تے بیجنگ پُڄ ڳئے

بیجنگ۔19 مئی (اے پی پی) نائب وزیراعظم تے وزیر خارجہ سینیٹر محمد اسحاق ڈار چین دے وزیر خارجہ وانگ یی دی دعوت تے سنوار کوں چین دے ترائے ڈینہہ دے سرکاری دورے تے بیجنگ پُڄ ڳئے۔ ائیرپورٹ تے چینی حکام اتے چین اچ پاکستان دے سفیر خلیل ہاشمی انہاں دا استقبال کیتا۔ ترجمان دفتر خارجہ موجب محمد اسحاق ڈار چینی وزیر خارجہ وانگ یی دے نال نال چینی کمیونسٹ پارٹی دے اہم ارکان سودھے ٻئے سینئر چینی رہنماواں نال جامع ڳالھ مہاڑ کریسن۔ ملاقاتاں اچ موجودہ علاقائی پیش رفت اتے پاک چین تعلقات دے کئی پہلوواں تے توجہ ݙتی ویسی۔ اے دورہ پاکستان اتے چین وچال اعلیٰ سطح دے تبادلیاں اتے ݙوہیں برادر ممالک وچال سدا بہار سٹریٹجک تعاون تے مبنی شراکت داری دا حصہ اے۔ روانگی توں پہلے نائب وزیراعظم اسحاق ڈار میڈیا کوں ݙسایا جو چین پاکستان دا وݙا تجارتی پارٹنر اے اتے ݙوہاں ممالک وچال قریبی آہنی تعلقات استوار ہن۔ انہاں آکھیا جو پچھلے ترائے ہفتیاں اچ انہاں دی وزیر خارجہ وانگ یی نال ݙو واری ٹیلی فونک ڳالھ مہاڑ تھئی ہئی جئیں انہاں کوں چین دے دورے دی دعوت وی ݙتی ہئی۔ انہاں آکھیا جو چینی قیادت نال انہاں دی ملاقاتاں اچ پاکستان اتے بھارت وچال اڄوکی کشیدگی دے علاوہ سیاسی، مقامی، علاقائی اتے عالمی معاملیاں تے ڳالھ مہاڑ تھیسی۔ ہک سوال دے جواب اچ انہاں دنیا بھر دے کئی ہم منصباں نال آپݨی ٹیلی فونک ڳالھ مہاڑ دا حوالہ ݙیندیں ہوئیں آکھیا جو بھارتی الزام تراشی دے ڈرامے کوں پاکستان پہلے ای بے نقاب کر ݙتے اتے بھارت دا بے بنیاد الزام تراشی دا کھیݙ بُری طرح ناکام تھی ڳئے۔