پیپرا دا ہک ٻیا سنگ میل، ای پروکیورمنٹ اتے ریگولیٹری فریم ورک تے 10 ہزار توں ودھ لوکاں دی تربیت مکمل

اسلام آباد۔19 مئی (اے پی پی)پبلک پروکیورمنٹ ریگولیٹری اتھارٹی (پیپرا) وزیرِاعظم دے ڈیجیٹل پاکستان وژن دے تحت ای پروکیورمنٹ سسٹم اتے ریگولیٹری فریم ورک تے 10 ہزار توں ودھ پیشہ ور لوکاں کوں تربیت ݙے تے ہک اہم سنگ میل عبور کر گھدے۔ اے ڳالھ مینیجنگ ڈائریکٹر پیپرا حسنات احمد قریشی پبلک پروکیورمنٹ اتے کنٹریکٹ مینجمنٹ تے جامع تربیتی پروگرام دی افتتاحی تقریب نال خطاب اچ ݙسائی۔ ایں تربیتی پروگرام دا آغاز پیپرا اتے نیشنل یونیورسٹی آف سائنسز اینڈ ٹیکنالوجی (نسٹ) دے پروفیشنل ڈیویلپمنٹ سینٹر دے ڳانݙھے نال کیتا ویندا پئے۔ ݙوجھے بیچ اچ چار مہینے تے مشتمل ایں تربیتی پروگرام اچ 70 توں ودھ شرکاء شامل ہن جنہاں اچ سرکاری افسران، نجی شعبے دے ماہرین، سپلائرز، کاروباری ادارے دے اہلکار اتے ترقیاتی ماہرین شرکت کیتی۔ ڈپلومہ پروگرام اچ مختلف ماڈیولز شامل ہن جنہاں اچ مؤثر اتے شفاف پبلک پروکیورمنٹ دے بنیادی اصول، قانونی اتے ریگولیٹری فریم ورک، پروکیورمنٹ دی استعداد کار اچ ودھارا، اسٹریٹجک انتخاب دا فریم ورک، منصفانہ انتخاب، انصاف تئیں رسائی، کنٹریکٹ مینجمنٹ، بین الاقوامی معیارات، بین الاقوامی ڈونر فنڈڈ پروکیورمنٹ، پبلک پرائیویٹ پارٹنرشپ اتے ای پیڈز دا جائزہ شامل اے۔ تقریب نال خطاب اچ ایم ڈی پیپرا، حسنات قریشی ݙسایا جو وزیرِاعظم پاکستان دیاں ہدایات دے مطابق، سرکاری اداریاں اچ پروکیورمنٹ سیلز قائم تھی چکین جتھاں تعینات افسران کوں ای پیڈ اتے پیپرا دے قواعد و ضوابط بارے جامع تربیت ݙتی ویندی پئی اے تاں جو او اپݨیاں ذمہ داریاں اہلیت اتے شفافیت دے اصولاں دے تحت پوریاں کر سڳن۔ انہاں آکھیا جو پیپرا ملک گیر تربیتی پروگرام کوں وسعت ݙتی اے تاں جو پبلک پروکیورمنٹ دے ہر مرحلے تے ماہر پیشہ ور لوک تیار کیتے ونڄ سڳن۔ ایم ڈی پیپرا پبلک سیکٹر اداریاں سودھا سارے اسٹیک ہولڈرز توں اپیل کیتی جو او تربیتی پروگرام اچ ودھ تے شرکت کرن تاں جو قانونی، اخلاقی اتے بین الاقوامی معیار دے مطابق سرکاری خریداری دی منصوبہ بندی، عملدرآمد اتے انتظام دیاں مہارتاں حاصل کیتیاں ونڄ سڳن۔ انہاں آکھیا جو پیپرا کامیابی نال ای پروکیورمنٹ پلیٹ فارم متعارف کرائے، اے نظام شفافیت، لاگت اچ کمی، مقابلہ بازی، وقت دی بچت، کاروبار اچ آسانی اتے کاربن فٹ پرنٹ اچ کمی کوں ودھیندے۔ حسنات قریشی دے مطابق ہݨ تئیں 28,000 توں ودھ سپلائرز جنہاں اچ 400 غیر ملکی کمپنیاں وی شامل ہن، ای پروکیورمنٹ پلیٹ فارم تے رجسٹرڈ تھی چکین۔ ایندے علاوہ، تقریباً 700 وفاقی، 5000 پنجاب اتے 200 سندھ دے پبلک پروکیورمنٹ ادارے ایں نظام توں فائدہ چیندے پئے ہن۔ ایں موقع تے پیپرا دے سینئر افسران، ایف بی آر دے سینئر اہلکار و ماہر سرکاری خریداری علی رضا ہنجرا اتے پی ڈی سی نسٹ دے جنرل منیجر محمد علی وی موجود ہن۔