اسلام آباد۔ 27 جون (اے پی پی) سپیکر قومی اسمبلی سردار ایاز صادق آکھیا جو کہیں وی رکن دی تقریر دا کوئی لفظ یا اقتباس حذف صرف اَتے صرف سپیکر یا چیئر کوں حاصل اے، اپوزیشن دے کہیں وی رکن دا پروڈکشن آرڈر ہک گھنٹہ وی تاخیر نال جاری نئیں تھیا۔جمعه کوں قومی اسمبلی دے اجلاس دے آغاز تے قائد حزب اختلاف عمر ایوب خان، سابق سپیکر اسد قیصر اَتے بیرسٹر گوہر علی خان ولوں چاتے ڳئے نکاتاں دا جواب ݙیندیں ہوئیں انہاں قومی اسمبلی دے قواعد و ضوابط دے قاعدہ 284 دا حوالہ ݙیندیں ہوئیں آکھیا جو کہیں وی تقریر دا کوئی لفظ یا اقتباس حذف کرݨ دا اختیار صرف اَتے صرف سپیکر یا چیئر کوں حاصل اے ایں دے علاوہ قومی اسمبلی سیکرٹریٹ دے عملے وچوں کوئی وی اینویں نئیں کرسڳدا۔ پروڈکشن آرڈرز بارے ڳالھ کریندیں ہوئیں انہاں آکھیا جو سپیکر دی کرسی دی اصل طاقت ایوان دے ارکان ہن، کہیں وی رکن دے پروڈکشن آرڈر دے اجراء اچ ہک گھنٹہ وی تاخیر نئیں تھئی۔ ایں دے بعد اپوزیشن ارکان ایوان اچ نعرے بازی شروع کر ݙتی۔ سپیکر ڈائس دے سامݨے احتجاج کیتا اَتے بجٹ دستاویزات سٹیاں، ایں وچال وزیر خزانہ سینیٹر محمد اورنگزیب ایوان اچ ضمنی مطالبات زر منظوری کیتے پیش کیتے۔
