اسلام آباد۔ 27 جون (اے پی پی) وفاقی وزیر داخلہ محسن نقوی نال پاکستان اچ امریکا دی قائم مقام سفیر نیٹلی بیکر اہم ملاقات کیتی اَتے آپسی دلچسپی دے معاملیاں، پاک امریکا تعلقات اَتے مختلف شعبیاں اچ تعاون ودھاوݨ تے ڳالھ مہاڑ کیتی، انسداد دہشت گردی اَتے انسداد منشیات بارے اشتراک کار تے وی ڳالھ مہاڑ کیتی ڳئی۔وزارت داخلہ ولوں جمعه کوں جاری بیان موجب ملاقات اچ علاقائی صورتحال اَتے فیلڈ مارشل عاصم منیر دی امریکی صدر ڈونلڈ ٹرمپ نال ملاقات بارے تفصیلی ڳالھ مہاڑ کیتی ڳئی۔ وزیر داخلہ محسن نقوی ایران اسرائیل جنگ بندی کراوݨ تے امریکی صدر ڈونلڈ ٹرمپ دی غیر معمولی قیادت اَتے مخلصانہ کوششاں کوں سراہیا۔ وزیر داخلہ آکھیا جو پاک بھارت دے بعد ایران اسرائیل سیز فائر بارے امریکی صدر ڈونلڈ ٹرمپ دا متاثر کن کردار ہمیشہ یاد رکھیا ویسی۔ محسن نقوی آکھیا جو امید اے جو امریکی صدر ڈونلڈ ٹرمپ غزہ اچ وی جنگ بندی کریسن۔ وزیر داخلہ آکھیا جو قیام امن کیتے امریکی صدر ڈونلڈ ٹرمپ دے زبردست اقدامات کوں سراہندے ہن۔ انہاں آکھیا جو پاکستان ہمیشہ توں کشمیر سودھے ٻئے تنازعات مذاکرات نال حل کرݨ چاہندے۔ پاکستان امن کیتے چاتے ہر قدم دا خیر مقدم کریندے۔ امریکا دی قائم مقام سفیر نیٹلی بیکر خطے اچ امن کیتے پاکستان دیاں سفارتی کوششاں کوں سراہیا اَتے آکھیا جو پاکستان اساݙا اہم دوست ملک اے۔ قائم مقام امریکی سفیر آکھیا جو پاکستان دے نال تعلقات کوں خصوصی اہمیت ݙیندے۔
