فرسودہ نظام کوں اڄوکے تقاضیاں نال ہم آہنگ کیتے بغیر معاشی ترقی اَتے خوشحالی ممکن نئیں، گورننس دی بہتری دی تجاویز بارے کمیٹی ٻݨائی ونڄے، وزیراعظم شہباز شریف

اسلام آباد۔ 11 جولائی (اے پی پی) وزیراعظم محمد شہباز شریف آکھیا جو پاکستان وسائل توں مالامال اے، نوجوان افرادی قوت ملک دا سب توں قیمتی اثاثہ اے، فرسودہ نظام کوں اڄوکے تقاضیاں نال ہم آہنگ کیتے بغیر پاکستان دی معاشی ترقی اَتے خوشحالی ممکن نئیں، وزارتاں دی کارکردگی ودھاوݨ اَتے ہر شعبے دے ماہرین دی خدمتاں حاصل کرݨ کیتے اصلاحاتی عمل کیتا ونڄے، بہترین افرادی قوت دی بھرتیاں، وزارتاں کوں جدید نظام نال ہم آہنگ کرݨ اَتے اصلاحات نال گورننس دی بہتری دی تجاویز بارے کمیٹی ٻݨائی ونڄے۔جمعہ کوں وزیراعظم آفس دے میڈیا ونگ توں جاری بیان موجب وزیراعظم دی سربراہی اچ اجلاس تھیا۔ اجلاس اچ وفاقی وزراء ڈاکٹر مصدق ملک، احد خان چیمہ، سردار اویس خان لغاری، شزا فاطمہ خواجہ، علی پرویز ملک، وزیر مملکت بلال اظہر کیانی، چیف کوآرڈینیٹر مشرف زیدی اَتے متعلقہ اعلیٰ حکام شرکت کیتی۔اجلاس اچ وزارت بجلی ولوں گورننس دی بہتری اَتے اصلاحات کیتے ماہرین تے مشتمل نظام تے تفصیلی بریفنگ ݙتی ڳئی۔ اجلاس کوں ݙسایا ڳیا جو نیشنل الیکٹرسٹی پلان دے تحت وزارت اچ 134 تزویراتی ہدایتاں تے عمل درآمد یقینی بݨایا ڳیا جئیں اچ وزارت پالیسی، نگرانی اَتے مستقبل دی منصوبہ بندی جݙاں جو شعبے دے ماہرین تے مشتمل ٹیکنیکل آرم عمل درآمد، جدت اَتے منصوبہ بندی کریندا پئے۔ اجلاس کوں شعبے دے ماہرین دی پروفائلز اَتے رائج کردہ نظام دے تحت وزارت دی موجودہ ورکنگ بارے وی تفصیلی بریفنگ ݙتی ڳئی۔وزیراعظم آکھیا جو ست ݙہاکیاں توں ایں ملک کوں جیں نظام نال چلاوݨ دی کوشش کیتی ڳئی، اوں نال پاکستان دی ترقی ممکن نئیں، فرسودہ نظام کوں اڄوکے تقاضیاں نال ہم آہنگ کیتے بغیر پاکستان دی معاشی ترقی اَتے خوشحالی ممکن نئیں، پاکستان وسائل توں مالامال ہے، پاکستان دی نوجوان افرادی قوت پاکستان دا سب توں قیمتی اثاثہ اے۔