نائب وزیرِاعظم اسحاق ڈار دی صدارت اچ ایس ایس جی سی ایل دے گیس دے غیر حساب شدہ ضیان دے معاملے تے اعلیٰ سطحی کمیٹی دا اجلاس

اسلام آباد۔2 اکتوبر(اے پی پی) نائب وزیرِاعظم و وزیرِ خارجہ سینیٹر محمد اسحاق ڈار سوئی سدرن گیس کمپنی لمیٹڈ (ایس ایس جی سی ایل) دے گیس دے ودھدے غیر حساب شدہ ضیان (یو ایف جی) دے مسئلے تے اعلیٰ سطحی کمیٹی دے اجلاس دی صدارت کیتی۔ترجمان دفترِ خارجہ توں جاری بیان موجب کمیٹی کوں ایس ایس جی سی ایل دے نیٹ ورک کوں درپیش اہم آپریشنل چیلنجز، مالی اثرات تے ودھدے ترسیلی ضیان تے بریفنگ ݙتی ڳئی۔ اجلاس اچ غیر قانونی کنکشنز روکݨ ، پائپ لائن دے بنیادی ڈھانچے دی بہتری، محصولات دی وصولی اچ ودھارے تے جائز صارفین کیتے گیس ݙیوݨ مستحکم بݨاوݨ کیتے تزویراتی اقدامات دا جائزہ ڳھدا ڳیا۔نائب وزیرِاعظم و وزیرِ خارجہ بلوچستان اچ توانائی دے تحفظ کوں یقینی بݨاوݨ دے نال نال ایس ایس جی سی ایل دی آپریشنل تے مالیاتی پائیداری بحال کرݨ دی اہمیت تے زور ݙتا۔ انہاں متعلقہ حکام کوں ہدایت کیتی جو یو ایف جی ضیان اچ کمی، سخت ضابطیں دے نفاذ، عوامی وسائل دے تحفظ تے عوامی سہولت کوں یقینی بݨاوݨ کیتے ہدف تے مقررہ مدت تے مبنی حکمتِ عملی وضع کیتی ونڄے۔اجلاس اچ وفاقی وزیرسائنس و ٹیکنالوجی خالد حسین مگسی، وفاقی وزیرپیٹرولیم علی پرویز ملک، وفاقی وزیر پبلک افیئرز یونٹ رانا مبشر اقبال، وزیراعظم دے معاونِ خصوصی طارق باجوہ، سیکرٹری داخلہ، سیکرٹری پیٹرولیم، چیف سیکرٹری بلوچستان، تے وزارتِ توانائی و وزارتِ خارجہ دے سینئر حکام شرکت کیتی۔