عالمی برادری مسئلہ کشمیر دے پرامن حل اَتے کشمیری عوام دے حق خود ارادیت دی حمایت کرے، نائب وزیراعظم محمد اسحاق ݙار دا آسیان ریجنل فورم دے وزارتی اجلاس نال خطاب

کوالالمپور / اسلام آباد۔ 11 جولائی(اے پی پی)نائب وزیراعظم اَتے وزیر خارجہ سینیٹر محمد اسحاق ݙار آکھیے جو پاکستان ہک مستحکم اَتے تعاون تے مبنی ایشیا پیسیفک دی تشکیل اچ آسیان دے مرکزی کردار کوں قدر نال ݙیھدے، پاکستان ہک سیکٹرل ݙائیلاگ پارٹنر اَتے اے آر ایف دے رکن دے طور تے آسیان دے انضمام، پائیداری اَتے امن دے تزویراتی اہداف کیتے اپݨی مکمل حمایت ݙیندے۔ اے ڳالھ انہاں کوالالمپور اچ آسیان ریجنل فورم دے 32ویں وزارتی اجلاس نال خطاب اچ آکھی۔ انہاں آکھیا جو اے آر ایف اعتماد سازی اَتے علاقائی مکالمے کیتے ہک اہم پلیٹ فارم اے، پاکستان 2025 دے بعد دا ایکشن پلان تیار کرݨ کیتے آسیان دے اقدام دا خیر مقدم کریندے، امید اے جو نویں منصوبہ غیر روایتی سلامتی دے خطرات جھیاں موسمیاتی تبدیلی، وبائی امراض، سائبر خطرات، میری ٹائم سکیورٹی اَتے آفات دے ردعمل کوں ترجیح ݙیسی۔ انہاں آکھیا جو 46ویں آسیان سربراہی اجلاس دی کامیابی نال میزبانی کرݨ تے ملائیشیا کوں وی مبارکباد ݙیندے ہیں۔ نائب وزیراعظم آکھیا جو ساݙا اپݨا خطہ جنوبی ایشیا غیر حل شدہ تنازعات نال منسلک سکیورٹی چیلنجاں دا سامݨا کریندا پئے، انہاں اچوں جموں و کشمیر دا تنازعہ سرفہرست اے جو علاقائی عدم استحکام دا مرکز اے۔ انہاں آکھیا جو پاکستان مسلسل جموں و کشمیر دے تنازعے کوں اقوام متحدہ دی سلامتی کونسل دیاں قرارداداں اَتے کشمیری عوام دیاں امنگاں دے مطابق منصفانہ اَتے پرامن حل کرݨ دی وکالت کیتی اے۔ سینیٹر محمد اسحاق ݙار آکھیا جو 22 اپریل 2025 کوں بھارت دے غیر قانونی طور تے زیر تسلط جموں و کشمیر اچ پہلگام اچ پیش آوݨ آلے واقعے دے بعد بھارت بغیر کہیں مصدقہ ثبوت یا تحقیقات دے پاکستان تے الزام لایا،26  اپریل کوں پاکستان غیر جانبدارانہ تحقیقات دی تجویز ݙتی، بھارت ایندے بجائے جارحیت دا رستہ چݨیے اَتے 7 مئی کوں بلا اشتعال حملہ کیتا جیںدے اچ عام شہری ماریے ڳئے اَتے بنیادی ڈھانچے کوں نقصان پُڄئے۔ پاکستان ولدے اچ اقوام متحدہ دے چارٹر دے آرٹیکل 51 دے تحت اپݨے دفاع دا حق استعمال کیتا، 7 اَتے 10 مئی کوں ساݙی ایئر فورس اَتے فوجی ردعمل تحمل اَتے ذمہ داری ݙکھیندے صرف فضائیہ اَتے فوجی اثاثیاں کوں نشانہ بݨایا۔ انہاں آکھیا جو پاکستان دے ردعمل دی رہنمائی ایںدی خودمختاری کوں برقرار رکھݨ اَتے جارحیت کوں روکݨ کیتے ضروری ہئی، ہک نام نہاد “نویں معمول” دا غیر قانونی تصور جیںدی بنیاد استثنا، یکطرفہ پسندی اَتے طاقت دے استعمال تے رکھی ڳئی اے، نا تاں قابل اعتبار اَتے نہ ہی قابل قبول اے۔ انہاں آکھیا جو ہکو جائز اصول او ہے جیںدیاں جڑاں باہمی احترام، پرامن بقائے باہمی اَتے بین الاقوامی قانون دے بنیادی اصولاں تے چلدن۔ انہاں آکھیا جو پاکستان اپݨے دفاع دے حق دے مطابق عزم اَتے ذمہ داری دے نال مستقبل دی کہیں وی جارحیت دا ولدا ݙیوݨ دا حق رکھدے۔ انہاں آکھیا جو بھارت دا سندھ آبی معاہدے کوں یکطرفہ طور تے روکݨ دا حالیہ فیصلہ ایںدی بین الاقوامی وعدیاں دی خلاف ورزی کوں ٻیا واضح کریندے، معاہدے اچ کہیں وی یکطرفہ کارروائی دی کوئی شق کائنی، بھارت دے اقدامات نال سندھ طاس تے انحصار کرݨ آلے لکھاں بندیاں کوں خطرہ اے اَتے اے بین الاقوامی اصولاں دی خلاف ورزی اے، عالمی برادری کوں اینڄھے رویے دا سنجیدگی نال نوٹس گھِنݨا چاہیدے جیڑھا عالمی قانونی نظام کوں نقصان پُچاوے۔ انہاں آکھیا جو اساں بھارت اَتے پاکستان وچال جنگ بندی کوں برقرار رکھے ہوئن، اساں ایںدے نفاذ کیتے پرعزم ہیں اَتے بین الاقوامی شراکت داراں دے کردار کوں منیندے ہیں جنہاں جنگ بندی کیتے سہولت ݙتی، اساں تنازعہ جموں و کشمیر دے پرامن حل اچ مدد کیتے انہاں دی پیشکش دے مشکور ہیں، پاکستان عالمی برادری تے زور ݙتے جو او مسئلہ کشمیر دے پرامن حل اَتے کشمیری عوام دے حق خود ارادیت دی حمایت کرے۔ انہاں آکھیا جو پاکستان دہشت گردی دے خلاف عالمی جنگ ودھ قربانیاں ݙتن۔ ایں جدوجہد اچ اساں 80,000 توں ودھ قیمتی جاناں ونڄائن اَتے 150 ارب ݙالر توں ودھ دا اقتصادی نقصان چاتے، اساں سرحدی کنٹرول، سائبر نگرانی اَتے انٹیلی جنس کوآرݙی نیشن بہتر بݨائی اے، پاکستان سرحد پار دہشت گردی دا نشانہ بݨیا ہویا اے، اساں پاکستان دے خلاف سرگرم دہشت گرد گروپاں دی بیرونی حمایت دے تفصیلی شواہد دے نال اقوام متحدہ دی سلامتی کونسل کوں ہک ݙوزیئر پیش کیتے۔ دہشتگردی دی ہر شکل دی ساریاں کوں مذمت کرݨی چاہیدی اے۔ انہاں آکھیا جو پاکستان افغانستان نال تعلقات چنڳے کرݨ دے ودھ اقدامات کیتن، ہک پرامن، مستحکم، متحد اَتے خوشحال افغانستان ساݙے اہم مفاد اچ اے، توقع اے جو افغان عبوری حکومت ایں گالھ کوں یقینی بݨاوݨ کیتے سارے ضروری اقدامات کریسی جو افغانستان دی سرزمین کہیں وی ریاست بالخصوص پاکستان دے خلاف دہشت گردی کیتے استعمال نہ تھیوے۔ انہاں آکھیا جو پاکستان ایران اَتے اسرائیل وچال جنگ بندی دا خیر مقدم کریندے، امید ہے جو ایران دے جوہری مسئلے کوں جبر دی بجائے سفارتکاری اَتے گالھ مہاڑ نال حل کیتا ویسی۔ انہاں آکھیا جو فلسطینی علاقیاں تے جاری اسرائیلی جارحیت ساݙے کیتے وݙی پریشانی دا باعث اے، اسرائیلی جارحیت کوں ختم کرݨ، انسانی ہمدردی دی بلا رکاوٹ رسائی کوں یقینی بݨاوݨ اَتے غیر قانونی طور تے قابض طاقت کوں اوں دے مظالماں کیتے جوابدہ بݨاوݨ کیتے فوری بین الاقوامی کارروائی ناگزیر اے۔ انہاں آکھیا جو اساں فلسطینی عوام دے حق خودارادیت دے ناقابل تنسیخ حق اَتے ہک آزاد، قابل عمل اَتے متصل فلسطینی ریاست دے قیام کیتے اپݨی غیر متزلزل اَتے اصولی حمایت دا اعادہ کریندے ہیں جیندا دارالحکومت القدس الشریف ہووے۔ پاکستان بحیرہ جنوبی چین تے علاقائی امن اَتے مذاکرات دیاں ساریاں کوششاں دی حمایت کریندے، ایں اہم خطے اچ امن کیتے عدم مداخلت، تحمل اَتے مشغولیت دی لوڑ اے، پاکستان عوامی جمہوریہ چین کوں تائیوان تے واحد قانونی اختیار تسلیم کریندے ہوئیں “ون چائنہ پالیسی” کیتے اپݨی مضبوط حمایت دا اعادہ کریندے۔