حکومت مکمل اقتصادی بحالی کیتے دیرینہ اصلاحات، ڈھانچہ جاتی تبدیلیاں اَتے میرٹ تے مبنی نظام کوں ترجیح ݙیوݨ کیتے پرعزم اے۔ وزیراعظم شہباز شریف دا اڑان پاکستان سمر سکالرز پروگرام کیتے منتخب طلباء نال خطاب

اسلام آباد۔ 12 جولائی (اے پی پی) وزیراعظم محمد شہباز شریف آکھیا جو حکومت مکمل اقتصادی بحالی کیتے دیرینہ اصلاحات، ڈھانچہ جاتی تبدیلیاں اَتے میرٹ تے مبنی نظام کوں ترجیح ݙیوݨ کیتے پرعزم اے۔ اے ڳالھیں انہاں ہفتے کوں اڑان پاکستان سمر سکالرز پروگرام کیتے منتخب طلباء نال خطاب کریندے ہوئیں کیتا۔وزیراعظم ے آکھیا جو میں انتہائی شکرگزار اَتے نہایت پرجوش ہاں جو علم تے دانش دے ستاریاں دی کہکشاں دے سامݨے موجود ہاں۔ وزیراعظم آکھیا جو میں احسن اقبال دا وی تہہ دل توں شکریہ ادا کرینداں جنہاں اڑان پاکستان دے تحت ایں شاندار اقدام دی بنیاد رکھی۔ میکوں یقین اے جو جیئں جیئں تساں اِے ہفتے اَتے مہینے لنگھیسو تساں کوں نظام حکمرانی اچ موجود کشمکش، دباؤ اَتے مصلحتاں کوں سمجھݨ اَتے سکھݨ دا موقع مِلسی۔وزیراعظم آکھیا جو جݙاں انہاں 2023 اچ حکومت سنبھالی تاں پاکستان کوں دیوالیہ تھیوݨ دے سنگین خطرے دا سامݨا ہا اَتے قوم دا مستقبل غیر یقینی حالات اچ ہا۔ انہاں آکھیا جو اکثریت دا خیال ہا جو پاکستان دیوالیہ تھی ویسی، جݙاں جو اقلیت دا منݨ ہا جو اساں ایں تباہی توں بچ نکلساں۔ انہاں ٻیا آکھیا جو انہاں آئی ایم ایف دی منیجنگ ڈائریکٹر نال طویل مذاکرات کیتے اَتے انہاں کوں یقین ݙیوا ݙتا جو پاکستان دیوالیہ نہ تھیسی اَتے آئی ایم ایف پروگرام کوں مکمل کریسی۔ خوش قسمتی نال آئی ایم ایف دے منیجنگ ڈائریکٹر نال میݙی تفصیلی گالھ مہاڑ دے نتیجہ اچ اساں ایں بحران تے قابو پا ڳھدا۔وزیراعظم آکھیا جو ایں ویلھے معیشت انتہائی خراب حالت اچ ہئی، مہنگائی دی شرح 38 فیصد تئیں پڄ ڳئی ہئی جݙاں جو پالیسی ریٹ 22.5 فیصد دی بُلند سطح تے ہا۔ ملک وچ کاروباری ماحول شدید غیر یقینی اَتے مایوسی دا شکار ہا، اگر گزریل سالاں دے مقابلہ اچ ݙٹھا ونڄے تاں اساں اِے بھاری ذمہ واری آپݨے مونڈھے تے چاتی جو اساں یگانگت دی طرف ویسوں، ایمانداری اَتے مقصدیت نال کم گھنسوں اَتے پوری سنجیدگی نال کوشش کریسوں اَتے بعد وچ نتیجہ اللہ تعالیٰ دی ذات تے چھوڑ ݙیسوں۔ وزیراعظم آکھیا جو آخر کار خوش قسمتی نال اساݙیاں اجتماعی کوششاں رنگ ڳھن آئی اَتے اج اساں اتھاں موجود ہیسے۔وزیراعظم آکھیا جو اساݙا پالیسی ریٹ 22.5 فیصد توں گھٹ تھی تے 11 فیصد تے آ ڳئے ۔ اَتے ٻئی کافی گنجائش موجود اے جو پالیسی ریٹ ٻیا گھٹ تھیسی اَتے ایں دا نتیجہ کیا ہوسی۔ لوک آپݨی رقماں بینکاں توں کݙھ تے انہاں جہیندی جاہ تے لیسن جِتھاں انہاں کوں ودھ فیدہ تھیسی۔ وزیراعظم آکھیا جو اڑان پاکستان پروگرام اپݨی اڑان بھر ڳھدی اے۔ اساکوں ایں کوں تکمیل تئیں پُڄاوݨ اچ فقط کجھ مہینے لڳ ڳئے اَتے میں ذاتی طور تے ماہرین، سیاسی رہنماواں، بیوروکریٹس دے نال کئی ملاقاتاں کیتی اَتے ول آخر کار اساں اڑان پاکستان کوں اتھاں تئیں گھن آوݨ وچ کامیاب تھی ڳئیوں۔ اتھاں اتساݙے جیھاں بہوں باصلاحیت انٹرنز دی حیثیت نال حاضر ہن اَتے میں بطور پاکستانی عوام دے خادم دی حیثیت نال اتھاں موجود ہاں، وزراء، بیوروکریٹس اَتے انہاں ماہرین دے نال اساں ہک لائحہ عمل مرتب کیتا جو بذات خود بہوں دشوار ہا اَتے جئیں تے عمل درآمد ہݨ وی بہوں مشکل ہے۔ ایجھیاں اصلاحات جو بہوں عرصے توں واجب ہن۔وزیراعظم نے فیڈرل بورݙ آف ریونیو (ایف بی آر) اچ اصلاحات اَتے ݙیجیٹائزیشن دا حوالہ ݙیندیں ہوئیں آکھیا جو ادارے توں کرپٹ عناصر کوں بغیر کہیں دباؤ یا سفارش دے کݙھیا ڳیا۔ انہاں آکھیا جو ایف بی آر توں کرپشن ختم کرݨ کیتے انہاں دے ذہن اچ بہوں واضح لائحہ عمل ہا اَتے انہاں ایجھے فیصلے کیتے جو ایں توں پہلے کݙاہیں نئیں کیتے ڳئے، اَتے انہاں وچ کہیں قسم دی ‘سفارش’ دی ثقافت کوں خاطر وچ نئیں لایا ڳیا۔وزیراعظم آکھیا جو میݙا اِے ایمان اے، پنجاب اچ چار لکھ لیپ ٹاپس میرٹ تے تقسیم کیتے ڳئے، ایں دوران میں تعلیم کیتے 20 ارب روپے دے وظائف میرٹ تے ݙتے۔ وزیراعظم آکھیا جو ایجھے ٻال اَتے ٻالڑیاں جو ٻہوں پسماندہ پس منظر توں تعلق رکھیندن، اساں انہاں کوں وظائف ݙتے اَتے اج او مختلف عالمی یونیورسٹیاں توں گریجویٹ تھی تے پیف اسکالرز بݨ ڳئن۔ او انجینئرز ہن، ݙاکٹرز ہن، استاد ہن۔ ایں موقع تے وزیراعظم نوجواناں دے سوالاں دے جواب وی ݙتے۔ہک طالب علم دے سوال دے جواب اچ وزیراعظم آکھیا جو پنجاب ایجوکیشن انڈوومنٹ فنڈ ہݨ پاکستان ایجوکیشن انڈوومنٹ فنڈ بݨ ڳئے اَتے جیئں جو میں پہلے وی آکھیے جو اِے مکمل طور تے میرٹ تے مبنی اے، اے فنڈ ہݨ فعال تھی ڳئے اَتے ظاہر اے اساں ہر گزردے ݙینھ دے نال ودھدیاں ہوئیاں ضرورتاں کوں مکمل طور تے پورا تاں نئیں کر سڳدے لیکن اگر میݙے کول فنڈز ہوون تاں میں انہاں کوں تہاݙے تعلیمی اخراجات تے خرچ کرݨ اچ ذرا وی ہچکچاہٹ محسوس نئیں کریساں لیکن انہاں فنڈز دی ہک حد ہوندی اے اَتے اوں حد دے اندر انشاءاللہ اساں ضرور ایں مسئلے کوں حل کریسوں اَتے اے مسئلہ میݙے دل دے نیڑے اے۔طالبہ دے ہک سوال دے جواب اچ وزیراعظم آکھیا جو پاکستان انہاں ݙا بدقسمت ملکاں اچ شامل ہے جو ماحولیاتی تبدیلی توں متاثر تھیوݨ پئن۔ 2022 اچ اساکوں ایں دی شدت دا سامݨا کرݨا پیا جݙاں خاص طور تے سندھ اَتے بلوچستان دے وݙے علاقے زیر آب آ ڳئے ہن۔ ساݙی معیشت کوں 30 ارب ڈالر دا نقصان تھیا۔ ایں گالھ کوں ذہن اچ رکھو جو ماحولیاتی تبدیلی اچ گرین ہاؤس گیسز دے اخراج اچ اساݙا حصہ نہ ہووݨ دے برابر ہا ایں دے باوجود اساں سب توں ودھ متاثرہ ملک ہیسے۔انہاں آکھیا جو پاکستان کوں مئی دے مہینے اچ بلاجواز جارحیت دا نشانہ بݨایا ڳیا، پہلگام دا واقعہ افسوسناک ہا اَتے ہے اَتے پاکستان دا ایں وچ کوئی کردار نئیں ہا۔ میں اپݨے مشرقی ہمسائے کوں سیدھی پیشکش کیتی جو آؤ ایں معاملے دی تحقیقات ہک بین الاقوامی ادارے توں کریندوں، جئیں وچ ایجھے ملک شامل ہون جنہاں تے ݙوہیں ملک متفق ہون، بھارت ایں تجویز تے تبصرہ تئیں نئیں کیتا، رضامندی یا مخالفت دی تاں گالھ الگ ہے۔ ول 6 اَتے 7 مئی کوں پاکستان تے حملہ کر ݙتا جئیں دے نتیجہ اچ بہاولپور اَتے ݙوجھے علاقیاں اَتے آزاد جموں تے کشمیر وچ 55 بے گناہ پاکستانی شہید تھئے اَتے سینکڑیاں زخمی تھی ڳئے، اساں اپݨے وطن دا دفاع کیتا جو ساݙا بنیادی فرض اَتے ذمہ داری ہئی، آپݨے ایں دفاع وچ 6 بھارتی طیارے مار ݙھائے اَتے ول لیکن جیئں جو اِے کافی نہ ہووے 9 اَتے 10 مئی دی وچکارلی رات بھارت ݙو واری حملہ کیتا، ول 10 مئی دی سویل اساں بھرپور جوابی کارروائی کیتی اَتے دشمن کوں حقیقی معنیاں اچ ہک سبق سکھایا۔وزیراعظم آکھیا جو اساݙا ایٹمی پروگرام صرف آپݨے دفاع کیتے اے اے جارحیت کیتے نئیں۔ اللہ تعالیٰ تساں ساریاں کوں آپݨے حفظ و امان اچ رکھے، پاکستان پائندہ باد۔