وزیراعظم دی اڳواݨی اچ پرائم منسٹر فیول ریلیف اسکیم دی اڳونہی بارے جائزہ اجلاس، حکومت دے ویلھے سر اقدامات نال لوک فیول سبسڈی توں فیدہ چیندے پئن، شہبازشریف

اسلام آباد۔1 اکتوبر(اے پی پی)وزیراعظم شہباز شریف دی اڳواݨی اچ “پرائم منسٹر فیول ریلیف اسکیم” دی اڳونہی بارے جائزہ اجلاس تھئے۔ اجلاس اچ وزیر اعظم کوں اسکیم تے عملدرآمد اتے ہݨ تئیں دی اڳونہی دا ݙسایا ڳیا جو جو اسکیم دے تحت موٹر سائیکل، رکشہ اتے 800 سی سی تئیں دیاں گاݙیاں دے مالکان کوں فیول سبسڈی ملدی پئی اے، ہݨ تئیں 84 لکھ توں ودھ لوک رجسٹرڈ تھی چکین،75 لکھ توں ودھ شہری اسکیم توں فیدہ چا چکین۔ بریفنگ اچ ݙسایا ڳیا جو پیٹرول سبسڈی دی شروعات توں ہݨ تئیں جاری کیتے ڳئے ہک کروڑ 22 لکھ ٹوکنز اچوں ہک کروڑ 3 لکھ ٹوکنز استعمال تھی چکین۔ 15 ستمبر توں شروع تھیوݨ والی اسکیم ہݨ تریڄھے ہفتے اچ ویندی پئی اے، پہلی اتے ݙوڄھیو اری فیول سبسڈی ڳھنݨ والے شہری آندے ہفتے دی سبسڈی وی ڳھن سڳسن۔ وزیراعظم ودھدیاں پیٹرولیم قیمتاں سانڳے گھٹ آمدن اتے متوسط طبقے کوں ریلیف ݙیوݨ دا حکومتی عزم دوہریندے آکھیے جو فیول سبسڈی اسکیم پوری حکومتی مشینری دے مؤثر، مربوط تعاون اتے مشترکہ کوششاں دی بہترین مثال اے۔ انہاں فیول سبسڈی اسکیم تے عملدرآمد کیتے پوری حکومتی ٹیم دی کارکردگی کوں سراہیا اتے نائب وزیراعظم، وزیر آئی ٹی، وزیر اطلاعات، وزیر اقتصادی امور، وزیر خزانہ، اوگرا سودھا اسکیم نال جڑیے سارے وفاقی و صوبائی حکام دیاں کوششاں دی تعریف کیتی۔ اجلاس اچ ݙسایا ڳیا جو ملک بھر دے 129 اضلاع اچ پیٹرول سبسڈی اسکیم تے عملدرآمد جاری اے اتے سارے پیٹرول پمپ شہریاں کوں اسکیم دے تحت سہولت ݙیندے پئن۔ بریفنگ دے مطابق شہریاں اتے پیٹرول پمپ مالکان دی رہنمائی کیتے 24 گھنٹے فعال کال سینٹر قائم اے، وزیراعظم آفس دا پبلک افیئرز یونٹ اتے عوامی نمائندے شہریاں دی رجسٹریشن اچ ہتھ ونڈیندے پئن۔ وزیراعظم آکھیا جو فیول سبسڈی اسکیم نال ٻݨݨ والا مستحکم ڈیٹا بیس مستقبل اچ وی شہریاں دی معاونت کیتے استعمال کیتا ویسی۔ اجلاس اچ نائب وزیراعظم و وزیرِ خارجہ محمد اسحاق ڈار، وفاقی وزراء احد خان چیمہ، عطاء اللہ تارڑ، شزا فاطمہ خواجہ، علی پرویز ملک، محمد اورنگزیب، وزیرِ مملکت برائے خزانہ بلال اظہر کیانی، معاونِ خصوصی طارق باجوہ تے متعلقہ اداریاں دے اعلیٰ افسران شرکت کیتی۔