کشمیری عوام جیہڑی عظیم جدوجہد کوں اڳوں ودھیندے پئن، او انہاں 22 شہداء دی قربانیاں دا تسلسل اے جنہاں سرینگر جیل دے باہر ظلم تے جبر دے خلاف اَتے حق آزادی کیتے جاناں دا نذرانہ پیش کیتا، صدر مملکت آصف علی زرداری

اسلام آباد۔ 13 جولائی (اے پی پی) صدر مملکت آصف علی زرداری آکھیا جو یوم شہدائے کشمیر دے موقع تے انہاں 22 عظیم کشمیری شہداء کوں خراج عقیدت پیش کرینداں جنہاں 13 جولائی 1931 کوں سرینگر جیل دے باہر ظلم تے جبر دے خلاف اَتے حق آزادی دی خاطر آپݨی جاناں دا نذرانہ پیش کیتا، اڄ کشمیری عوام جیہڑی عظیم جدوجہد کوں اڳوں ودھیندے پئن او انہاں 22 شہداء دی قربانیاں دا تسلسل اے۔ ایوان صدر دے پریس ونگ توں جاری بیان موجب صدر مملکت آصف علی زرداری 13 جولائی کوں یوم شہدائے کشمیر دے موقع تے پیغام اچ آکھیا جو انہاں دی جاں نثاری کشمیری قوم دے دلاں اچ آزادی دی جیہڑی شمع جلائی، او اڄ وی روشن اے۔ صدر مملکت آکھیا جو پاکستان کشمیری عوام دی بہادری، عزم اَتے قربانیاں کوں خراج تحسین پیش کریندے، جو ݙہاکیاں توں بھارتی تسلط دے خلاف ڈٹ تے کھڑن اَتے آپݨی آزادی کیتے جدوجہد جاری رکھیے ہوئن۔ صدر آصف علی زرداری آکھیا جو بھارت دے غیر قانونی زیر تسلط مقبوضہ جموں تے کشمیر کوں ہک عسکری قید خانہ بݨا ݙتا ڳیا جِتھاں ماورائے عدالت قتل، جبری گمشدگیاں، سیاسی قید، آبادی دا تناسب تبدیل کرݨ دی کوششاں اَتے مسلماناں دی شناخت مٹاوݨ دی منظم سازشاں جاری ہن۔ صدر مملکت آکھیا جو اڄ اساں انہاں شہداء اَتے ݙوجھے سارے کشمیراں کوں سلام پیش کریندن جنہاں آزادی کیتے اپݨی جاناں دا نذرانہ پیش کیتا۔ صدر مملکت آکھیا جو میں عالمی برادری، انسانی حقوق دی تنظیماں توں اپیل کرینداں جو او مقبوضہ کشمیر اچ جاری بھارتی ریاستی دہشت گردی اَتے انسانی حقوق دی سنگین خلاف ورزیاں دا فوری نوٹس گھِنن۔ انہاں آکھیا جو پاکستان کشمیری بھراواں دی سیاسی، اخلاقی اَتے سفارتی حمایت ایں ویلھے تئیں جاری رکھیسی جݙاں تئیں انہاں کوں اقوام متحدہ دی سلامتی کونسل دی قرارداداں دے مطابق حق خودارادیت حاصل نئیں تھی ویندے۔