مون سون بارشاں دا تریجھا سلسلہ 17 جولائی تئیں جاری رہݨ دی پیشنگوئی اے، پی ڈی ایم اے پنجاب

لاہور۔ 14 جولائی (اے پی پی) پنجاب دے کئی ضلعیاں اچ آندے 24 گھنٹیاں اچ بارش دا امکان اے، مون سون بارشاں دا تریجھا سلسلہ 17 جولائی تئیں جاری رہݨ دی پیشنگوئی اے۔ ڈائریکٹر جنرل پروونشل ڈیزاسٹر مینجمنٹ اتھارٹی (پی ڈی ایم اے) پنجاب عرفان علی کاٹھیا ݙسایا جو پنجاب دے کئی دریاواں تے ندی نالیاں اچ پاݨی دا بہاؤ نارمل سطح تے اے۔ دریائے سندھ اچ تونسہ دے مقام تے درمیانے درجے دا سیلاب اے۔ دریائے سندھ اچ تونسہ دے مقام تے پاݨی دا بہاؤ 4 لکھ 26 ہزار کیوسک اے۔ چناب، راوی، جہلم اَتے ستلج وچ پاݨی دا بہاؤ نارمل سطح تے اے۔ راجن پور ہل ٹورنٹس اچ وی پاݨی دا بہاؤ نارمل اے۔ ڈیرہ غازی خان وݙور رودکوہی توں اُوچے درجے دا سیلابی ریلا لنگھدا پئے۔انہاں ݙسایا جو ہنگامی صورتحال پاروں ضلعی انتظامیہ اَتے متعلقہ ادارے الرٹ ہن۔ مون سون بارشاں پاروں دریاواں تے ندی نالیاں وچ پاݨی دے بہاؤ ٻیا ودھ سڳدے۔ وزیر اعلیٰ پنجاب دی ہدایت تے پی ڈی ایم اے تے متعلقہ ادارے الرٹ ہن۔ شہریاں دے تحفظ کیتے سارے وسائل استعمال کیتے ویندے پئن۔ عوام توں درخواست اے جو مون سون بارشاں اچ احتیاطی تدابیر اختیار کرن۔ترجمان پی ڈی ایم اے پنجاب دے مطابق گزریل 24 گھنٹیاں اچ اوکاڑہ اچ 72 ملی میٹر، ساہیوال اچ 66، ڈیرہ غازی خان اچ 51، میانوالی اچ 38 اَتے بہاولپور اچ 36 ملی میٹر، کوٹ ادو اچ 33، گوجرانوالہ اچ 30، لیہ اچ 23 اَتے مری اچ 22 ملی میٹر بارش ریکارڈ کیتی ڳئی۔