اندرلی اَتے قومی سلامتی یقینی بݨاوݨ کیتے فرنٹیئر کانسٹیبلری کوں وفاقی کانسٹیبلری وچ تبدیل کیتا ویندا پئے، وزیرمملکت داخلہ سینیٹر طلال چوہدری دی پریس کانفرنس

فیصل آباد ۔ 14 جولائی (اے پی پی) مسلم لیگ (ن) دے رہنما اَتے وزیر مملکت داخلہ سینیٹر طلال چوہدری آکھیے جو پاکستان دی اندرلی اَتے قومی سلامتی یقینی بݨاوݨ کیتے فرنٹیئر کانسٹیبلری (ایف سی) کوں وفاقی کانسٹیبلری وچ تبدیل کیتا ویندا پئے۔ڈپٹی کمشنر آفس وچ ایف سی دے کمانڈنٹ ریاض نذیر گاڑا نال پریس کانفرنس توں خطاب کریندے وزیر مملکت آکھیا جو پاکستان وچ اندرلے ملک اَتے سرحداں تے امن و امان دی صورتحال کوں بہتر بݨاوݨ وچ فرنٹیئر کانسٹیبلری ٻہوں چنڳی خدمات ݙتن۔ انہاں آکھیا جو اڄ توں تقریباً سو سال پہلے فرنٹیئر کانسٹیبلری دا قیام عمل وچ آیا ہئی مگر افسوس دی ڳالھ اے جو ایں فورس دے جواناں دیاں قربانیاں کوں او درجہ نی ݙتا ڳیا جیڑھا پاکستان دیاں ݙوجھیاں فورسز دے جواناں کوں مِلدا پئے۔انہاں آکھیا جو فرنٹیئر کانسٹیبلری گھٹ تنخواہواں اَتے تھوڑیاں مراعات دے باوجود ہر موقع تے پاکستان دی ودھ چڑھ تے خدمت کیتی اے۔ ایں وجہ توں وزیراعظم پاکستان میاں شہباز شریف اَتے وفاقی وزیر داخلہ محسن نقوی فرنٹیئر کانسٹیبلری دی نوں سروں تشکیل ݙیوݨ دے نال نال ایں کوں وفاقی کانسٹیبلری بݨاوݨ دا فیصلہ کیتے۔ انہاں آکھیا جو کجھ لوکاں دا خیال اے جو فرنٹیئر کانسٹیبلری کوں وفاقی پولیس بݨایا ویندا پئے، ایجھا بالکل وی کائںی، اے کانسٹیبلری اے اَتے کانسٹیبلری ہی رہسی، صرف ایں دا ناں فرنٹیئر کانسٹیبلری توں بدال تے وفاقی کانسٹیبلری رکھیا ڳئے تاں جو ایں فورس دے جواناں کوں پاکستان دیاں ݙوجھیاں فورسز دے برابر تنخواہواں اَتے مراعات مِل سڳن۔انہاں آکھیا جو فرنٹیئر کانسٹیبلری پہلے وی منشیات اَتے اسمگلنگ دے کنٹرول دے نال نال ملک وچ امن و امان دی صورتحال بہتر بݨاوݨ کیتے خدمات سرانجام ݙیندی رہی اے اَتے ناں دی تبدیلی دے بعد وی اِے فورس اوویں کم کریندی رہسی۔ بلکہ وفاقی کانسٹیبلری بݨݨ دے بعد ایں دا دائرہ کار ملک دے چارے صوبیں سودھے گلگت بلتستان اَتے آزاد کشمیر تئیں ودھ ویسی۔ انہاں آکھیا جو فرنٹیئر کانسٹیبلری دی ری ویمپنگ اَتے ری سٹرکچرنگ دے بعد ایں کوں وفاقی فورس دا درجہ مِل ویسی جیں دے بعد ایں وچ پاکستان دے سارے صوبیں توں لوک بھرتی کیتے ویسن۔انہاں ݙسایا جو ری ویمپنگ دے بعد وفاقی کانسٹیبلری دے جواناں دی تربیت، انہاں دا بجٹ، انہاں دیاں تنخواہواں اَتے ݙوجھیاں مراعات وفاقی حکومت دے ذمے ہوسن تاں جو کِہیں وی صوبے تے ایں دا کوئی مالی ٻوجھ نہ پووے۔ انہاں آکھیا جو ایف سی دیاں خدمات اَتے ایں دیاں قربانیاں کوں منیندے ہوئیں ایں دی کپیسٹی بلڈنگ، ٹریننگ اَتے آپریشنل ضرورتاں موجب ری سٹرکچر کیتا ویندا پئے۔انہاں زور ݙے تے آکھیا جو اے فرنٹیئر کانسٹیبلری دے ناں دی تبدیلی دا فیصلہ کہیں سیاسی ایجنݙے دے تحت کائنی بلکہ اِے کم مکمل ادارہ جاتی ضرورت دے تحت کیتا ڳئے کیوں جو ایف سی قیام پاکستان توں پہلے وی اَتے بعد وچ وی ہر قومی ایونٹ وچ اپݨی موجودگی اَتے خدمات کوں ثابت کیتے۔ انہاں آکھیا جو عوام، صحافی اَتے ݙوجھے متعلقہ حلقے ایف سی دے آرڈیننس کوں مکمل طور تے پڑھن تاں جو کِہیں وی قسم دی غلط فہمی پیدا نہ تھیوے۔ انہاں آکھیا جو اِے قدم پاکستان دی اندرلی سلامتی کوں مؤثر بݨاوݨ اَتے موجودہ چیلنجز نال نبڑݨ دی قومی ضرورت اے اَتے ایف سی اپݨے تاریخی ورثے دے نال ایں نویں ساخت وچ وی مثالی خدمات سرانجام ݙیندی رہسی۔ایف سی کمانڈنٹ ریاض نذیر گاڑا ایں موقع تے ڳالھ مہاڑ کریندے ݙسایا جو ایف سی دے 423 جواناں ہݨ تئیں اپݨیاں جاناں دا نذرانہ پیش کرتے جام شہادت نوش کیتے۔ انہاں ݙسایا جو فرنٹیئر کانسٹیبلری دا قیام 1913 وچ تھیا ہئی۔ اوں ویلھے ایں کوں نارتھ ویسٹ فرنٹیئر کانسٹیبلری وی آکھیا ویندا ہئی، انہاں آکھیا جو فرنٹیئر کانسٹیبلری ہک ایکٹ دے تحت کم کریندی پئی اے۔ ہݨ ایں ایکٹ کوں سو سال توں ودھ عرصہ تھی چُکیے جیں وچ تبدیلی ویلھے دی اہم لوڑھ اے ۔ ایں ضرورت کوں سامݨے رکھیندے ایں فرنٹیئر کانسٹیبلری کوں ری آرگنائز کیتا ویندا پئے۔انہاں ݙسایا جو ایف سی دے اندر ترائے لیولز ہن۔ ایں وچ پلاٹونز، کمپنیاں اَتے ونگز کم کریندن۔ انہاں ݙسایا جو فرنٹیئر کانسٹیبلری دے 41 ونگز ہن جنہاں وچوں 36 ونگ سکیورٹی ڈویژن متعلق ہن۔ انہاں ݙسایا جو فرنٹیئر کانسٹیبلری ملکی فورس دی سپورٹ کیتے محرم، پولیو اَتے الیکشن سودھے مختلف اہم موقعیں تے خدمات سرانجام ݙیندی رہی اے۔ انہاں ݙسایا جو ایں فورس کوں ری آرگنائز کرݨ دا مقصد صرف اَتے صرف کمانڈ سٹرکچر اَتے ایں دے جواناں دے مورال کوں بہتر بݨاوݨا اے۔