وزیراعظم دی چھوٹے اَتے وچلے درجے دے کاروباری طبقے کیتے ڈیجیٹائزیشن اَتے کیش لیس اکانومی مرحلے سوکھے کرݨ دی ہدایت

اسلام آباد۔14 جولائی(اے پی پی) وزیراعظم محمد شہباز شریف چھوٹے اَتے وچلے درجے دے کاروباری طبقے کیتے ڈیجیٹائزیشن اَتے کیش لیس اکانومی مرحلے سوکھے کرݨ، راست دے بورڈ آف گورنرز اَتے چیئرمین دی تقریری ستمبر تئیں مکمل کرݨ اتے ایندے اچ معیشت اَتے کاروباری ماہراں کوں رلاوݨ دی ہدایت کیتی اے۔ او اسلام آباد اچ کیش لیس و ڈیجیٹل معیشت بارے ہفتہ وار اجلاس دی اڳواݨی کریندے پئے ہن۔ وزیراعظم آکھیا جو معیشت دے ڈیجیٹائزیشن سسٹم اچ شفافیت حکومت ترجیح اے، حکومت توں عوام اَتے عوام توں حکومت دیاں ادائیگیاں دے طریقہ کار دی ڈیجیٹائزیشن نال شفافیت اَتے صارفین کیتے سوکھ پیدا تھیسی، چھوٹے اَتے وچلے درجے دے کاروباری طبقے کیتے ڈیجیٹائزیشن اَتے کیش لیس اکانومی مرحلے سوکھے کیتے ونڄن، راست دے بورڈ آف گورنرز اَتے چیئرمین دی تقریری ستمبر تئیں مکمل کیتی ونڄے اتے راست دے بورڈ آف ڈائریکٹرز اچ معاشی اَتے کاروباری ماہراں کوں رلایا ونڄے، سارے ریاستی ملکیتی اداریاں (ایس او ایز) کوں وی ڈیجیٹل نظام دے دائرہ کار اچ پاتا ونڄے، ایں سانڳے ڈیجیٹل معیشت دو تیکھے اڳونہی تھیوݨی چاہیدی اے۔ اجلاس اچ کیش لیس و ڈیجیٹل معیشت رائج کرݨ دے اقدامات دا ݙسایا ڳیا جیندے اچ راست دے چیف ایگزیکٹو افسر دی تعیناتی، موبائل فون ایپلی کیشنز اَتے ڈیجیٹل بینکنگ استعمال کرݨ آلے صارفین دی تعداد، ڈیجیٹل ادائیگیاں اتے ایں سانڳے ملک گیر عوامی آگاہی مہم دی پیشرفت دے اقدامات شامل ہین۔ اجلاس کوں ڈیجیٹل پے منٹس انڈیکس دے اجراء، اسلام آباد اچ ڈیجیٹل پبلک انفراسٹرکچر دے رائٹ آف وے دی منظوری، ترسیلات زر دی ڈیجیٹائزیشن بریفنگ ݙتی ڳئی۔ ݙسایا ڳیا جو کیش لیس اکانومی کوں رائج کرݨ کیتے پہلے مرحلے اچ سرکاری ملازماں دی تنخواہاں، پینشنز اَتے کنٹریکٹرز توں خرید و فروخت دی ادائیگی مکمل طور تے ڈیجیٹل طریقے نال کیتی ویسی۔ اجلاس اچ وفاقی وزیر اقتصادی امور احد خان چیمہ، وفاقی وزیر قانون و انصاف اعظم نذیر احمد، وفاقی وزیر انفارمیشن ٹیکنالوجی و ٹیلی کام شزا فاطمہ، وفاقی وزیر پٹرولیم علی پرویز ملک، وزیراعظم دے مشیر ڈاکٹر توقیر شاہ، وزیر مملکت برائے خزانہ و ریلوے بلال اظہر کیانی اَتے متعلقہ اعلیٰ سرکاری افسران شرکت کیتی۔