پاکستان تے انڈونیشیا وچال سانجھی ثقافت، مذہب تے تاریخی رشتیاں دی بنیاد تے دوستانہ تعلقات ہن، وزیراعظم شہباز شریف دی انڈونیشیا دے وزیر دفاع نال ملاقات اچ ڳالھ مہاڑ

اسلام آباد۔15جولائی (اے پی پی) وزیراعظم محمد شہباز شریف انڈونیشیا نال اقتصادی تے تزویراتی تعلقات اتے تجارت، دفاع تے دفاعی پیداوار سودھے سارے شعبیاں اچ ݙوپاسہ تعاون ودھاوݨ دا عزم کریندیں ہوئیں آکھیا جو پاکستان تے انڈونیشیا وچال سانجھی ثقافت، مذہب تے تاریخی رشتیاں دی بنیاد تے دوستانہ تعلقات ہن اتے  ݙوہیں ملک بین الاقوامی فورمز تے ہک ݙوجھے دی حمایت کریندن۔ وزیراعظم آفس دے میڈیا ونگ توں جاری بیان موجب انہاں اے گالھ انڈونیشیا دے وزیر دفاع لیفٹیننٹ جنرل (ر) سیافری سمسودین نال گالھ مہاڑ کریندیں ہوئیں آکھی، جنہاں منگل کوں اسلام آباد اچ انہاں نال ملاقات کیتی۔وزیراعظم انڈونیشیا دے صدر پرابوو سوبیانٹو نال قاہرہ اچ جی ایٹ سربراہی اجلاس دے موقع تے آپݨی خوشگوار ملاقات دی یاداں تازہ کریندیں ہوئیں انہاں سانگے نیک خواہشات دا اظہار کیتا۔ ملاقات اچ پاکستان اتے انڈونیشیا وچال ڳھاٹے تاریخی، برادرانہ تے دوستانہ ݙوپاسہ تعلقات تے گالھ مہاڑ کیتی ڳئی۔ وزیراعظم آکھیا جو پاکستان تے انڈونیشیا وچال سانجھی ثقافت، مذہب تے تاریخی رشتیاں تے مبنی دیرینہ دوستانہ تعلقات ہن اتے ݙوہیں ملک بین الاقوامی فورمز تے ہک ݙوجھے دی حمایت کریندن۔ وزیراعظم پاکستان دے انڈونیشیا نال اقتصادی تے تزویراتی تعلقات اتے تجارت، دفاع تے دفاعی پیداوار دے شعبیاں سودھے سارے شعبیاں اچ ݙوپاسہ تعاون ودھاوݨ دا عزم کیتا۔ملاقات اچ ݙوہیں رہنماواں کثیرالجہتی ݙوپاسہ تعاون کوں ودھاوݨ دی اہمیت تے زور ݙتا۔ وزیراعظم شہباز شریف آپسی طور تے مفید منصوبیاں اچ سرمایہ کاری سانگے انڈونیشیا نال تعاون کوں ٻیا ودھاوݨ تے زور ݙتا۔ وزیراعظم پاکستان تے انڈونیشیا وچال دفاعی تعاون دے معاہدے دے تحت جاری اقدامات دا وی جائزہ گھدا۔ ݙوہیں رہنماواں ایں معاہدے دے نفاذ کوں تیز کرݨ تے اتفاق کیتا۔ لیفٹیننٹ جنرل (ر) سیافری سمسودین انڈونیشیا دے صدر پرابوو سوبیانٹو ولوں وزیراعظم محمد شہباز شریف تے پاکستان دی عوام سانگے نیک خواہشات دا اظہار کیتا۔ انہاں انڈونیشیا دی پاکستان نال دفاعی تعلقات کوں ٻیا مضبوط بݨاوݨ اتے مختلف شعبیاں خاص طور تے دفاعی پیداوار اچ تعاون دے ٻئے موقعے لبھݨ دی خواہش کیتی۔