پورے ملک اچ دانش سکولاں دے ٻݨݨ نال ہزاراں ٻال فیدہ چیسن، معاشی طور تے کمزور طبقے دے ٻالاں دی خدمت دا جیڑھا خواب ݙٹھا ہا او پورا تھیندا پئے: وزیراعظم محمد شہباز شریف

اسلام آباد ۔15 جولائی (اے پی پی) وزیراعظم محمد شہباز شریف ٻالاں کوں بین الاقوامی معیار دی تعلیم تے تربیت ݙیوݨ کوں آپݨی پہلی ذمہ واری قرار ݙیندیں ہوئیں آکھیا جو پورے ملک اچ دانش سکولاں دے ٻݨݨ نال ہزاراں ٻال فیدہ چیسن، معاشی طور تے کمزور طبقے دے ٻالاں دی خدمت دا جیڑھا خواب ݙٹھا ہا او پورا تھیندا پئے۔پی ایم آفس دے میڈیا ونگ دے جاری بیان موجب وزیراعظم اے ڳالھیں آپݨی صدارت اچ ملک بھر اچ دانش سکولاں اتے اسلام آباد اچ دانش یونیورسٹی دی تعمیر بارے پیشرفت بارے منگل کوں تھیوݨ آلے جائزہ اجلاس توں خطاب کریندیں ہوئیں کیتی۔اجلاس اچ وفاقی وزراء احسن اقبال، اعظم نذیر تارڑ، احد خان چیمہ، خالد مقبول صدیقی، چیئرمین وزیراعظم یوتھ پروگرام رانا مشہود احمد خان، چیف کوآرڈینیٹر مشرف زیدی اتے متعلقہ اعلیٰ حکام توں علاوہ چاریں صوبیاں بشمول گلگت بلتستان اتے آزاد کشمیر دے چیف سیکرٹریز تے نمائندیاں وی ویڈیو لنک دے ذریعے شرکت کیتی۔ وزیراعظم ہدایت کیتی جو دانش سکولاں اتے دانش یونیورسٹی دی تعمیر اچ ڈیجیٹل اتے جدید کلاس رومز تے ودھ سرمایہ کاری کیتی ونجے۔ انہاں آکھیا جو او بطور خادم پاکستان قوم دے ٻالاں کوں بین الاقوامی معیار دی تعلیم تے تربیت ݙیوݨ کوں آپݨی پہلی ذمہ واری سمجھدن۔ وزیراعظم دانش سکولاں اچ استاداں کوں بہترین پیکیج ݙیوݨ دی ہدایت کریندیں ہوئیں آکھیا جو استاداں اتے سٹاف دی بھرتیاں اچ شفافیت اتے میرٹ کوں یقینی بݨایا ونجے۔ انہاں آزاد کشمیر اتے گلگت بلتستان اچ دانش سکولاں دی تعمیر بارے کم تیز کرݨ اتے دانش سکولز یونیورسٹی اچ عالمی معیار دے جدید علوم دی تعلیم تے توجہ مرکوز کرݨ دی وی ہدایت کیتی۔وزیراعظم آکھیا جو اللہ تعالیٰ دے فضل و کرم نال پنجاب اچ دانش سکولاں دی صورت وچ جیڑھا پودا لایا ہا او ہݨ ہک وݙا رُکھ بݨ ڳئے، غریب و متوسط طبقے دے سینکڑاں طلباء دانش سکولاں توں فارغ التحصیل تھی تے دنیا بھر آچ آپݨی صلاحیتاں دا لوہا منویندے پئن۔ دانش سکولاں نال معاشی طور تے کمزور طبقے دے ٻالاں دی خدمت دا جیڑھا خواب ݙٹھا ہا اللہ تعالیٰ دے بے پناہ فضل نال او پورا تھیندا پئے۔ پورے ملک اچ دانش سکولاں دے قیام نال ہزاراں ٻال فیدہ حاصل کریسن۔ انہاں آکھیا جو او ہر طبقے دے ٻالاں کوں اعلیٰ تعلیم و تربیت دے ہکو جہے موقعے ݙیوݨ سانگے ہمیشہ کوشاں رہسن۔اجلاس کوں ݙسیا ڳیا جو کری اسلام آباد اچ دانش سکول دی تعمیر تے کم تیزی نال جاری ہے جو ایں سال دے چھیکڑ تئیں مکمل کر گھدا ویسی۔ گلگت بلتستان اچ سلطان آباد، گانچھے اتے استور اچ دانش سکولاں دی تعمیر تے وی کم تیزی نال جاری ہے جو اڳلے سال مکمل تھیسی۔ آزاد کشمیر اچ باغ اتے بھمبر وچ دانش سکولاں تے کم شروع تھی ڳئے، جݙاں جو شاردہ نیلم اچ دانش سکول دا پی سی ون منظور تھی ڳئے جئیں دا تعمیری کم جلدی شروع کر ݙتا ویسی۔ اجلاس کوں ݙسیا ڳیا جو بلوچستان اچ سبی، موسٰی خیل، ژوب، قلعہ سیف اللہ اتے ڈیرہ بگٹی وچ دانش سکولاں دا پی سی ون منظور تھی ڳئے، جݙاں جو حب اچ دانش سکول دی تعمیر دی فزیبلٹی تے کم جاری اے۔ اجلاس کوں ݙسیا ڳیا جو چترال، کراچی اتے ٹنڈو محمد خان اچ دانش سکولاں دی تعمیر سانگے زمین دا انتخاب تھی ڳئے، جݙاں جو انہاں دی فزیبلٹی اتے بئے اقدامات تے کم تیزی نال جاری اے۔ اجلاس کوں ایبٹ آباد اتے وزیرستان اچ دانش سکولاں دی تعمیر دی تجویزاں اتے راجن پور اچ یونیورسٹی دے حوالے نال پیشرفت بارے وی ݙسیا ڳیا۔دانش سکولز یونیورسٹی بارے پیشرفت بارے اجلاس کوں ݙسیا ڳیا جو یونیورسٹی دی ٹیکنو فزیبلٹی تے کم تیزی نال جاری اے جو ایں مہینے دے چھیکڑ تئیں مکمل کر گھدا ویسی۔ ماسٹر پلان، ڈیزائن اتے تعمیر سانگے 12 بین الاقوامی فرماں اچوں 7 مطلوبہ معیار تے پورا لتھن اتے پرکیورمنٹ کمیٹی ایں کوں حتمی شکل ݙیندی پئی اے۔ عالمی معیار دے ڈگری پروگرامز، داخلیاں دیاں تفصیلات اتے متعلقہ سہولتاں کوں حتمی شکل ݙتی ویندی پئی اے۔ وزیراعظم ہدایت کیتی جو دانش سکولز یونیورسٹی اچ عمارتاں کوں سادہ رکھیا ونجے جݙاں جو کلاس رومز وچ جدید سافٹ ویئر، ڈیجیٹل ایکویپمنٹ، جدید لیبز اتے ہݨ دے دور دی ٹیکنالوجی اچ سرمایہ کاری کوں مرکزی اہمیت ݙتی ونجے۔