ترکیہ دی ترقی ساݙا رول ماڈل اے، ترک عوام ساݙے دلاں دے نیڑے ہن، وفاقی وزیر مواصلات عبدالعلیم خان

اسلام آباد۔ 15 جولائی (اے پی پی) وفاقی وزیر مواصلات عبدالعلیم خان آکھیے جو ترکیہ ہک عظیم قوم اے، انہاں دی ترقی رول ماڈل دی حیثیت رکھیندی اے اتے ترکیہ دے عوام ساݙے دلاں دے ٻہوں نیڑے ہن۔ انہاں اے خیال ترکیہ دے 15 جولائی 2016 دے یوم جمہوریہ و یکجہتی دے حوالے نال ترکیہ دے سفارت خانے وچ منعقدہ خصوصی تقریب توں بطور مہمان خصوصی خطاب کریندے آکھی۔ ترکیہ دے سفارت خانے ایں تقریب دا اہتمام کیتا جیں وچ وفاقی وزیر مواصلات اتے صدر استحکام پاکستان پارٹی عبدالعلیم خان مہمان خصوصی ہن جݙاں جو پاکستان وچ ترکیہ دے سفیر ڈاکٹر نذیر اوغلو اتے اہم سفارتی شخصیات شرکت کیتی۔ترکیہ اتے پاکستان دے پرچماں اتے ݙوہیں ملکاں دے قومی ترانے نال تقریب دا آغاز کیتا ڳیا جݙاں جو مہمان خصوصی وفاقی وزیر مواصلات عبدالعلیم خان اتے شرکاء کھڑے تھی تے 9 سال پہلے شہید تھیوݨ آلیں سانڳے ہک منٹ دی خاموشی اختیار کیتی۔ وفاقی وزیر مواصلات عبدالعلیم خان اپݨے خطاب وچ آکھیا جو ترکیہ ہک عظیم قوم ہے، انہاں دی ترقی رول ماڈل دی حیثیت رکھیندی ہے اتے ترکیہ دے عوام ساݙے دلاں دے نیڑے ہن۔ انہاں آکھیا جو پاکستان دے ترکیہ نال تعلقات انتہائی مضبوط ہن، ہن اتے انشاء اللہ ہمیشہ رہسن۔ عبدالعلیم خان صدر ترکیہ رجب طیب اردگان دی قیادت کوں خراج تحسین پیش کریندے آکھیا جو او جݙاں وی ترکیہ ویندن انہاں کوں دلی خوشی محسوس تھیندی اے۔ وفاقی وزیر مواصلات عبدالعلیم خان آکھیا جو ݙوہیں ملک سانجھے تعاون، تجارت اتے ترقی دے معاہدیں وچ بجھئے ہوئن اتے ترکیہ اتے پاکستان دا اتحاد خطے دے امن، ترقی اتے خوشحالی دی ضمانت اے۔ عبدالعلیم خان ݙسایا جو استحکام پاکستان پارٹی دی طرفوں منعقدہ حالیہ اجتماعاں وچ پاکستانی عوام اپݨے قومی پرچماں دے نال نال ترکیہ دے جھنڈے وی لہرائے جیڑھا جو ایں ملک نال والہانہ وابستگی دا اظہار اے۔ تقریب وچ پاکستان وچ ترکیہ دے سفیر ڈاکٹر عرفان نذیر اوغلو خطاب کریندے ہوئیں 15 جولائی 2016ء وچ ترکیہ وچ شہید تھیوݨ آلیں کوں شاندار لفظاں وچ خراج تحسین پیش کیتا۔ انہاں آکھیا جو 9 سال پہلے ترک عوام بھرپور مضبوطی اتے اتحاد دا مظاہرہ کیتا جیڑھا جو ساݙے قائد مصطفی اتاترک دی تعلیمات دے عین مطابق ہئی۔ ڈاکٹر عرفان نذیر اوغلو پاکستان اتے ترکیہ وچکار گھاٹے دوستانہ اتے برادرانہ تعلقات وچ مزید ودھارے دے عزم دا اظہار کریندے وفاقی وزیر عبدالعلیم خان دے آوݨ دا خیر مقدم کیتا۔