وفاقی وزیر داخلہ محسن نقوی مشہد پڄ ڳئن، صوبہ خراسان دے گورنر جنرل غلام حسین مظفری نال ملاقات

مشہد۔ 15 جولائی (اے پی پی) وفاقی وزیر داخلہ محسن نقوی دورہ ایران دے دوران مشہد پڄ ڳئن، مشہد انٹرنیشنل ائیر پورٹ تے صوبہ خراسان دے گورنر جنرل غلام حسین مظفری انہاں دا پرتپاک خیر مقدم کیتا۔ وزیر داخلہ اتے صوبہ خراسان دے گورنر جنرل غلام حسین مظفری وچال ملاقات تھئی جیں وچ ݙوطرفہ تعلقات اتے سانجھی دلچسپی دے امور تے ڳالھ مہاڑ تھئی ۔ وزارت داخلہ دی طرفوں جاری بیان موجب ، گورنر جنرل صوبہ خراسان وزیر داخلہ دا خیر مقدم کریندے آکھیا جو تہاݙا مشہد آوݨ اساں سانڳے باعث افتخار اے۔ ایران نال پاکستانی حکومت اتے عوام دے خیرسگالی دے جذبات دی قدر کریندوں ۔ گورنر جنرل خراسان آکھیا جو جنگ دے دوران پاکستان ڈٹ تے ایران نال کھڑا رہیا اتے ہر موقع تے بھرپور حمایت کیتی۔ انہاں آکھیا جو پاکستان جنگ دے دوران بھرا تھیوݨ دا ثبوت ݙتا۔ وزیر داخلہ محسن نقوی آکھیا جو ایرانی قیادت اتے عوام جنگ دے دوران ہمت اتے عزم دا بے مثال مظاہرہ کیتا۔ انہاں آکھیا جو پاکستان اپݨے بھرا ہمسایہ ملک نال کھڑے اتے کھڑا رہسی۔ مشہد وچ زائرین دی سہولت سانڳے ایرانی حکومت بہترین انتظامات کیتن۔ سہ فریقی کانفرنس دے فیصلیں نال پاکستانی زائرین کوں ایران اتے عراق ونڄݨ وچ سوکھ تھیسی ۔ محسن نقوی آکھیا جو دورہ ایران ٻہوں کامیاب رہیا اتے ٻہوں محبت ملی۔