سٹاک ایکسچینج انڈیکس دی بلند ترین سطح سرمایہ کاراں دے اعتماد کوں نشابر کریندے، ہر ݙو مہینے بعد وزارتاں دی کارکردگی کوں پرکھیا ویسی، چنگی کارکردگی تے شاباش، ماڑی تے تادیبی کارروائی تھیسی: وزیراعظم شہباز شریف دا وفاقی کابینہ دے اجلاس توں خطاب

اسلام آباد۔ 16 جولائی (اے پی پی) وزیراعظم محمد شہباز شریف سٹاک ایکسچینج انڈیکس دی تاریخ دی بلند ترین سطح تے پڄݨ کوں سرمایہ کاراں دے اعتماد دا مظہر قرار ݙیندیں ہوئیں آکھیا جو معاشی ترقی سانگے اساں ساریاں رَل مل تے جیڑھی کوششاں کریندے پئن او رنگ لائیسن۔ ہر ݙو مہینے بعد وزارتاں دی کارکردگی کوں پرکھیا ویسی، چنگی کارکردگی دے مظاہرے تے شاباش ݙتی ویسی اتے ماڑی کارکردگی تے تادیبی کارروائی تھیسی۔ بُدھ کوں وفاقی کابینہ دے اجلاس توں خطاب کریندیں ہوئیں وزیراعظم محرم الحرام اچ مجالس اتے جلوساں دے پرامن انعقاد اتے امن برقرار رکھݨ سانگے اقدامات تے پوری قوم، وفاقی تے صوبائی حکومتاں اتے متعلقہ ذمہ داران کوں مبارخ ݙتی۔ وزیراعظم آکھیا جو ساریاں دی سانجھی کوششاں اتے محنت نال محرم الحرام پرامن رہیا، قومی تےحدت، یکجہتی اتے اتحاد تے اتفاق دی صورتحال امید افزا اے۔ وزیراعظم اڄوکی بارشاں اچ سوات اچ قیمتی جاناں دے ضیان تے ݙکھ اتے افسوس دا کریندیں ہوئیں آکھیا جو ایں واقعے توں سبق سکھݨا چاہیدے اتے آندے سانگے موثر اقدامات چاوݨے چاہیدن۔ وزیراعظم آکھیا جو این ڈی ایم اے ہک جاندار ادارہ بݨ ڳئے۔ انہاں چیئرمین این ڈی ایم اے دی کوششاں دی تعریف کریندیں ہوئیں آکھیا جو پی ڈی ایم ایز دے نال رَل تے این ڈی ایم اے ضروری اقدامات کیتے۔وزیراعظم آکھیا جو سٹاک مارکیٹ اچ تیزی سرمایہ کاراں دے اعتماد دا مظہر اے، معاشی ترقی سانگے سارے رل مل تے کوششاں کریندے پئن انشاء اللہ اساݙی کوششاں رنگ لیسن۔ وزیراعظم آکھیا جو اڄوکی حکومت کوں اقتدار سنبھالے سوا سال تھی ڳئے، ہݨ ہر ݙو مہینے بعد وزارتاں دی کارکردگی کوں پرکھیا ویسی اتے چنگی کارکردگی ݙکھاوݨ آلی وزارت دے ذمہ داران کوں شاباش ملسی اتے جتھاں کمی کوتاہی تھیسی اونکوں دور کرݨ دی کوشش کیتی ویسی اتے لوڑھ پوݨ تے تادیبی کارروائی وی کیتی ویسی۔ وزیراعظم آکھیا جو کارکردگی اتے معیار تے پورا لہݨ آلے اساݙے سر دا تاج ہن لیکن جو معیار تے پورا نہ لہسی ایں سانگے وݙا واضح پیغام اے۔ وزیراعظم وفاقی وزیر احسن اقبال دی وزارت دی کارکردگی دی تعریف کریندیں ہوئیں آکھیا جو پی ایس ڈی پی دے تحت ہک ٹریلین توں ودھ ترقیاتی کماں تے خرچ کیتے ڳئن، احسن اقبال اساں کوں خوشگوار حیرت اچ مبتلا کیتے، اے ساݙی حکومت دی بہترین کامیابی اے۔ وزیراعظم وزارت خزانہ کوں وی ایں دی کارکردگی تے مبارخ ݙتی۔