سول سروس کوں جدید ٹیکنالوجی اتے بین الاقوامی معیار نال ہم آہنگ کرݨ دی لوڑھ اے: وزیراعظم شہباز شریف

اسلام آباد۔18 جولائی (اے پی پی) وزیراعظم محمد شہباز شریف سول سروس کوں ٻیا فعال بݨاوݨ کیتے ایں دی تجدید نو دی لوڑھ تے زور ݙیندیں ہوئیں آکھیا جو سول سروس کوں جدید ٹیکنالوجی اتے بین الاقوامی سطح تے رائج عوامی خدمت دے معیار نال ہم آہنگ کرݨ دی لوڑھ اے۔ وزیراعظم آفس دے میڈیا ونگ ولوں جاری بیان موجب وزیراعظم محمد شہباز شریف دی صدارت اچ سول سروس دی ریفارمز تے جائزہ اجلاس جمہ کوں تھیا۔ اجلاس اچ وفاقی وزیر برائے پلاننگ اینڈ ڈویلپمنٹ احسن اقبال، وفاقی وزیر برائے اکنامک افیئرز ڈویژن احد خان چیمہ، وفاقی وزیر علی پرویز ملک اتے ݙوجھے متعلقہ نمائندہ سرکاری افسراں شرکت کیتی۔ وزیراعظم آکھیا جو ملکی سول سروس کوں جدید ٹیکنالوجی اتے بین الاقوامی سطح تے رائج عوامی خدمت دے معیار نال ہم آہنگ کرݨ دی لوڑھ اے، سول سروس کوں ٻیا فعال کرݨ کیتے ایں دی تجدید نو ویلّھے دی اہم لوڑھ اے۔ انہاں آکھیا جو سول سروس حکومت دی عملی کارکردگی اتے مختلف وزارتاں اتے شعبہ جات اچ پالیسی دے موثر عمل درآمد اچ کلیدی کردار ادا کریندی اے، سول سروس دی جامع اتے موثر حکمت عملی دے تحت تجدید نو حکومت دی اولین ترجیح اے۔ وزیراعظم ہدایت کیتی جو سول سروس دی انتظامی اتے اداراجاتی ریفارمز اچ نمائندہ سرکاری افسراں اتے عوامی نمائندگان دی رائے دی شمولیت کوں یقینی بݨایا ونجے۔ اجلاس اچ وفاقی وزیر برائے پلاننگ اینڈ ڈویلپمنٹ پروفیسر احسن اقبال وزیراعظم کوں سول سروس دی مجوزہ ریفارمز تے بریفنگ ݙتی جئیں اچ ݙسیا ڳیا جو سول سروس دے ڈھانچے اچ سرکاری افسراں دی بھرتی، پرموشن، ٹریننگ اتے موجودہ اداراجاتی صلاحیتاں اچ ودھارے دے موجودہ نظام اچ خاطر خواہ بہتری دی گنجائش اے۔