چھل توں متاثرہ خانداناں کوں ریلیف ݙیوݨ کیتے سارے ممکنہ وسائل استعمال کیتے ویندے پئن، عظمیٰ بخاری

لاہور (اے پی پی) وزیر اطلاعات پنجاب عظمیٰ بخاری آکھیے جو عوام دے جان و مال دا تحفظ وزیراعلیٰ مریم نواز دی پہلی ترجیح اے، پنجاب حکومت چھل توں متاثرہ خانداناں کوں ریلیف ݙیوݨ کیتے سارے ممکنہ وسائل استعمال کریندی پئی اے، پاک فوج دے جواناں درجناں لوکاں کوں ریسکیو کیتا۔ آپݨے ہک بیان اچ انہاں آکھیا جو صوبے اچ غیر معمولی مینھ توں چھل دی صورتحال پیدا تھئی، جیں نال نبݨݨ کیتے سارے متعلقہ ادارے متحرک ہن، ساریں توں ودھ مینھ پوٹھوہار ریجن دے ضلعیں چکوال، جہلم اتے راولپنڈی اچ ریکارڈ کیتا ڳئے۔ پی ڈی ایم اے، ریسکیو 1122 اتے ضلعی انتظامیہ ذمے واری دا مظاہرہ کریندے وختی اقدامات کیتے جیں پاروں سینکڑاں شہریاں دیاں جاناں بچائیاں ڳئن۔عظمیٰ بخاری آکھیا جو چکوال اچ 209، جہلم اچ 298 اتے راولپنڈی اچ 450 لوکاں کوں ریسکیو کیتا ڳئے جݙاں جو صرف پوٹھوہار ریجن اچ ہک ہزار لوکاں کوں محفوظ جاہ تے منتقل کیتا ڳئے۔ وزیر اطلاعات آکھیا جو پاک فوج دے جواناں وی چھل توں متاثرہ خانداناں دے ریلیف آپریشن اچ حصہ ڳھدا اتے جہلم اچ 64 لوکاں سودھے درجناں شہریاں کوں کامیابی نال ریسکیو کیتا، وزیراعلیٰ پنجاب مریم نواز خود سارے ریسکیو اتے ریلیف آپریشنز دی نگرانی کیتی اتے عوام دے جان و مال دے تحفظ کوں آپݨی پہلی ترجیح قرار ݙتے۔ عظمیٰ بخاری مزید آکھیا جو حکومت پنجاب ہر ممکن وسائل استعمال کریندی پئی اے تاں جو متاثرہ علاقیں اچ وختی امداد پُجائی ونڄ سڳے اتے صورتحال تے قابو پاتا ونج سڳے۔