اڄوکے سال ساوݨ دی شدت 50 توں 60 فیصد ودھ اے، چیئرمین این ڈی ایم اے

اسلام آباد۔ 19 جولائی (اے پی پی) چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل انعام حیدر ملک آکھیے جو اتھارٹی کِہیں وی ہنگامی صورتحال نال نبݨݨ کیتے جامع اقدامات کریندی پئی اے، اڄوکے سال ساوݨ دی شدت وچ 50 توں 60 فیصد ودھارا ݙٹھا ڳئے۔ اپݨے ھک انٹرویو وچ چیئرمین این ڈی ایم اے آکھیا جو وزیراعظم دی رہنمائی وچ مسلح افواج، پی ڈی ایم اے اَتے این ڈی ایم اے ہکے پیج تے ہن اَتے مربوط اقدامات نال آفتاں نال نبݨݨ کیتے جامع اَتے مؤثر منصوبہ بندی کیتی ڳئی اے۔ ہک سوال دے جواب وچ انہاں وضاحت کیتی جو اڄوکا ساوݨ معمول توں پہلے شروع تھئے جو عام طور تے اگست وچ شروع تھیندے جݙاں جو ایں واری اِے جولائی وچ شروع تھیا۔ انہاں ایں ڳالھ تے زور ݙتا جو این ڈی ایم اے ساریاں سطح تے مکمل ہم آہنگی نال متحرک اے، ضلع توں گھن تے صوبائی ڈیزاسٹر مینجمنٹ اتھارٹیز تئیں، آفتاں دے حوالے نال تیاری اَتے انتظام کیتے متحد اَتے مؤثر انداز کوں یقینی بݨایا ویندا پئے۔ ایں مربوط کوشش وچ نہ صرف حکومتی ادارے بلکہ این جی اوز اَتے صنعتاں جہیں اہم سٹیک ہولڈرز وی شامل ہن، جنہاں کوں ساوݨ دے ایں غیر معمولی طور تے شدید موسم دے اثرات کوں گھٹ کرݨ وچ مدد کیتے چار مہینے پہلے بورڈ وچ گھن آیا ڳیا ہئی۔ چیئرمین اڄوکے سال ساوݨ دی شدت وچ وادھے نال پیش آوݨ آلے چیلنجز نال نبڑݨ کیتے این ڈی ایم اے دی ولوں کیتے ڳئے جامع اقدامات تے وی روشنی پاتی۔ انہاں واضح کیتا جو گلوبل وارمنگ پاروں پاکستان کوں شدید قدرتی آفتاں دا سامݨا اے اَتے موسمیات دی تبدیلیاں دی وجہ توں گلیشیئر پگھلدے پئن جیں دے نتیجے وچ ایں ساوݨ دے دوران معمول توں ودھ مینھ وسݨ دی توقع اے۔انہاں آکھیا جو اتھارٹی دا نیشنل ایمرجنسی آپریشن سینٹر کِہیں وی ہنگامی صورتحال توں 4 توں 6 مہینے پہلے ہی پہلے توں الرٹ جاری کرݨ دی صلاحیت رکھیندے جیڑھا ویلھے سر اَتے مؤثر ردعمل دی منصوبہ بندی دے قابل بݨیندے۔ انہاں آکھیا جو این ڈی ایم اے ڈرونز، پہلے توں وارننگ سسٹم جہیں عالمی سیٹلائٹ پورٹلز اَتے گلوبل گلیشیئر مانیٹرنگ پورٹلز دا استعمال کریندے۔ خصوصی سافٹ ویئر دا استعمال کریندے ویلھے سر ڈیٹا کٹھا کیتا ویندے ، پاݨی دے وہݨ دی نگرانی کیتی ویندی اے اَتے مخصوص ٹولز دے ذریعے لینڈ سلائیڈز کوں ٹریک کیتا ویندے۔ ایں توں انڄ این ڈی ایم اے بین الاقوامی اَتے قومی میڈیا پلیٹ فارمز تے 24/7 متحرک اے، تکھی رفتار ردعمل اَتے ہم آہنگی کوں یقینی بݨاوݨ کیتے ماہرین اَتے نینگر افسراں کوں تعینات کیتا ویندے۔ہک ٻئے سوال دے جواب اچ انہاں آکھیے جو ابتدائی معلومات دے موجب اڄوکے سال صورتحال ہݨ وی قابل انتظام اے۔ افسوس دی ڳالھ اے ہے جو 180 بندے ہلاک اَتے 500 زخمی تھئے، جیں دی وجہ انفرادی غلطی ہئی۔ انہاں اِے وی ݙسایا جو لوک اپݨے موبائل ایپ توں ساریاں اپ ڈیٹس حاصل کر سڳدن، جیں وچ رقبے دی گنجائش اَتے آبادی جیھی معلومات شامل ہن۔ انہاں کِہیں وی وی موسمی حالات تے اپ ڈیٹ رہݨ کیتے میڈیا پلیٹ فارمز دا استعمال کرݨ دی اہمیت کوں اُجاگر کریندے آکھیا جو ماہرین اَتے ایپس کہیں وی ہنگامی صورتحال کیتے 24 گھنٹے الرٹ رہندن۔