پاک فضائیہ برطانیہ اچ رائل انٹرنیشنل ایئر ٹیٹو-2025 اچ ݙو ٹرافیاں جت تے غیر معمولی کارنامہ سر انجام ݙتا، آئی ایس پی آر

راولپنڈی (اے پی پی) پاک فضائیہ ہک واری ول بین الاقوامی سطح تے قوم دا ناں روشن کرݨ دی آپݨی قابل فخر روایت کوں برقرار رکھیندے برطانیہ اچ منعقدہ عالمی شہرت یافتہ رائل انٹرنیشنل ایئر ٹیٹو-2025 دے دوران دنیا دی صف اول دی فضائی افواج دے مقابلے اچ ݙو ٹرافیاں حاصل کر تے ہک غیر معمولی کارنامہ سر انجام ݙتے۔پاک فوج دے شعبہ تعلقات عامہ (آئی ایس پی آر) موجب رائل انٹرنیشنل ایئر ٹیٹو 2025 اچ ایئر چیفس کانفرنس دے دوران پاک فضائیہ دی پیشہ ورانہ مہارت اتے ایں دے طیاریں دیاں شاندار پینٹ سکیماں کوں عالمی سطح تے بے مثال پذیرائی حاصل تھئی۔ ٻہوں سارے عالمی سربراہان پاک فضائیہ دے دستے دے نظم و ضبط دے اعلیٰ معیار، ایں دی آپریشنل تیاریاں اتے ایں بین الاقوامی فورم تے پاکستان دی متاثر کن نمائندگی دی تعریف کیتی۔ایں شاندار کامیابی تے سربراہ پاک فضائیہ ایئر چیف مارشل ظہیر احمد بابر سدھو پاک فضائیہ دے دستے کوں مبارخ ݙیندے ہوئیں آکھیا جو قومی پرچم کوں اُچا رکھݨ ہمیشہ پاک فضائیہ دا مقصد رہیے۔ انہاں آکھیا جو اے باوقار ایوارڈز ساݙی پیشہ ورانہ صلاحیتاں، تکنیکی مہارت اتے عمدگی دے حصول کیتے ساݙی انتھک جدوجہد دا مظہر ہن۔ انہاں پاکستان دیاں حقیقی اتے تخلیقی صلاحیتاں کوں اجاگر کرݨ تے پوری ٹیم دی تعریف کیتی۔پاک فضائیہ دے جدید ترین جے ایف-17 تھنڈر بلاک تھری لڑاکا طیاریں ایں باوقار ایئر شو اچ پہلی واری آپݨیاں صلاحیتاں دا مظاہرہ کریندے “سپرٹ آف دی میٹ” ٹرافی آپݨے ناں کیتی جو ہک قابل تحسین امر اے۔ اے ٹرافی انہاں طیاریں کوں ݙتی ویندی اے جیڑھے رائل انٹرنیشنل ایئر ٹیٹو دیاں روایتاں، ایں دی روح اتے جوش و جذبے کوں بہترین انداز اچ پیش کریندن۔ اے ایوارڈ پاکستان دے جے ایف-17 پروگرام دی تکنیکی مہارت اتے آپریشنل صلاحیتاں دی نشاندہی کریندے جݙاں جو عالمی سطح تے پاکستان دیاں ودھدیاں ہوئیاں ایرو اسپیس صلاحیتاں دا مظہراے۔پاک فضائیہ دے سی-130 ہرکولیس ایں سال دے “آئز اِن دی سکائیز” دے تھیم دی عکاسی کیتی، جیں کوں ہک شاندار اتے تخلیقی انداز نال تیار کیتے ڳئے خصوصی لایوری نال مزین کیتا ڳیا ہئی۔ سی-130 طیارے بہترین مینٹی ننس اتے ٻہوں خوبصورتی نال پیش کیتے ڳئے ہوائی جہاز ہووݨ تے “کنکورز ڈی ایلیگینس” ٹرافی حاصل کیتی۔پاک فضائیہ دی رائل انٹرنیشنل ایئر ٹیٹو 2025 اچ کامیابیاں دی ہک بھرپور تاریخ اے ۔ پاک فضائیہ ایں توں پہلے 2006، 2016 اتے 2018 اچ متعدد اعزازات حاصل کیتے اتے ہوا بازی اچ مسلسل شاندار کارکردگی دا مظاہرہ کریندے ہوئیں عالمی معیار دی فضائیہ دے طور تے آپݨی ساکھ کوں مزید تقویت ݙتی۔ رائل انٹرنیشنل ایئر ٹیٹو 2025 اچ پاک فضائیہ دی شاندار کارکردگی صرف دنیا دی صف اول دی فضائی افواج اچ ایں دی حیثیت کوں مزید مستحکم نی کریندی بلکہ پوری پاکستانی قوم کیتے ماݨ دی ڳالھ اے۔