بلوچستان اچ دہشت گرداں دے خلاف کامیاب آپریشن، فتنہ الہندستان دے ٻئے چار دہشت گرد جہنم واصل

راولپنڈی۔22 جولائی(اے پی پی)بلوچستان دے ضلع قلات اچ 19 جولائی 2025 کوں سکیورٹی فورسز ولوں خفیہ اطلاعات دی بنیاد تے ہک کامیاب کارروائی اچ بھارتی پراکسی، فتنہ الہندستان دے چار دہشت گرداں کوں جہنم واصل کیتا ڳیا، ایں آپریشن توں بعد 21 جولائی کوں علاقے اچ ہک منظم کلیئرنس اتے سینیٹائزیشن آپریشن کیتا ڳیا۔ آئی ایس پی آر ولوں جاری پریس ریلیز موجب آپریشن اچ فورسز چار ٻئے دہشت گرداں کوں ڳول تے منطقی انجام تئیں پڄایا۔ کارروائی اچ دہشت گرداں دا ہک اہم ٹھکانہ وی تباہ کیتا ڳیا جتھوں وݙی مقدار اچ اسلحہ، گولہ بارود اتے بارودی مواد برآمد تھیا۔ سکیورٹی فورسز قوم دے رلے دشمن دے ناپاک عزماں کوں ناکام بݨاوݨ کیتے پرعزم ہن۔ بھارتی پراکسیز ولوں بلوچستان اچ امن، استحکام اتے ترقی کوں سبوتاژ کرݨ دیاں کوششاں کہیں صورت کامیاب نا تھیوݨ ݙتیاں ویسن۔ ترجمان سکیورٹی فورسز دا آکھݨ اے جو اینڄھا آپریشن دہشت گرداں کیتے سنیہا اے جو بلوچستان دے امن نال کھیݙݨ آلیاں کوں نشان عبرت بݨا ݙتا ویسی۔