پاکستان اتے برطانیہ وچال اڄوکے تھیوݨ آلے تجارتی مذاکرات ݙوہیں فریقین کیتے فیدہ مند ثابت تھیسن، وزیر اعظم شہباز شریف دی برطانوی ہائی کمشنر جین میریٹ نال ملاقات اچ گالھ مہاڑ

اسلام آباد۔23 جولائی (اے پی پی) وزیر اعظم محمد شہباز شریف پاکستان اتے برطانیہ وچال ݙو پاسہ تعاون تے اطمینان کریندیں ہوئیں آکھیا جو ݙوہیں ملکاں وچال تھیوݨ آلے تجارتی مذاکرات ݙوہاں فریقین کیتے فیدہ مند ثابت تھیسن۔ وزیر اعظم آفس دے میڈیا ونگ توں جاری بیان موجب وزیر اعظم محمد شہباز شریف نال پاکستان اچ برطانوی ہائی کمشنر جین میریٹ بدھ کوں ملاقات کیتی۔ وزیر اعظم کنگ چارلس سوئم اتے برطانوی وزیر اعظم کیئر سٹارمر کیتے نیک خواہشات دا اظہار کریندیں ہوئیں آکھیا جو او ایں سال دے چھیکڑ اچ برطانیہ دی قیادت نال ملاقات دے منتظر ہن۔ انہاں برطانوی حکومت ولوں پی آئی اے دی پروازاں دی بحالی دے اڄوکے فیصلے دا خیرمقدم کریندیں ہوئیں آکھیا جو ایں مثبت پیشرفت نال برطانوی پاکستانی کمیونٹی کوں درپیش مسئلیاں کوں دور کرݨ دے نال نال لوکاں وچال تبادلے کوں ودھاوݨ اچ وی مدد ملسی۔ انہاں ایں بارے ہائی کمشنر دے مثبت کردار کوں خاص طور تے سراہا۔ وزیراعظم پاکستان اتے برطانیہ وچال ݙو پاسہ تعاون دی مثبت رفتار تے اطمینان کریندیں ہوئیں آکھیا جو ݙوہاں ملکاں وچال اڄوکے تھیوݨ آلے تجارتی مذاکرات ݙوہیں فریقین کیتے آپسی طور تے فیدہ مند ثابت تھیسن۔ وزیر اعظم پاک بھارت کشیدگی اچ ڳھٹکی کیتے برطانیہ دے کردار کوں سراہندے ہوئیں ایں گالھ دا اعادہ کیتا جو پاکستان بھارت دے نال سارے حل طلب مسئلیاں تے بامعنی مذاکرات کیتے تیار اے۔ برطانوی ہائی کمشنر وزیر اعظم کوں آپݨے اڄوکے دورہ لندن بارے ݙسیا جتھاں انہاں پاکستان اتے برطانیہ وچال تعلقات کوں ودھاوݨ بارے وسیع مشاورت کیتی۔ برطانوی ہائی کمشنر وزیراعظم دے وژن اتے قیادت اچ گزریل ڈیݙھ سال اچ حکومت دی معاشی کارکردگی کوں سراہا جئیں نال سارے اہم میکرو اکنامک اشاریاں اچ نمایاں بہتری آئی اے۔ ملاقات اچ برطانوی ہائی کمشنر وزیراعظم نال جنوبی ایشیا اتے مشرق وسطیٰ اچ تھیوݨ آلی علاقائی پیشرفت تے برطانیہ دے نقطہ نظر بارے گالھ مہاڑ کیتی۔